Arnat futsalimik pissartanngorniunneranni ammaanermi oqalugiaat

Gideon Lyberth, borgmesterip Tullia Qeqqata Kommunia
23. april
26. april 2016

Aluukkut,
Qeqqata Kommunia sinnerlugu nuannaarutigaara nuna tamakkerlugu futsalimik pissartanngorniunnermut maani illoqarfitsinni ingerlanneqartumut atatillugu pisortatigoortumik maanna ammaanermi oqaaseqaqquneqarama.

Peqataasut, isiginnaartut, dommerit – Maniitsumut tamassi tikilluaritsi, neriuppunga maaniinnersi nuannersumik misigisaqarfigiumaarissi.
Soorlu nalunngikkipput timersuut futsal nunatsinni nutaajuvoq. Pissartanngorniunnerit siulii Ilulissani ’14-imi aammalu ’15-imi Nuummi ingerlanneqarsimapput. Taamaammat timersuutip taassuma sukkasuumik siammariartortup pingajussaanik nuna tamakkerlugu unammissutigineqarnera Maniitsumi pisinnaammat uagutsinnut assut qiimmallaataavoq.

Timersoqatigiiffiit ukioq manna perngaammik maani peqataatitaqartut, tassa KB-84 Kangaatsiaminngaaneersut aammalu A-1947 Atammimminngaaneersut, timersoqatigiiffiit taakku immikkut ittumik aamma tikilluaqqorusuppakka, pilluaritsilu pissartanngorniunnermut maanga anngussinnaagassi.
Timersuutersi futsal arsaqatigiit iligiit suleqatigiilluarnissaannik piumasaqaatitaqarpoq, pisussat nalunaraluartut taamaattoq nalunngilarput holdit iluminni suleqatigiillaqqissut tassaajumaartut ajugaaniutivinnermut anngukkumaartut.

Qularinngilara timersornerup anersaava nuannersoq atorlugu ippassarli aallartereersusi, taamaammat piumaffigissavassi timersuutersi kusanartumik nittarsaallugulusooq unamminerit pissuserissaartumik nangissagisi, taamaasillusi nuannarinnitserpassuasi, minnerunngitsumik meeqqat inuusuttuaqqallu nuannaartorinnitserpassuasi, pakatsisinnagit misigisaqartilluartarumaarassigit.

Siunissaq eqqarsaatigalugu kikkut tamaasa kajumissaarusuppakka timersuutersi nuannarisarsi pimoorullugu attatiinnaqqullugu, tassami nunanut allanut unammisartoqalereerpugut. Ukiuni makkunani kalaallit isiginiarneqaleruttorfiini ilississaaq avammut kiinnertartooqataalerassi ingerlalluarnissassinnik kissaappassi.
Naggataatigut timersoqatigiiffik Aqissiaq ukioq manna 45-liilluni nalliuttorsiortoq pilluaqqullugulu qujaffigerusuppara ukioq manna pissartanngorniunnermik aaqqissuussinissaq akisussaaffigerusussimammagu, Aqissiaq pilluarujussuarit, qujanarujussuarlu.

Assorsuaq nuannaarutigisarpara Maniitsumi timersoqatigiiffiit eqeersimaarlutik aaqqissuinerit taamaattut ullutsinni Maniitsumi ingerlattarmatigit, illoqarfipput kiisalu nuannaartorinnillutik isiginnaartartut meeqqat inuusuttuaqqallu eqqarsaatigalugit.

Taamatut oqaaseqarlunga nunatsinni arnat futsalimik 2016-imi pissartanngorniunnerat pisortatigoortumik ammarpara.
Qujanaq.
 

src='/-/media/Borger/Kultur og fritid/2016/Futsal/IMG_7429.ashx?h=833&w=1251&hash=000EE0A3A52C88FB5C81A564A428389880BB5F0D'

 src=
 

 src=