Umimmaat tuttullu pillugit Qeqqata Kommuniani Kangerlussuarmi 22.-ni 23.-nilu oktober 2016-imi isumasioqatigiinneq.

25. oktober 2016

Qeqqata Kommuniani Pisuussutit Uumassusillit pillugit Ataatsimiititaliap aaqqissugaanik Kangerlussuarmi ulluni 22. aamma 23. oktober 2016 umimmannik tuttunillu piniartut, takornarialerisut, sunngiffimmi piniartut, Piniarnermik Naalakkersuisoqarfiup, Pinngortitaleriffiup, piniarnermik nakkutilliisut katillugit inuit 32 peqataaffigisaannik isumasioqatigiinneq ingerlaneqarpoq.

Umimmannik tuttunillu 2010-imili kisitsisoqarpoq, taamaattumik ullumikkut umimmaqassuseq tuttoqassuserlu qanoq annertutiginersoq ilisimaneqarani.
Piniartut takornarialerisut allallu atuisut isumaqarput eqqortumik pisassiisoqassappat uumasoqassuseq qanoq annertutiginersoq paasineqartariaqartoq. Taamaattumik isumasioqatigiit Namminersorlutik Oqartussanut piumasaraat, umimmannik tuttunillu kisitsisoqarnissaanut piaartumik aningaasaliisariaqartut.

Nakkutigineqaratik unioqqutitsinerit annertuut, soorlu nunaminertani piniariarfigineqaqqusaanngitsuni piniartarneq aammalu qamutinik motorilinnik angallavigeqqusaanngitsuni angallanneq annertuumik ingerlanneqartoq isumasioqatigiinnermi saqqummiuneqarput. Takornariaqarneq eqqarsaatigalugu nunanit allanit Kangerlussuarmut tikillutik takornariartitsisartut annerusumik aqutamik nakkutigineqanngitsut aamma eqqaaneqarput.

Taamaattumik isumasioqatigiit piumasaraat, aasaanerani piniarnermik takornariaqarnermillu nakkutilliisut Kangerlussuarmiillutik minnerpaamik marluusariaqartut.

Ilisimaneqaraluttuinnarpoq nunatsinni tamani asimi eqqakkanik qimaannagarpassuaqartoq. Isumasioqatigiit kaammattuutigaat, atuisut tamarmik eqqagassaatitik angerlaattassagaat. Asimi eqqakkat pillugit qaammarsaaneq annertooq ingerlanneqartariaqarpoq.

Inuussutissarsiornikkut ineriartortinneqarsinnaasunik, nunatta sinnerani assigineqanngitsumik Kangerlussuup nunataa annertuumik periarfissaqarpoq. Taamaammat Kangerlussuaq inuussutissarsiornikkut inerisaanissamik suli periarfissagissaarpoq. Kangerlussuarmili umiarsualivik nutaaq pilersinneqarpat, tamanna mittarfissuarmut annerusumik suli sunniuteqarluarnerulissaaq. Taamaattoqarpat Kangerlussuaq inuutissarsiutitigut periarfissagissaarluarnermigut, nunatta sinnerata aningaasaqarneranut suli sunniuteqarluarsinnaalissaaq.

 

Inussiarnersumik inuulluaqqusillunga 

Marius Olsen
Siulittaasoq
Pisuussutit Uumassusillit pillugit Ataatsimiititaliaq
Mobil: 527872­