Tusagassiutitigut nalunaarut: Qeqqata Kommuniani allamiut oqaasiinik atuartitsinerit amerlanerusut

Meeqqat atuarfiani atuartut oqaatsitigut piginnaasaat pillugit oqallinneq piffissaq kingulleq annertusimavoq. Qeqqata Kommuniani nuannaarutigalugu takusinnaavarput, ukiut ingerlanerini meeqqat atuarfiini atuartut kalaallisut pikkorissiartuinnartut. Oqaatsitigut, taamaalillunilu kulturikkut anersaakkut nukittuallassimanerput nuannerpoq.
22. april 2015

Ilinniartitaanermut, Kulturimut Sunngiffimmullu ataatsimiititaliap siulittaasuanit Evelyn Frederiksen-imit

Meeqqat atuarfiani atuartut oqaatsitigut piginnaasaat pillugit oqallinneq piffissaq kingulleq annertusimavoq. Qeqqata Kommuniani nuannaarutigalugu takusinnaavarput, ukiut ingerlanerini meeqqat atuarfiini atuartut kalaallisut pikkorissiartuinnartut. Oqaatsitigut, taamaalillunilu kulturikkut anersaakkut nukittuallassimanerput nuannerpoq.

Qeqqata Kommuniani, Kalaallit Nunaannilu meeqqat atuarfiinik nalilersuinermi ajoraluartumik paasinarsivoq, allamiut oqaasiinik, pingaartumik qallunaat tuluillu oqaasiinik ilinniartitsineq assinganik siuariaallassimanngitsoq. Oqaatsitigut ilinniartitsinerit ilaat killorluinnaanik kinguariaallassimapput.

Tamanna Qeqqata Kommuniata iliuuseqarfigerusussimavaa, taamaattumillu kommunalbestyrelsip ukioq-manna siullermeertumik ataatsimiinnermini, meeqqat atuarfiini akunnerit atuartitsiviusussat pillugit pilersaarut nutaaq akuersissutigaa. Pilersaarut taanna, aasaanerani atuanngiffeqarnerup kingorna ukioq atuarfiusumi 2015-2016-imi atuutilissaaq.

Akunnerit atuartitsiviusussat pillugit pilersaarut nutaaq 
Akunnerit atuartitsiviusussat pillugit pilersaarutip nutaap kingunerisaanik, atuartut 4. klassinngoraangata aatsaat tuluttut ilinniartinneqartaleraluartut, maanna 1. klassimit tuluit oqaasiinik ilinniartinneqartalissapput. Tamatuma aamma kingunerisaanik ukiup atuarfiusup ingerlanerani tuluit oqaasiinik ilinniartitsineq 50 procentingajammik annertusineqassaaq. Atuartut massakkut sapaatip akunneranut katillugit akunnerni 22-ni tuluit oqaasiinik ilinniartinneqartarput, siunissamili sapaatip akunneranut katillugit akunnerni 31-ni ilinniartinneqartalissapput.

Allannguutit annerpaartaat tuluit oqaasiinut tunngassuteqaraluartut, qallunaat oqaasiinik ilinniartitsinermi akunnerit atorneqartartut ukiup atuarfiusup tullissaani aamma amerlineqassapput. Siunissami atuartut atuarnermi tamaat sapaatip akunneranut akunnerni tallimani qallunaat oqaasiinik ilinniartinneqartalissapput. Imaappoq, ataatsimut isiginnilluni ukiuni qulini meeqqat atuarfiani qallunaatut atuartitsinermi sapaatip akunneranut akunnerit 50-it atorneqartassapput.

Nukarlerni atuartunut kisitsinermi allatigullu atuartitsinermi akunnerit amerlanerusut 
Akunnerit atuartitsiviusussat pillugit pilersaarutitigut allamiut oqaasii kisimik nukittorsarniarneqanngillat. Kisitsinermi atuartitsinerit aamma amerlineqassapput, matumanimi atuarneq tamakkerlugu sapaatip akunneranut akunnerni tallimani aamma kisitsinermi atuartitsisoqartalissammat. Massakkut nukarlerni, imaappoq 1. klassimit 3. klassip tungaanut atuartut sapaatip akunneranut akunnerni sisamani kisitsinermi atuartinneqartarput.

Tuluit qallunaallu oqaasiinik kisitsinermillu atuartitsinerit immikkut iliuuseqarfigineqarmata, nukarlerni akunnerit atuartitsissutigineqartartut aamma amerlineqarput, taarsiulluguli angajullerni atuartitsinermi akunnerit ikilisarneqarlutik. Kommuninut allanut sanilliullugu Qeqqata Kommuniani angajullerni atuartuutigut akunnerni amerlanerusuni atuartinneqartarput, isumaqarpugullu taamatut aaqqiissuteqarsimaneq annerusumik ilikkagaqarfiunani ajoraluartumik angajullerni atuartunut atuarnerminnik qatsussisartunut annertusaaqataaginnartoq. Taamaattumik siunissami siusissumik ilinniartitsinissaq anguniarneqarnerussaaq.

Akunnerit ikinnerusut……
Ataatsimut isigalugu akunnerit atuartitsiviusartut allannguuteqassanngillat, taamaattumillu atuartitsissutit ilaannut akunnernik ilasisoqarpat, atuartitsissutit allat ikilisaaffigineqassapput. Siunissami kalaallit oqaasiinik, inuttut ineriartorneq pillugu toqqagassanullu ilinniartitsinermi akunnerit ikinnerulissapput.

Kommunalbestyrelsip naatsorsuutigaa, taamatut aaqqiissuteqarnikkut meerartatta kalaallit oqaasiinik atuinermikkut kinguariassanngitsut, inuttut ineriartorunnaassanngitsut, eqiasunnerulissanngitsullu. Ukiut ingerlanerini takoreerparput, Ilinniarfissuarmi ilinniartitsisut ilinniartut amerlanerusut naammassisartut. Imaappoq, meeqqat atuarfiini kalaallisut atuartitsineriinnaanngitsoq, atuartitsissutinili tamani aamma kalaallit oqaasii atorneqarnerulerput. Taamaattumik atuartitsissutini tamangajanni ilinniartitsisut atuartullu akunnerini kalaallit oqaasiinik atuisarneq, qularnanngitsumik atuartuutitta kalaallisut pikkorissiartuinnarnerinut patsisaaqataavoq.

Akimortumik tamat isiginnissuseqartumillu atuartitsineq 
Inuttut ineriartorneq pillugu, toqqagassanilu atuartitsinermi taamaattussaassagaluarpoq. Matumani meerartatta atuartitsissutini tamani atuarfiullu avataani inuttut ineriartornissaat, meeqqat atuarfiini ilinniartitsisut uagullu angajoqqaatut qulakkeertussaavarput. Tamatuma saniatigut atuartitsissutini allani atuartut timiminnik atuisarnissaannut, erinarsortarnissaannut nipilersortarnissaannullu qulakkeerinissatsinnut pikkorinnerulertariaqarpugut. Assersuutigalugu Beatles-ikkut atugaanik nipilersorluni erinarsorlunilu tuluit oqaasii ilinniartitsissutigineqarunik immaqa atuartut ilikkarnerusinnaapput. Taamatut akimortumik tamat isiginnissuseqartumillu atuartitsineq meeqqat atuarfitsinnut aqqutissaavoq.

Qeqqata Kommuniani akunnerit atuartitsiviusussat pillugit pilersaarutaanut nutaamut angajoqqaat, inuiaqatigiillu qisuariaateqarlutik oqaaseqaatissaat tusassallugit qilanaaraara. Minnerunngitsumik ukiup atuarfiusussap tullissaani atuutsilerneqarnissaa qilanaaraara.