Qeqqata Kommuniani Ukiumi suleqatitsialak

Pisarneq malillugu Qeqqata Kommuniani ukioq 2016 Ukiumi suleqatitsialannik toqqaasoqarpoq.
Ukiumi sulisutsialannik toqqaasoqaraangat Kommunip qitiusumik allaffissuini suleqat ataaseq aammalu suleqat ataaseq assigiinngitsuni kommunip suliffeqarfiiniittuni assersuutigalugu atuarfiit, meeqqeriviit allallu suliffiit Qeqqata Kommiuniata ataaniittuni toqqarneqartarpoq.
22. december 2016

Ukioq manna Ukiumi suleqatitsialaat tamarmik Sisimiuninngaanneerput.

Qitiusumik allaffissuaniit Ukiumi suleqatitsialak toqqarneqartoq tassaavoq: Katrine Jensen, ukiorpassuarni naatsorsuuserisarfimmi suleqat.



Katrine Jensen ullut tamarluinnaasa suliartortarpoq, piffissarlu eqqorlugu sulliartortuaannaavissuuvoq. Katerittarnerit nuannarai sunullu tamanut ikiuuttarpoq kajummissaariuartarlunilu. Katrine-p suliani pisariinnerusumik ingerlanneqarnissaannik ujartuiuartuuvoq. Suliassanilu ulloq naatinnagu naammassillugit suliarerusuttartuullugit.

Qitiusumik allaffissuup avataani suleqatitsialanngorpoq Nalunnguarfiup Atuarfiani ukiorpassuarni allaffimmiuulluni tassalu Helena Barselajsen.

Helena Barselajsen suliffimminut tunniusimalluartuuvoq, ukiunilu kingullerni pisortat taarseraanneranni suliffimmi sulisut atugaannik pitsaasutsimik ataavartitsisuulluni.

Ullormi suliffimmi qitiusutut inissisimasarpoq, ilinniartitsisut angajoqqaat atuartullu ullormut saaffiginnissuterpassui aporfeqarani pitsaasumik kiinnerfigisarpai.
Qanorluunniit ulapitsigigaluaruni tunniussimalluartuuvoq saaffikkuminarlunilu. Ukiorpassuarmilu taamatut aalajaalluni sulilluartuuvoq.

Pisortaqatigiit Ukiumi suleqatitsialammik toqqaanissaminnut toqqammavissanik sisamanik aallaaveqartarput. Taakkulu ukuupput:

* Suliffimmi pitsaasumik atugassaqartitsineq
* Ataqatigiissitsisinnaassuseq
* Ikiuisinnaassuseq kajumissaarisinnaassuserlu
* Aalajaatsumik suleqataassusilik