2017-imut missingersuutit, ukiunullu 2018-imit 2020-imut missiliuutit Qeqqata Kommunalbestyrelsiata akuersissutigai.

Qeqqata Kommuniani 2017-imut missingersuutissat politikkikkut isumaqatigiissutigineqartut
Qeqqata Kommuniani ineriartortitsinissami aningaasaqarnikkut killiliussassat politikkikkut isumaqatigiissutigineqarput. 2017-imut missingersuutissat, 2020-lu tikillugu missiliuuteqarfiusussat, kommunalbestyrelsip tamarmiusup 2016-imi oktobarip 27-ani akuersissutigai. Qeqqata Kommuniani politikkikkut ineriartortitsinissaq suleqatigiissutigilluarneqarpoq.
14. december 2016
Immikkut tulleriiaarinerit, missingersuutissatullu siunnersuutit akuersissutigineqartut
Illoqarfinni nunaqarfinnilu sanaartortitsinissami ineriartortitsinissamilu anguniagalimmik suliniutit arlaqartut kommunalbestyrelsip akuersissutigai, suliniutitigullu taakkunuunatigut Qeqqata Kommuniani annertuumik suliffissaqartitsiniarnerup, suliffissaaleqisullu appasittut attatiinnarneqarnissaat kissaatigalugu. Kommunalbestyrelsip missingersuusiornerminut atatillugu kommunip 2020-mi atuilluartuunissaminik anguniagaa aallaavigaa.

Aningaasatigut atuilluartuuneq
Kommunalbestyrelsi missingersuusiornermini isertitat aningaasartuutillu oqimaaqatigiissillugit aningaasaqarnikkut akisussaassusilimmik mianersortumillu missingersuusiorpoq, soorluttaaq kommunimi akileraarut allanngortinnianngikkaa. Akileraarutip allanngortinneqannginnera kiisalu kommunip aningaasaqarnerata oqimaaqatigiinnera tamanut aallaavissaqqippoq.
2017-imit 2020 tikillugu ingerlatsinermi aningaasartuutissatut missingersuutitigut agguaqatigiissillugit 625 mio. koruunit missaanniipput, 2017-imiillu 2020 tikillugu sanaartortitsinissamut missingersuutit agguaqatigiissillugit ukiumut 83 mio. koruuniullutik. 2017-imiit 2020 tikillugu aningaasartuutissat agguaqatigiissillugu 708 mio. koruuniussapput. 2017-imit 2020 tikillugu isertitassatut missingersuutit agguaqatigiissillugit 707 mio. koruuniupput.

Immikkut tulleriiaarinerit, missingersuutissatullu siunnersuutit akuersissutigineqartut

Illoqarfinni nunaqarfinnilu sanaartortitsinissami ineriartortitsinissamilu anguniagalimmik suliniutit arlaqartut kommunalbestyrelsip akuersissutigai, suliniutitigullu taakkunuunatigut Qeqqata Kommuniani annertuumik suliffissaqartitsiniarnerup, suliffissaaleqisullu appasittut attatiinnarneqarnissaat kissaatigalugu.
Kommunalbestyrelsip missingersuusiornerminut atatillugu kommunip 2020-mi atuilluartuunissaminik anguniagaa aallaavigaa.

Pillorissaasut

Maniitsumi Sisimiunilu Utoqqaat Angerlarsimaffiini pillorissaasunik atorfinitsitsisoqarnissaa Qeqqata Kommuniani kommunalbestyrelsip pingaartitaraa. Taamaalilluni utoqqarnut tunngatillugu atuilluartuunissamik Qeqqata Kommuniata annerusumik pingaartitsilerpoq. Pillorissaasoqarnikkut pinaveersaartitsinikkut Qeqqata Kommuniata neriuutigaa, utoqqaat nuannaarlutik piumassuseqarluarlutik nammineersinnaassuseqarlutillu inoorusussuseqassasut. Tamanna inuunermi pitsaasumik atugassaqartitsinerussaaq.

Multisaali, ivigaaraasanik arsaattarfik, majuartaat, nipilersornermik ilinniarfik, atuakkanillu atorniartarfik
Siullermik Sarfannguani, kingusinnerusukkullu Itillimi multisaaliliortorqarnissaanut, Maniitsumi majuartaatissamut, Maniitsumi Sisimiunilu arsaattarfinnut ivigaaraasalersukkanut kiisalu Sisimiuni nipilersornermik ilinniarfissamut, atuakkanillu atorniartarfissamut aningaasanik aamma immikkoortitsisoqarpoq, taamaaliornikkut Qeqqata Kommuniani innuttaasunut tamanut sunngiffimmi sammisassatigut periarfissaqartitsinissaq qulakkeerniarlugu. Atuilluartumik inuuneqarnissami peqqinneq atugarissaarnerlu tunngaviusumik pingaaruteqarput, taamaattumillu peqqissutsikkut atugarissaarnikkullu atugassarititaasunik innuttaasunut tamanut pitsanngorsaanissaminik Qeqqata Kommunia suliniuteqarpoq.

Illuutinik aserfallatsaaliuinerit
Taamatut salliutsitsinermi illuutit aserfallatsaalineqarnissaannut 13 mio. koruunit immikkoortinneqarput, taakkulu nukissiuutinik annikinnerusumik atuinissamik, ullutsinnullu naleqquttunik illuuteqalerluni illut iluini silaannaap pitsaanerulersinneqarnerisigut atugassarititaasut pitsanngorsarneqarnissaannik kinguneqartitsissapput, soorlu tamanna kommunip atuilluartuunissaminik periusissiamigut anguniagarigaa.

Qeqqata Kommuniani innuttaasunut tamanut assigiimmik ineriartortitsinissami naapertuuttunngorsaaneq
Qeqqata Kommuniani kommunalbestyrelsi kommunimi innuttaasunut tamanut, nunaqarfinni arfinilinni, Maniitsumi Sisimiunilu najugaqaraluaraanniluunniit, assigiimmik ineriartortitsinissamik anguniagaqarpoq.

Nunaqarfinni innuttaasumut ataatsimut aningaasaliissutit, Maniitsumi Sisimiunilu innuttaasumut ataatsimut aningaasaliissutit assigaat.
Kommunimi innuttaasunut nuannaarutissiillutik nutaanik suliassaqarluni ukioq nutaaq pissanganartoq Kommunalbestyrelsip qilanaaraa.

2017-IMUT MISSINGERSUUTIT