Tusagassiutinut nalunaarut: Sverigep avannaani biilinut misileraavik tikeraarneqartoq.

Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq aamma Qeqqata Kommuniani borgmesteri Hermann Berthelsen malitseqarlutik ulluni 19-20. maj 2015 Sverigep avannaani biilinut misileraasarnikkut suliffissuaqarnermi qitiusumik akuusut tikeraarpaat.
22. maj 2015

Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq aamma Qeqqata Kommuniani borgmesteri Hermann Berthelsen malitseqarlutik ulluni 19-20. maj 2015 Sverigep avannaani biilinut misileraasarnikkut suliffissuaqarnermi qitiusumik akuusut tikeraarpaat.

Tikeraarnermut pingaarnerusutigut siunertaasoq unaasimavoq qanittukkut Arjeplog Test Management-imik suleqatigiilernissap pilersinneqaqqammersup isumannaallisarneqarnissaa Kangerlussuarmi aalaakkaasumik biilinut misileraavimmik pilersitsisinnaaneq siunertaralugu.

Vittus Qujaukitsoq oqarpoq:

'Nuannaarutigaara ukiorpassuarni uninngasimalluni biilinik misileraasarnermik suliaqartut Kangerlussuarmut soqutiginninnerisa pilerseqqinneqarnerat iluatsinneqarmat, biilinik issilluinnartumik atugaqarlutik misilittaavissaqqilluinnartutut. Tikeraareernerup kingorna paasinarsivoq, svenskit tungaannit amerlasuunik aningaasaliisoqarsinnaanera kommunimilu suliffissanik nutaarpassuarnik pilersitsisoqarsinnaanera.'

Namminersorlutik Oqartussani attuumassuteqartumik naalakkersuisoqarfiit qaammatini aggersuni kommunimit qanimut suleqateqarlutik qularnaassavaat, biilinut misileraasarnikkut suliffissuaqarnermut sinaakkutissatut piumasaqaatit suli pitsanngortinneqarnerunissaat. August 2014-imiilli Naalakkersuisunit Kangerlussuarmi biilinut misileraavik akitsuutinut akiliisarunnaarsinneqarpoq. sulili arlalissuarnik unammilligassaqarpoq Kalaallit Nunaanni biilinut misileraasarnerup aallarteqqinneqarnissaanut, minnerunngitsumik unnuisarnikkut periarfissanik nutarterinissaq eqqarsaatigalugu aamma sumiiffimmi aqqusinertigut suli annertusaanissaq.

Hermann Bertelsen oqarpoq:

'Assut nuannaajallannarpoq, biilinut suliffissuaqarnerup aammaarluni Kangerlussuup pitsaasumik inissisimanerani periarfissanik takunnissinnaalernera nunavissuup silaannaanik silaannaqarluni, nunani tamalaani mittarfeqarluni, takisuumik aqqusineqarluni taserpassuaqarlunilu. Qularutissaanngilaq, Kangerlussuup siunissaa pillugu Naalakkersuisut erseqqissumik nalunaaruteqarnerat nunani allani aningaasaliisartunit pitsaasumik isigineqarmat.'

Tikeraarnermi aallartitanit ilaatigut pulaarneqarput Swedish Proving Ground Association-imut siulittaasoq, Arjeplog Test Management-imut pisortaq, Colmis-imut pisortaq, Tjintokk-imut siulersuisut kiisalu Arjeplog kommune-mut sinniisut.

Ingerlatseqatigiiffinnit misilittaasarnikkut atugassarititaasut saqqummiussorneqarput aammalu Sverigip Kalaallillu Nunaata akornanni suleqatigiinnermi niuersinnaanikkut periarfissat saqqummiunneqarlutik.

Piffissami 1999-2004 Tjintokk biilinut misileraaveqarpoq Kangerlussuup eqqaani Sermersuarmi 120 kilometerisut tiffasitsigisumi, tassani biililiorfiup VW-p biililiatik nutaat misilittartarpaat. Arjeplog Test Mangament oktober 2014-imi misileraatitut biilinut suliffissuaqarnermi pisisartutik arlallit kiffartuuttarsimavaat Kangerlussuarmi namminermi misileraaviugallartoq aqqutigalugu.


Uunga saaffiginninnikkut annertunerusumik paasisassarsisoqarsinnaavoq:

Naalakkersuisumut allatsimut Thomas Kjærgaard mobil: +299 580858 aamma/imaluunniit kommunaldirektørip tullersortaanut Laust Løgstrup mobil: +299 525952 sianernikkut.