Qeqqata Kommuniani 2017-imut missingersuutissat politikkikkut isumaqatigineqartut

8. november 2016

Qeqqata Kommuniani ineriartortitsinissami aningaasaqarnikkut killiliussassat politikkikkut isumaqatigiissutigineqarput. 2017-imut missingersuutissat, 2020-lu tikillugu missiliuuteqarfiusussat, kommunalbestyrelsip tamarmiusup 2016-imi oktobarip 27-ani akuersissutigaat. Qeqqata Kommuniani politikkikkut ineriartortitsinissaq pillugu kinguneqarluartussamik suleqatigiilluarnitsinnut kommunalbestyrelsimi ilaasortat tamaasa borgmesterisut qutsavigerusuppakka, taamak Hermann Berthelsen oqarpoq.

Immikkut tulleriiaarinerit, missingersuutissatullu siunnersuutit akuersissutigineqartut
Illoqarfinni nunaqarfinnilu sanaartortitsinissami ineriartortitsinissamilu anguniagalimmik suliniutit arlaqartut kommunalbestyrelsip akuersissutigai, suliniutitigullu taakkunuunatigut Qeqqata Kommuniani annertuumik suliffissaqartitsiniarnerup, suliffissaaleqisullu appasittut attatiinnarneqarnissaat kissaatigalugu. Kommunalbestyrelsip missingersuusiornerminut atatillugu kommunip 2020-mi atuilluartuunissaminik anguniagaa aallaavigaa.

Illuutinik aserfallatsaaliuinerit
Taamatut salliutsitsinermi illuutit aserfallatsaalineqarnissaannut 13 mio. koruunit immikkoortinneqarput, taakkulu nukissiuutinik annikinnerusumik atuinissamik, ullutsinnullu naleqqunik illuuteqalerluni illut iluini silaannaap pitsaanerulersinneqarnerisigut atugassarititaasut pitsanngorsarneqarnissaannik kinguneqartitsissapput, soorlu tamanna kommunip atuilluartuunissaminik periusissiamigut anguniagarigaa.

Pillorissaasut
Maniitsumi Sisimiunilu Utoqqaat Angerlarsimaffiini pillorissaasunik atorfinitsitsisoqarnissaa Qeqqata Kommuniani kommunalbestyrelsip pingaartitaraa. Taamaalilluni utoqqarnut tunngatillugu atuilluartuunissamik Qeqqata Kommuniata annerusumik pingaartitsilerpoq. Pillorissaasoqarnikkut pinaveersaartitsinikkut Qeqqata Kommuniata neriuutigaa, utoqqaat nuannaarlutik piumassuseqarluarlutik nammineersinnaassuseqarlutillu inoorusussuseqassasut. Tamanna inuunermi pitsaasumik atugassaqartitsinerussaaq.

Multisaali, ivigaaraasanik arsaattarfik, majuartaat, nipilersornermik ilinniarfik, atuakkanillu atorniartarfik
Siullermik Sarfannguani, kingusinnerusukkullu Itillimi multisaaliliortorqarnissaanut, Maniitsumi majuartaatissamut, Maniitsumi Sisimiunilu arsaattarfinnut ivigaaralersukkanut, Sisimiuni nipilersornermik ilinniarfissamut, atuakkanillu atorniartarfissamut aningaasanik aamma immikkoortitsisoqarpoq, taamaaliornikkut Qeqqata Kommuniani innuttaasunut tamanut sunngiffimmi sammisassatigut periarfissaqartitsinissaq qulakkeerniarlugu. Atuilluartumik inuuneqarnissami peqqinneq atugarissaarnerlu tunngaviusumik pingaaruteqarput, taamaattumillu peqqissutsikkut atugarissaarnikkullu atugassarititaasunik innuttaasunut tamanut pitsanngorsaanissaminik Qeqqata Kommunia suliniuteqarpoq.

-Atuilluartuunissaminik suliniuteqarnitsigut ataqatigiissumik, tamat isiginnissuteqartumilli ilinniartitaanikkut atugassaqartitseqataanerput, isumaginninnikkut inooqataanikkut ineriartortitseqataanerput, avatangiisinullu sunniutaasinnaasunik appariartortitseqataanerput naammagisimaarpakka. Tamanna 2017-imut missingersuutissanik akuersissuteqarnitsigut anguniarpasipparput.

Aningaasatigut atuilluartuuneq
Kommunalbestyrelsi missingersuusiornermini isertitat aningaasartuutillu oqimaaqatigiissillugit aningaasaqarnikkut akisussaassusilimmik mianersortumillu missingersuusiorpoq, soorluttaaq kommunimi akileraarut allanngortinnianngikkaa. -Akileraarutip allanngortinnginneqarneratigut, kommunillu aningaasaqarnerata oqimaaqatigiissinnera tamanut aallaavissaqqissoq upperaarput, taamak Hermann Berthelsen oqarpoq.
2017-imit 2020 tikillugu ingerlatsinermi aningaasartuutissatut missingersuutigut agguaqatigiissillugit 623 mio. koruunit missaanniipput, 2017-imiillu 2020 tikillugu sanaartortitsinissamut missingersuutit agguaqatigiissillugit ukiumut 83 mio. koruuniullutik. 2017-imit 2020 tikillugu isertitassagut agguaqatigiissillugit 707 mio. koruuninik missingersuusiorneqarput, taamaattumillu Qeqqata Kommuniani aningaasaqarneq isumalluarfigaara, Hermann Berthelsen oqarpoq.

Qeqqata Kommuniani innuttaasunut tamanut assigiimmik ineriartortitsinissami naapertuuttunngorsaaneq.
Qeqqata Kommuniani kommunalbestyrelsi kommunimi innuttaasunut tamanut, nunaqarfinni arfinilinni, Maniitsumi Sisimiunilu najugaqaraluaraannilunniit, assigiimmik ineriartortitsinissamik anguniagaqarpoq. Nunaqarfinni innuttaasumut ataatsimut aningaasaliissutit, Maniitsumi Sisimiunilu innuttaasumut ataatsimut aningaasaliissutit assigaat.

Paasissutissat sukumiinerusut
Claus Espersen Aningaasaqarnermut pisortaq, Qeqqata Kommunia
Dir (+299) 86 73 12 clesqeqqata.gl