KANUKOKA-p Maniitsumi allaffeqarfia pisortatigoortumik malunnartinneqalersoq

Naluneqanngitsutut KANUKOKA-p allaffeqarfia Nuummit Maniitsumut nuunneqarsimalereerpoq.
17. februar 2017

Tassunga atatillugu Qeqqata Kommuniani borgmesterip tullia siulleq Gideon Lyberth, Maniitsoq, ima oqaaseqarpoq: ”Nuannaarutigaarput kattuffiup siulittaasua Simon Simonsen maanna Maniitsumut tikeraalermat, ataasinngorpat marlunngorpallu maani tikeraartorissallutigu.

Siulittaasup illoqarfik tikissavaa inuussutissarsiornikkut ersitsumik siuariartortoq aalisarnikkut, sanaartornikkut niuernikkullu. Qeqqata Kommuniata tungaanit pingaartipparput inoqutigiinnut tamanut sullissilluartuunissarput, mikinnerunngitsumik ilaqutariinnut meerartalinnut. Qularutiginngilarput KANUKOKA-mi atorfeqalerumaartussat Maniitsormiut pisarnerat malillugu kissalaartumik inuppalaartumillu tikilluaqqusaajumaartut.”

Ataasinngorpat Simon Simonsen suliffeqarfiit ilaannut pulaartinneqartussaavoq, ualikkullu pingasunit tallimat tungaanut kommunalbestyrelsip ataatsimiittarfiani tamanut ammasumik ilasseqatigiinnermut kommuni qaasaavoq.

Tassunga atatillugu Simon Simonsen ima oqaaseqarpoq: ”Suut tamarmik illoqarfiit pingaarnersaannut eqiterutsinniarneqaleruttorfianni nuannaarutigaara suliffinnik siammarterinermi KANUKOKA tigussaasumik iliuuseqarmat. Naasunnguaq maanna sinerissap ilaani Maniitsumi sorlanippoq. Kommunit silarsuaanni Maniitsoq qitiusumik inissisimalerpoq. KANUKOKA-mi sulisut suli tamakkinngikkaluartut siusinaanngilaq pisortatigoortumik malunnartitseqataanissarput. Qilanaarpunga ataasinngorpat marlunngorpallu Maniitsumiinnissannut.”

Pisortatigoortumik atoqqaarfissiortitsinissamut Qeqqata Kommunia aaqqissuisuuvoq. Isumaavoq Qeqqata Kommunia KANUKOKA-llu qanimut suleqatigiinnerunissaq pillugu kingusinnerusukkut isumaqatigiissusiornissaat.

Gideon Lyberth, borgmesterip tullia siulleq Mobil nr.: 52 04 52