Naligiissaarinissamut ilusiliinissaq

Borgmester Hermann Berthelsenimit paasineqarpoq, tusagassiortunit, politikerinit allaniillu naligiissaarinissamut aaqqissuusseqqinneq pillugu Qeqqata Kommuniata isumaa apeqquteqaatigineqarsimasoq. Borgmesterip paasissutissiissutigaa, nutaamik naligiissaarinissamut ilusiliinissaq ataatsimoortumillu tapiissutinut sinaakkusiinissamik eqqarsaatigisat pillugit BBO-p nalunaarusiaa 2014-imi juunip tallimaani kommunalbestyrelsimit eqqartorneqartut.
28. juli 2014

Borgmester Hermann Berthelsenimit paasineqarpoq, tusagassiortunit, politikerinit allaniillu naligiissaarinissamut aaqqissuusseqqinneq pillugu Qeqqata Kommuniata isumaa apeqquteqaatigineqarsimasoq. Borgmesterip paasissutissiissutigaa, nutaamik naligiissaarinissamut ilusiliinissaq ataatsimoortumillu tapiissutinut sinaakkusiinissamik eqqarsaatigisat pillugit BBO-p nalunaarusiaa 2014-imi juunip tallimaani kommunalbestyrelsimit eqqartorneqartut.

2014-imi juunip tallimaani Qeqqata Kommuniani Kommunalbestyrelsi tullinnguuttutigut innersuussuteqarnissamut aalajangerpoq
A. nutaamik naligiissaarinissamut ilusiliinissaq ataatsimoortumillu tapiissutinut sinaakkusii-nissamut iluseritinniagaq, Namminersorlutik Oqartussat pilersitaannik akileraarutinik iser-titanik inuiaqatigiillu agguataarneri aammalu isumaginninnikkut/sananeqarnermik aallaaviusut 50/50 missaaniittut agguataarinermik, allakkiami takussutissiaq 36-mut naapertuuttumut aallaaveqartariaqartoq
B. 2015-i aallarnerfigalugu iluseritinniagaq atuutilertariaqartoq 
C. iluseritinniagaq inaarsarneqassasoq immikkoortutigullu arfinilinnut tullinnguuttutigut inerisarneqassasoq

  1. Suliffeqarfiit 50-it sinnerlugit sulisoqartuinnarniunngitsuni suliffeqarfinnili Namminersorlutik Oqartussat pilersitaanni tamani inuit akileraarutaat ilaatinneqartariaqarpoq.
  2. Naalagaaffiup suliffiutaani inuit akileraarutaat aamma naligiissaatariaqarput
  3. Innuttaasumut ataatsimut kommunimut akileraarutip qaffanneqarneranut sunniutai, kommuninut tamanut assigiikannertariaqarput
  4. Inuiaqatigiit agguataarnerisa aallaaviginerat ukioqassuseq malillugu immikkoortunut aggornilersorneqassapput, taamaalillutik kommunip aningaasartuutaannut annertunerusumik naapertuutilissallutik
  5. Isumaginninnermit/sananeqarneranut aallaaviusut taamatuttaaq inerisarneqassapput, taamaalillutik kinaassusersiunngitsumik paasissutissanik toqqammaveqassallutik
  6. Isumaginninnermit/sananeqarneranut aallaaviusut maannakkut aallaaviusunit sisamaasunit aallaavinnik amerlanerusunik toqqammaveqartariaqarput, taamaalilluni iluseritinniagaq aallaavinnik ataasiakkaanik allannguinermi malussarissuussanngilaq

Tamatuma kingornatigut Naalakkersuisoq Vittus Qujaukitsoq siunnersuummik nutaamik nassiussivoq. 2014-imi juulip 30-ani Qeqqata Kommuniani Kommunalbestyrelsip siunnersuut eqqartussavaa. 2014-imili juunip tallimaani Kommunalbestyrelsip innersuussutigisimasaanut siunnersuut ungasittutut isikkoqarpoq.

Borgmester Hermann Berthelsenip erseqqissaatigissavaa, inuiaqatigiinni annertunerusumik naligiisitsinissami apeqqummut tunngatillugu, naligiissaarinissamut aaqqissuusseqqinnissaq kisimi pineqanngimmat. Namminersorlutik Oqartussat nalinginnaasumik politikkikkut naligiimmik agguaassisarnissaa, pingaartumik Namminersorlutik Oqartussat sanaartornermut aningaasaliissutinik allatigullu ineriartortitsinermik suliniutinik agguaassisarnerata naligiinnissaa pingaaruteqarneruvoq.

Nunamut tamarmut iluaqutaasussanik naligiinnerusumik Namminersorlutik Oqartussat suliffeqartitsiniarnermi aningaasaliissutinik upernaaq agguaanissamik pingaartitsinerusimavoq. Ukiorpassuani illoqarfiit pingaarnersaannut pingaarnersiusarnerit sammitinneqarpallaanerisa kingorna, nunamut tamarmut ineriartortitsinissamut pisariaqartunik suliniuteqartoqarnissaq pingaarutilerujussuuvoq. 2015-imut Aningaasaqarnermut inatsimmi kiisalu Namminersorlutik Oqartussat ukiamut Inatsisartut ataatsimiinnerani pingaarnersiulernerminni malitseqartinneqarumaartoq neriuutigaara, Hermann Berthelsen naggasiivoq.