Sumiiffinni nunagisatsinnik ataqqinnittuuvugut


Naluneqanngitsutut ”Naligiimmik siunissaqarneq” marlunngormat saqqummiupparput. Tusagassiutit oqallittarfiini, politikerit akornanni kiisalu sinerissami najugaqarfinni ilimanartumik annertuumik oqallinnermik saqqummiussaq pilersitsivoq. Taamatut suliaqarnitsinnik arlaqartunit assigiinngitsutigut pasillerpaatigut.
Borgmesterit Jørgen Wæver Johansen, Hermann Berthelsen aamma Ole Dorph-imit
23. februar 2016

Pasilliut ataaseq nassuerutigissavarput. Sumiiffinni nunagisatsinnik ataqqinnittuuvugut. Aap, sapinngisarput tamaat kommunivut ingerlalluarnissaat sulissutigaagut. Kommunitsinni borgmesteritut tamanna suliassaraarput. Kommune Kujallermi, Qeqqata Kommuniani Qaasuitsup Kommunianilu sumiiffinni nunagisatsinnik ataqqinnittuunngikkutta, innuttaasutta iluarinavianngilaat.

Sumiiffinni nunagisatsinnik kisitta ataqqinnittuugunanngilagut, ilimagaarput amerlanerit taamatut misigisut. Nunarsuarmi nunagisamilu immikkoortuni najugarisap pitsaanerpaatut ineriartortitsisariarfiuneranillu isiginnittarneq arlaatigut nalinginnaasuuvoq.

Illoqarfiit pingaarnersaani sumiiffinni nunagisaminnik ataqqinninneq?
Illoqarfiit pingaarnersaani sumiiffinni nunagisaminnik aamma ataqqinnittoqartoq isumaqarpugut. Illoqarfeqarput arlaqartunik periarfissanik ineriartortinneqarnissaanik piukkunnaatilinnik peqarputtaaq. Tamanna nalinginnaasuuvoq.

Illoqarfiulli ataasiinnaap innuttaasuisa nuna ineriartortissagunikku unamminartuuvoq. Taamaattoqartillugu sumiiffinni nunagisamik ataqqinninneq pingaarnerulersinneqarsinnaavoq. Ajoraluartumik illoqarfiit pingaarnersatsinni taamaattoqarsimanissaa ilimagaarput, tamanna tunngavigalugu Kalaallit Nunaanni pisortaqarfinni naligiisitsinissaq pisariaqarpoq.

Sumiiffinni nunagisamik ataqqinninneq Namminersorlutik Oqartussat aalajangiisarneranut sunniuteqarpa

  • Assartuussineq pillugu Isumalioqatigiissitaq Danmarkimit Nuummiillu kisimi inuttaqartoq, Nuummi nutaamik umiarsualiortoqarnissamik kiisalu nutaamik mittarfeqarfiliornissamik annertunerusumik sammisaqarnera nalaatsorneriinnaasorinngilarput.
  • Arktisk Kommando Kangilinnguanit nuuttussanngormat, Namminersorlutik Oqartussat suleqatigiissitai Nuummut nuutsitsinissamik taakkartuinerat nalaatsornerinnaasorinngilarput.
  • Kalaallit Nunaanni parnaarussivimmik matoqqasumik sanaartortoqartussanngornera pillugu, Danmarkimit Nuummiillu inuttaqartumit suleqatigiissitamit Nuummut inissiinissaq taakkartormassuk nalaatsornerinnaasorinngilarput.
  • INI-mi siulittaasuusartut amerlanersaat Nuummit najugaqartuusunit, INI-p pisortaaneranik Nuummut nuutsinniarnera pillugu aalajangiisoqarneq nalaatsornerinnaasorinngilarput.
  • Oqaatsinik pikkorissarfiup siulittaasuusartut amerlanersaat Nuummit najugaqartuusunit, nutserisunngorniarluni ilinniarfiup Nuummut nuutsinniarnera pillugu aalajangiisoqarneq nalaatsornerinnaasorinngilarput.
  • Namminersorlutik Oqartussat ineqarnermut allaffeqarfiata NaviAir Nuummi, Kangerlussuarmiunngitsoq, inissanik neqerooruteqarnera nalaatsornerinnaasorinngilarput.
  • Namminersorlutik Oqartussat suliffeqarfiutaat nutaat amerlanerit Nuummut inissinneqartarneri nalaatsornerinnaasorinngilarput.
  • Aningaasaqarnermut Siunnersuisoqatigiinni ilaasortaasuni 13-it Nuummi najugaqartunit, sineriammilu najugaqartunik ilaasortaqanngitsumit, nunap sinnerani assigiinngissitaarnersuarmik soqutigisaqannginnerat nalaatsornerinnaasorinngilarput.

Illoqarfiit pingaarnersaani sumiiffinni nunagisamik asanninneq patsisaasoq isumaqarpugut.

Suleqatigiinnissamut ilutsit nutaat

Sumiiffinni nunagisamik ataqqinninneq unammillerneqartariaqarpoq, suleqatigiinnissamullu ilutsit nutaat pilersinneqarlutik. Immikkoortortani siulersuisunik, siunnersuisooqatigiinnik, ataatsimiititalianik kiisalu inuiaqatigiinnut pingaaruteqarluinnartunik suleqatigiissitanik pilersitsisoqartillugu naligiinnerusumik agguataarisariaqarpugut.

Suleqatigiissitani assigiinngitsuni kommunitsinnit peqataanissatsinnut piareersimavugut, taamaalilluta Namminersorlutik Oqartussat kiisalu Kommuneqarfik Sermersooq peqatigalugit nunatsinnut pitsaanerpaamik aaqqiissutissanik nassaarsinnaassalluta. Tamanna Namminersorlutik Oqartussanut kiisalu illoqarfinni pingaarnersamut kisimi ingerlatsikkusunngilarput, akisussaaffeqarnissatsinnut piareersimavugut.

Qularinngilluinnarparpullu kommunitsinni pingasuusuni innuttaasugut, Namminersorlutik Oqartussat suliffeqarfiutaani siulittaasuunissamut, siunnersuisooqatigiinnissamut kiisalu ataatsimiititaliniinnissamut, illoqarfiit pingaarnersaani kiisalu Kommuneqarfik Sermersuumi innuttaasut assigalugit, akisussaaqataanissamut peqataanissamullu piareersimasut. Siunissami Namminersorlutik Oqartussat suiaassutsikkut naligiissitaaneq kisiat isiginagu, kisiannili siulersuisunut, siunnersuisooqatigiinnut, ataatsimiititalianut suleqatigiissitanullu ilaasortassanik toqqaaniarnerminni, nunap immikkoortuinik aamma naligiissitaanissamik isiginiartarnissaat neriuutigaarput.