Nerisassat peqqinnartut akikitsut

Maniitsumi kalaalimineerniarfimmi aqutsisup kalaalimineerniarfimmi ulluinnarni atukkatik pillugit allaaserisaqarpoq.
10. november 2016

Allattoq: Albricht T. Skifte, Maniitsumi Kalaalimineerniarfiup pisortaa 

 

Albricht T. Skifte talerpimmi. 

Kalaalimineerniarfitoqaq qulisaannaavoq. Isaterneqarnerata kingorna illutaa ullumikkumut atasoq 1995-imi sananeqarpoq. 2014-imi nutarterneqarpoq. Maanna sulisut pingasuuvugut. Nalliuttut eqqaassanngikkaanni ulluinnarni ammasarpugut arfineq pingasuniit tallimat qeqqata tungaanut, taavalu akunnerup naanerani qulingiluaniit pingasut qeqqata tungaanut.

Qanga Maniitsoq inoqarluarallarmat ilaanni inunnik pisiniartunik ulikkaavittaraluartoq maanna inuit akuttortinnikuupput. Siullertigut ukiumut 2 mio. kr. sinnerlugit kaaviiaartittarnikuuagut, Ukioq mannamut, tassa okt. 27-at tikillugu, isertissimavagut 1.622.904,00 kr., ukioq 2015 tamaat 1.801.387,00 kr.
Taamatut ingerlaannassagutta siorna ukioq naallugu isertitat angussavagut, takusinnaavarput piniartortagut aalisartortagullu eqeersimaartuusut, naak tunitsiviit

Maniitsumiinnaq Royal Greenland A/S, Lilleholm ApS, Maniitsoq Fish tunitsivinngoraluartut, taamaattoq tuniniakkatta akii qaffannaveersaaqqavagut.
Sinerissami kalaalimineerniarfinnut allanut naleqqiulluta ingerlalluartutut oqaatigisariaqarunarpugut. Maannakkorpiaq kapisillit, qeeqqat, saarulliit, tuttut neqaat, puisit neqaat, arferit neqaat mattaallu ingerlanneruagut.

 

Suli siuarsaarusuppugut

Maani nakooqutigaarput Maniitsup eqqaatalu piniagassarissusia, imarmiutanik nunamiutanillu. Ukioq kaajallallugu aalisartut piniartullu pisaannik assigiinngitsunik pilersorneqartaratta nunguutsineq ajupajaartarpugut.

Kalaalimineerniarfimmi sukkut atortutigut pitsanngorsaasinnaanersugut umiatsiaararsortullu ilaanni eqqartortarparput. Tamakku kingunerisa ilagaat qerititsiveqalernikuugatta uulliassanik poortoriikkanik piariikkanik imaqartumik. Soorlu puisit orsui maanna qeritittalernikuuagut.

 

Nillataartitsivimmik ilanissaa aamma eqqaamisaarnikuuarput, soorlu inuusunnerumaanut illinnarsakkanik piuminartunillu imaqartarsinnaasoq.
Maniitsup Tusaataa piugallarmat ullut tamaasa suuteqarnitsinnik tusarliisarnikuuvugut, inuit taamaasillutik malinnaasaramik. Tusaat matummat sianertartut ikilerujussuarput. Nalunngilarput Sisimiuni kalaalimineerniarfik facebook-ikkut malinnaatitsisartoq.