Tusagassiutitigut nalunaarut Kikkut attartorsinnaappat?

Nunap ineriartortinneqarnissaa pillugu Naalakkersuisut borgmesterillu ulluni makkunani ataatsimiipput. Nunap immikkoortortaanni assigiinngisitsinerujussuaq suli akiorneqartariaqartoq isumaqarpugut. Assigiinngisitsinerujussaq maanna aamma Namminersorlutik Oqartussat suliffeqarfiutaannut attartortitsisarnermut sunniuteqaleriartorpoq.
11. februar 2015

Borgmesterinit Ole Dorph-imit, Hermann Berthelsen-imit aamma Jørgen Wæver Johansen-imit

Nunap ineriartortinneqarnissaa pillugu Naalakkersuisut borgmesterillu ulluni makkunani ataatsimiipput. Nunap immikkoortortaanni assigiinngisitsinerujussuaq suli akiorneqartariaqartoq isumaqarpugut. Assigiinngisitsinerujussaq maanna aamma Namminersorlutik Oqartussat suliffeqarfiutaannut attartortitsisarnermut sunniuteqaleriartorpoq. 

Kalaallit Nunaanni inuiaqatigiit aningaasaataannik attartortartunik aningaasaliissutigineqartartunillu Namminersorlutik Oqartussat aktianik piginneqatigiiffippaalunnik suliffeqarfiuteqarpoq. Tamanna aningaasaqarnermik ingerlatsitsisuugami ajunngilaq, matumanili pinngitsoorsinnaanngisamik attartornissani Namminersorlutik Oqartussat aktianik piginneqatigiiffiutaasa akornanni assigiisitsisoqarnersoq eqqarsaatiginarpoq. Piginnittoq nalinginnaasumik qularnaveeqqusiissussaammat, aktianik piginneqatigiiffilluunniit attartukkaminik utertitsinissaminut arlaatigut qulakkeerinnittussaammat, eqqarsaat tamanna pinngorpoq. 

Suliffeqarfiit ilaanni akiitsut appariartortut 
Royal Greenland-ip aningaasaqarnera ilorraap tungaanut saassimasoq ukiuni kingullerni tusartarlugu nuannerpoq, suliffeqarfillu Kalaallit Nunaanni aningaasaliinissaminik, saniatigullu akiitsuminik akilersuinissaminik sulissuteqarsimavoq. Ineriartorneq tamanna siunissamut isumalluarnarpoq.

TELE Greenland-ip akiitsuni aamma appartingaatsiarnikuuai, ajoraluartumilli aningaasaliinissat kinguartingaatsiarneqarnikuullutik. Kommunit assigiimmik pineqassappata, ilinniartussallu nunarsuarmut attaveqassappata, Qeqqata Kommunianut aamma Qaasuitsup Kommunianut immap naqqatigut kabelissaq pingaaruteqarluinnarpoq. Immap naqqatigut kabelissaq 2015-imit ajoraluartumik kingusinnerusukkut pilersinneqartussatut kinguartinneqarpoq.

Aningaaseriviit TELE Greenland-imut suliffeqarfinnullu allanut piumasaqaatiminnik sukaterisimanissaat ilimanarpallaanngilaq. Aktianik piginneqatigiiffiit tamarmik piginnittumit Namminersorlutik Oqartussanit qularnaveeqqusiissummit tunniussisalernissaat ilimanarpoq: Taava apeqqutinngorpoq: Namminersorlutik Oqartussat aktianik piginneqatigiiffiutaannit kikkut attartorsinnaappat? Piginnittunit, taamaalillunilu aamma nunami akileraartartunit tamanit kikkut qularnaveeqquserneqassappat?

Illoqarfiit pingaarnersaanni aningaasaliissutit akiitsullu qaffakkiartupiloorput 
Illuatungaatigut nuna tamakkerlugu aktianik piginneqatigiiffiit akiitsui appartut, aktianik piginneqatigiiffiup ataatsip, tassaasoq Illuut A/S-ip akiitsui milliard koruunit tungaannut qaffakkiartorput. Illuut A/S illoqarfiit pingaarnersaanni inissianut allaffeqarfinnullu aningaasaliinikuuvoq. Taamaalilluni Nuummi aningaasaliinernut taakkununnga Nuup avataani nunami innuttaasut aningaasaliisuupput.

Taanna kisimiinngilaq. Nuuk Sikuki Harbour A/S Nuummi nutaamik umiarsualiviliornissaminut ½ mia. koruuninik attartortussaavoq. Kingumut nunami akileraartartut qularnaveeqqusiisussanngorput. Sinerissap sinneranit suliffeqarfinnik tigooraasussamut aningaasaliinermut qularnaveeqqusiisussanngorlutik. 

Nuna tamakkerlugu aktianik piginneqatigiiffiit sukateralutik nuna tamakkerlugu attaveqaqatigiinnermut tunngasunut attartorsinnaanatik, Namminersorlutik Oqartussat illoqarfiit annersaanni aktianik piginneqatigiiffimminnut nutaamut nangaassuteqaratik qularnaveeqqusiinialeqaat. Illoqarfiit annersaaniinnaq aningaasaliisoqartarnera Aningaasanut Inatsimmi aamma ersarippallaanngilaq. Ineriartorneq tamanna ineriartorluarnerunani assigiinngisitsivoq. Naalakkersuisut Inatsisartullu tamanna ilumut angorusuppaat?