Qeqqata Kommuniani inuusuttut ornittagaat siusinnerusukkut matusalissapput

Qeqqata Kommuniata kommunimi inuusuttut ornittagaataanni ammarsarfiit, aggustip aallaqqaataani allanngussapput. Meeqqat inuusuttullu aqagumut atuartussanut inuusuttut ornittagaat nal. 23.00 matusaraluartut, nal. 21.45 matusalissapput. Atuartuutigut qasuersimallutik atuariartortassappata allannguisariaqarpugut, taama oqarpoq Qeqqata Kommuniani Ilinniartitaanermut, Kulturimut Sunngiffimmullu ataatsimiititaliap siulittaasua Evelyn Frederiksen.
30. juli 2015

”Inuusuttut ornittagaasa kingusissukkut matusarnerisigut, angajoqqaat qitornami kingusippallaanngitsukkut innartarnissaat qulakkeerumanaatsittarpaat, soorluttaaq atuartut qasuersimanatik atuariartortartut. Meeqqat atuarnerannut isiginnittaaserput inuiaqatigiittut allanngortittariaqarparput, uagullu kommunalbestyrelsitut siuttuulluta angajoqqaanut pitsaasumik atugassaqartitsisariaqarluta”, taama Ilinniartitaanermut, Kulturimut Sunngiffimmullu ataatsimiititaliap siulittaasua oqarpoq.

”Inuusuttut ornittagaasa kingusissukkut matusarnerisigut, angajoqqaat qitornami kingusippallaanngitsukkut innartarnissaat qulakkeerumanaatsittarpaat, soorluttaaq atuartut qasuersimanatik atuariartortartut. Meeqqat atuarnerannut isiginnittaaserput inuiaqatigiittut allanngortittariaqarparput, uagullu kommunalbestyrelsitut siuttuulluta angajoqqaanut pitsaasumik atugassaqartitsisariaqarluta”, taama Ilinniartitaanermut, Kulturimut Sunngiffimmullu ataatsimiititaliap siulittaasua oqarpoq.

Nunanut eqqaamiorisatsinnut Nunavut-mut Island-imullu nallersuussigutta, Kalaallit Nunaannullu sanilliullugu nunani taakkunani inuusuttut ornittagaat taamak kingusitsigisumik matuneq ajorput.

”Nunami issittumi aasaanerani seqineq kaaviinnartarmat, imaanngilaq meerartatta pigaartittarnissaat taamaattussaannartut isigissagipput. Inuutissarsiorfinnit aamma tusartarparput, inuusuttut ilaat piffissaq eqqorlugu suliartortarnissaminnik ajornartorsiuteqartartut, taamaalillutillu nalinginnaasumik suliffimmik paarsiuminaatsitsisarlutik. Meerartatta ilinniarluarsimallutik inuutissarsiornissaminni aallartilluarnissaat inuiaqatigiinnut pingaarnerpaavoq, tamannalu pigaartarnermut kommunillu meeqqanut inuusuttunullu neqeroorutaasa kingusissukkut matusarnerinut naapertuutigani”, taama Evelyn Frederiksen naggasiivoq.

2020-mi issittumi inuiaqatigiit atuilluartuunissaanni, Qeqqata Kommunia siuttuunissaminik takorluugaqarpoq. Atuilluartuuneq imartoorujussuuvoq, Qeqqata Kommunianili uagutsinnut sanilliullugu, inuiaqatigiinnut atugassarititaasut kinguaariit tullissaannut pitsaanerulersikkusuppagut. Tamanna Qeqqata Kommuniani anguniarlugu, siammasissumik pitsanngorsaanissatsinnik kissaateqarpugut. Tassunga ilaavoq ilinniagaqarluarnissaq, misissuinerillu takutippaat meeqqat inuusuttullu qasuerluarsimallutik ilikkagaqarluarsinnaanerusartut.

Annertunerusumik paasissutissat:

Kommunimi pisortaanerup tullersortaa

Evelyn Frederiksen

Mobil: (+299) 525955