Maniitsumi inunnik sullissisut ilitsersuisartutut ilinniartut 28-tt naammassipput

Innarluutillit pillugit Ilisimasaqarfiup Siunnersuisarfiutigisup - IPIS-ip – aaqqissugaanik ilitsersuisartunik ilinniartitsineq, ukiuni pingasuni immikkoortukkaarilluni ingerlanneqartoq 15. september 2016 inunnit 30-nit tamarmik Maniitsumi najugaqartunik naammassineqarpoq.
20. september 2016

Ilinniakkap siunertaraa pingaartumik meeqqat inuusuttullu immikkut ikiorsertariaqartutut ilimagineqartut ilaqutaasalu piaartumik sullinneqalernissaat anguniarlugu, sulisunik ulluinnarni meeqqanik, inuusuttunik angajoqqaanillu toqqaannartumik sullissisartunik ilitsersuinermik ilinniartitsinissaq, tamatumani sulisunik allanik ilitsersuisinnaanissaq aammattaaq siunertaralugu.

Ukiut pingasut ingerlaneranni ilinniartut sullissatik aallaavigalugit sulinerminni sakkussaminnik assigiinngitsorpassuarnik ilinniartinneqarput, namminneq ulluinnarisaminni toqqaannartumik atorsinnaasaminnik, taamaalillunilu immikkut ilisimasallit naliliinissaat – ilaanni ukiuni arlalinni utaqqineqartartoq – utaqqeqqaanngikkaluarlugu suliniutit ilaqutariinnillu ikorfartuiniutit aallartinneqarsinnaallutik.

Taamaalilluni aamma ilinniarnermut ilaatiinnarlugu meeqqat, inuusuttut angajoqqaallu arlalippassuit aaqqissuussamik tunngavilersorluakkamillu sullinneqalereerput.
Ilinniakkamut peqataasut ilaat, Maniitsumi perorsaanermut siunnersorti Sara Ropsing Heilmann oqarpoq: ”Isumaqarpunga najukkami meeqqanik, inuusuttunik angajoqqaanillu toqqaannartumik ulluinnarni sullissisartut ilinniartinneqarnerat, sakkussaminnillu tigussaasunik tuniorarneqarlutillu atuisinnaalernerat tassaasoq ilinniartitsisarnerit sunniuteqarluarnerpaat ilaat.”

Nangillunilu: ”Inunnik pineqartunik toqqaannartumik ulluinnarni sullissisuusut, sulinerminni sullissaminnullu tunngatillugu pisariaqartitaat aallaavigalugit ilinniartitsineq, pikkorissarnernut qitiusumi sivikitsumik ingerlanneqartartunut naleqqiullugu naleqarneroqaaq, neriuppungalu ilinniartitsineq nunatta sinneranut siammaanneqarumaartoq, qularutiginnginnakku annertuumik iluaqutaassasoq.”

Annertunerusumik paasiniaaffissaq:

Sara Rosing Heilmann
Perorsaanermut siunnersorti
sahr@qeqqata.gl