UNESCO nunarsuarmioqatigiinnut kingornussassanngortitsinissamut Qeqqata Kommunia qinnuteqalerpoq

Qeqqata Kommuniani nunarsuarmioqatigiinnut kulturikkut kingornussassanngortitsinissamut atatillugu suliniutissatut siunnersuusiornissamut Aage V. Jensen Charity Foundation, 1,8 mio. koruuninik aningaasaliisimasoq pillugu Borgmester Hermann Berthelsen nuannaarutigisaminik nalunaarummik tigusaqarpoq.
16. juli 2015

Qeqqata Kommuniani nunarsuarmioqatigiinnut kulturikkut kingornussassanngortitsinissamut atatillugu suliniutissatut siunnersuusiornissamut Aage V. Jensen Charity Foundation, 1,8 mio. koruuninik aningaasaliisimasoq pillugu Borgmester Hermann Berthelsen nuannaarutigisaminik nalunaarummik tigusaqarpoq.

Suliniut: "Aasivissuit - Maligiaq - Nipisat: Ukiut 4.500-t ingerlanerini issittumi najugaqarneq, piniarneq kulturillu naapittarnerat" ukiorpaalunngortuni UNESCO-p piukkunnartunut allattugaataaniinnikuuvoq. Sermersuarmit tuttoqarfiit aqqusaarlugit kangerlunni, sinerissami qeqertanilu qanga asimioqarfiusimasorpassuullutik nunatat kulturikkut takussutissartaqarlutik kusanarluinnartut pineqarput. Ukiut 4.500-t ingerlanerini Kalaallit Nunaata kitaani inuit kulturikkut kingornussat, matumani Atlantikup avannarpasissuani issittup kangiani immikkuullarilluinnarlutik immikkut pisimasut ilanngullugit nunatamiipput.

Ukiut 4.500-t ingerlanerini inuit nunaanniissimanerat pillugu immikkut samminninnissamut borgmester Hermann Berthelsen-ip periarfissarpassuaqarsoraa. Kulturitsinnut nammineq paasisimasaqarnissatsinnut pingaaruteqarpoq, aammali Kalaallit Nunaanni ukiut tusindilikkaat ingerlanerini inuuneq pillugu oqaluttuarnissamut takornarissanut pilerisaarinissamut aamma periarfissiivoq. Tamanna kommunimi Kalaallit Nunaannilu takornarialerinerup ineriartortinneqarnissaanut pingaaruteqarpoq, Qeqqata Kommuniani borgmesteri paasissutissiivoq.

Aage V Jensen Charity Foundation-ip aningaasaliinera tunuliaqutaralugu, suliniutip UNESCO-p piukkunnartunut allattugaataaninngaanniit kulturikkut kingornussanut allattugaataaniilersinneqarnissaanut Qeqqata Kommuniata suliniuteqarnini annertusivaa. 2016-imi septembarip qaammataani UNESCO-mut qinnuteqassallutik naatsorsuutigaat, tassanngaanniillu UNESCO-p qinnuteqaat suliarissallugu. Neriuppunga 2018-ip aallartinnerani Qeqqata Kommuniani UNESCO nunarsuarmioqatigiinnut kulturikkut kingornussassanngortitsisimanerput nalliuttorsiutigisinnaassallutigut, Hermann Berthelsen naggasiivoq.