Maniitsumi Inuusuttut ornittagaat nutaaq pisortatigoortumik atoqqaartinneqalersoq


Maniitsumi inuusuttut ornittagaat nutaaq ullumi pingasunngornermi septemberip 16-iani pisortatigoortumik atoqqaartinneqassaaq marluniit tallimat tungaanut.
16. september 2015

Inuusuttut ornittagaat augustip 31-ani ammarneqartoq inuusuttuaqqanut inuusuttunullu tamanut 14-init 21-nut ukiulinnut naatsorsuussaavoq. Tamatuma saniatigut meeqqat atuarfianni 6. klassimiit 8. Klassit tikillugit ualikkut tallimat tungaanut Inuusuttut ornittagartaavannut atuisarsinnaapput.

Inuusuttut ornittagaata saniatigut meeqqanut fritidsklubbeqarpoq, taamaammat inuusuttuaqqat inuusuttullu namminerisaminnik klubbeqalernerat Qeqqata Kommunianit nuannaarutigineqarpoq.

Ilinniartitaanermut, Kulturimut Sunngiffimmullu ataatsimiititaliap siulittaasua Evelyn Frederiksen oqaaseqarpoq: ”Inuusuttut inuusuttuaqqallu pilluaqquagut nutaarsuarmik sunngiffissimminni ornittagartaarmata. Ukiorpassuarni klubbitoqannguaq meeqqanut inuusuttunullu atorluarsimaqisoq maanna qujanavissumik aappaqalerpoq.”

Ilinniartitaanermut, Kulturimut Sunngiffimmullu ataatsimiititaliap siulittaasua klubrådimut isumalluarpoq inuusuttuaqqat inuusuttullu ornittagartik paarilluarlugu akisussaassuseqartumik atortalerumaaraat tatigalugu.

Evelyn Frederiksen nangippoq: ”Klubrådit sulisullu suleqatigiinnerat pitsaasoq ingerlatiinnarneqarnissaa neriuutigaara, assigiinngitsunimmi sammisaqartitsisarnissaq pingaaruteqarpoq, inuusuttuulluni nutaanik isumassarsiorluni sammisassanik nassaarsiortarneq nuannersuusarpoq, pingaartumik ullumikkut nassaarsiornissamut periarfissat pitsanngorujussuarnikuupput taamaammat atorluaqqunaqaat.”

Klubrådip sulilluarnissaanik Evelyn Frederiksen naggasiinermini kissaassivoq.

Inuusuttut ornittagaat pisortarivaa Anga Bech.


Maniitsumi Inuusuttut ornittagaat nutaaq pingasunngornermi septemberip 16-iani pisortatigoortumik atoqqaartinneqassaaq.

Annertunerusumik paasisaqarusukkuit attavigiuk

Evelyn Frederiksen
Ilinniartitaanermut, Kulturimut Sunngiffimmullu ataatsimiititaliap siulittaasua
Qeqqata Kommunia

Mobil: (+299) 52 59 55