Piniartumik aalisartumillu nersornaasiineq ataqqinaasiinerlu

2016-imi ataasinngorneq decembarip 12-iani Qeqqata Kommunia innuttaasunut, Sisimiuni Maniitsumilu nersornaasiillunilu ataqqinaasiivoq.

Ukiut tamaasa Qeqqata Kommunia innuttaasuminut allagartamik aningaasanillu tunniussilluni nersornaasiisarpoq ataqqinaasiillunilu. Qeqqata Kommuniani eqiasuillutik, aallartitisarlutik immikkullu nersugassamik iliuuseqartunut nersornaat (Sisimiut) ataqqinaallu (Maniitsoq) tunniunneqartarpoq. Nersornaasigassat ataqqinaasiassallu amerlassusiat kiisalu aningaasat annertussusissaat kommunalbestyrelsimit aalajangerneqartarput.
14. december 2016
Ukioq manna nersornaasiussaq tunniunneqarpoq uunga, Adam Dahl inunngortoq 21. maj 1941 Itillimi.
Adam Dahl meerannguullunili angajoqqaaveruppoq taamaattumillu aanamini aataminillu alliartorpoq perorsarneqarlunilu.
Aataatalu perorsarpaa aalisartussatut piniartussatullu.
Adam Dahl 14-inik ukioqarluni Sisimiunut nuuppoq, taassumalu kingorna aalisartorsuit inuttaaffigisalerlugit aalisarnermut ilisimasai annertoorujussuanngorput.
Sisimiuni nunatsinnilumi raajarniutit pileruttorneranni illoqarfitsinni 1960-ikkunni 42 fodsimik raajarniuteqalerpoq.
Adam Dahl aalisarnermi saniatigut assigiinngitsunik suliaqartarpoq. Soorlu Sisimiuni Aalisartut Piniartullu Peqatigiiffianni ukiorpassuarni ingerlatseqataavoq, KNAPK-mi siulersuisuni ilaasortaasarsimavoq aammalu siulittaasutut sulisimalluni aamma piginneqatigiiffik SIPENEQ siulittaasuuffigisimavaa, Knud Rasmussenip Højskoliani siulittaasutut ilaasortaasimalluni, Sisimiut Kommunalbestyrelsiannut qinigaanermigut borgmesterimut tullersortaasimavoq.

Ukioq manna ataqqinaasiussaq tunniunneqarpoq uunga, Johannes Rosing, Ujo, inunngortoq 19. februar 1941

Ujo aalisartuunermi piniartuunermilu saniatigut Maniitsumi Aalisartut Piniartullu Peqatigiiffianni siulersuisunut ilaajuartarsimavoq, siulittaasuusarluni Kattuffimmullu suleqataajuartarsimalluni siunnersuuteqartuartarnermigut.
Oqallinnernut assigiinngitsunut peqataalluartarsimavoq, aammali kalaalimineerniafeqalernissaanut suleqataasimalluni, minnerunngitsumilli Maniitsumi aalisakkanut fabrikkeqartuarnissaq tamaviaarutaasa ilagisimavaat ullumikkullu oqaatigineqarsinnaagunarpoq fabrikkeqarneranut nipilersoqataasoq.
Ujo ukiuni 30-ini Blå Korsinut ilaasortaasimavoq. Ujop nulianilu qitornaminnik perortitsilluarnermik saniatigut inuusuttunnguanik ikiortariaqalersimasunik paasisaqaraangamik sapinngisaminnik ikiuuttuartarsimapput. Ujo utoqqanngoraluarluni suli pinialunneq ingerlattuarpaa.
Innuttaasut, peqatigiiffiit kiisalu kattuffiit nersornaammik tunineqarnissamut piukkutaannik toqqaanissamut kommunalbestyrelsimit apersorneqartarput, innuttaasullu kommunalbestyrelsimut tunngavilersorluakkamik innersuussuteqassallutik.
Inuit ataasiakkaat nersornaaserneqartussatut imminnut siunnersuutigisinnaanngillat, kiisalu siunnersuuteqartoq nuliaminik uiminilluunniit, eqqarlerisaminik imaluunniit ningaarisaminik ukuarisaminilluunniit killormullu sakiminik aammalu soorlu soralussatut qanitsigisumik eqqarlerisaminik siunnersuutigisaqarsinnaanngilaq.