Qeqqata Kommunia Sisimiuni Teknikkimut Avatangiisinullu pisortamik atorfinitsitsivoq

Hans Ulrik Skifte, Sisimuni Teknikkimut Avatangiisinullu pisortatut juulimi atorfinippoq.

Teknikkimut Avatangiisinullu pisortartaaq Maniitsumi inunngorlunilu peroriartorpoq, issittumi ingeniøritut ilinniagaqarpoq, taavalu Nuup Kommuniani pilersaarusiornermi aqutsisutut, Polar Oilimilu sanaartornermi pisortatut atorfeqarsimanermigut misilittagaqarluarluni.
28. juli 2015

Taamaalilluni Qeqqata Kommuniani Sisimiuni Maniitsumilu Teknikkimut Avatangiisinullu Immikkoortortat qitiusumik immikkoortortanit taakkuninnga suleqatigiinneq annertummat, Qeqqata Kommuniani sulinissaminut naleqqulluarpoq. Hans Ulrik Skifte-p Maniitsumi peroriartorsimanera, illoqarfiillu pingaarnersaanni kommunimi sulisimanermini misilittagaqarnera eqqarsaatigalugu, suleqatigiinnissamut suliatigullu ilisimasaqarnissamut Qeqqata Kommunianit naatsorsuutigineqartut annertupput.

Namminersortumi Polar Oil-imi misilittagaqarnera, matumani nutaamik suleqatigiinnissaq pillugu entreprenørinik suleqateqarsimanera ilanngullugu, atorfinitsinneqarnissaani pingaartutut aamma isigineqarsimapput. Inuutissarsiorfinnik innuttaasunillu suleqateqarneq Teknikkimut Avatangiisinullu Immikkoortortami, nalinginnaasumillu Qeqqata Kommuniani pingaarnertut inissisimavoq.

Hans Ulrik Skifte-p atorfinitsinneqarneratigut, Qeqqata Kommuniani issittumi ingeniørit tallimassaat atorfinitsinneqarpoq. Qeqqata Kommuniani, Sisimiunilu Teknikkimut Avatangiisinullu Immikkoortortami siullermeertumik issittumi ingeniørimik teknikkimut avatangiisinullu pisortamik atorfinitsitsisoqarnera naleqquttorujussuuvoq. Issittumi ingeniørinngorniarfik pillugu Qeqqata Kommunia ARTEK-imik qanimut suleqateqartuarsimavoq.

Annertunerusumik paasissutissat:

Kommunimi pisortaanerup tullersortaa

Laust Løgstrup

Tlf.: (+299) 867310

Mobil: (+299) 525952