Ilaqutariinnut klassimut pikkorissarneq

Ilaqutariinnut klassimi pikkorissarlutik peqataasut 15-iusut 2017-imi marsip qaammataani naammassipput. Pikkorissarnermi peqataasut 15-iusut Qeqqata Kommuniani atuarfinni anginerni pingasuusuni, Sisimiuni Minngortuunnguup atuarfiani aamma Nalunnguarfiup atuarfiani Maniitsumilu Atuarfik Kilaaseeqqami ilinniartitsisuupput, ilitsersuisuupput, atuarfimmi siunnersortiusuupput atuarfinnilu aqutsisuullutik. Taakku saniatigut Qeqqani Misi-mit tarnit pissusaannik ilisimasalik peqataavoq.
27. marts 2017

 

Periutsimi isumassarsiat ilagivaat, ilaqutariit ilaqutariinnut ikiuuttarnissaat, taamaalilutik angajoqqaat meeqqallu Ilaqutariinnut klassimi angajoqqaanik meeqqanillu allanik peqateqartassallutik. Periusaasoq tassaavoq, akunnerit sisamat missakkaarlugu sapatip akunneranut marloriarluni angajoqqaat meeqqami atuarfimmi sammisaannik sammeqatigisarlugit. Siunertaasoq tassaavoq, angajoqqaat, meeqqat meeqqallu ilinnartitsisua, meeqqap pitsaanerusumik atuartalernissaanut atuarfimmilu nuannaanerulernissaanut assigiinngitsutigut suleqatigiinnissaat. Anguniagaqarfiupput meeqqat, arlaannik peqquteqartumik atuarfimmi ingerlalluanngitsut.
Periuseq London-imi Marlborough Family Institut-imi pilersinneqarnikuuvoq, taanna maannakkut London-imi Anna Freud Centerimik suleqateqalernikuuvoq, tassani Peter Fonagy pisortaanerulluni.

Pikkorissarneq siulleq 2016-imi oktobarip qaammataani ulluni tallimani ingerlanneqarpoq. Pikkorissarnerullu siulliup ingerlanneqareernerata kingorna atuarfinni pingasuusuni ilaqutariinnut klassit pilersinneqarput, 2016-imi ukiaaneraniilli ingerlanikuullutik.
Pikkorissarnerup aappaa 2017-imi marsip qaammataani ulluni tallimani ingerlanneqarpoq. Pikkorissarnerup aappaata ingerlanneqarnerani pikkorissartut atuarfinnit pingasuusunit ilaqutariinnut klassinit misilittakkatik ingerlateqqippaat.

Pikkorissartut Nuummit atuartitsisumit Rita Thomsen-imit, familieterapeut-imit aammalu faglig lederiusumit Karen Lindegaard-imit kiisalu Danmark-imi atuartitsisumit perorsaanikkullu aqutsisuusumit Helge Andreassen-imit ilinniartinneqarput.