Suleriaatsinik videoliat: ilinniartitsisumiit-ilinniartitsisumut aammalu perorsaasumiit-perorsaasumut isumassarsiorfissatut suliniut nutaaq

Ukiup affaani kingullermi Qeqqata Kommuniani ilinniartitsisut perorsaasullu 20-t suleriaatsimik videolianik 50-ingajalluinnarnik suliaqarput, iPads-it atorlugit qanoq ilinniartitsisarnerminnik takutitsillutik. Suleriaatsinik videoliat tamarmik takutippaat, ilinniartitsisoq imaluunniit perorsaasut meeqqanik ulluinnarni ilinniartitsinerminnik atuisarnerat, aammalu eqqarsaatit siunnersuutillu suut allanut tunniunneqarsinnaanersut.
18. april 2017

Suleriaatsinik videoliat arlaqartut www.atuarfiit.gl-ikkut maannakkut saqqummiunneqarput, taamaalillutik ilinniartitsisut perorsaasullu sinerissamiittut isumassarsiorfigisinnaassallugit kiisalu atuarfinni meeqqerivinnilu iPads-inik atuisinnaanermut isumassarsiorfiusinnaallutik. Taamaalilluni ilinniartitsisut atuartitsinerminnik kiisalu perorsaasut ulluinnarmi sulinerminni pitsaasumik ilikkarnartumik suleriaatsit siammarterneqassapput.

2016-imi septembarimi kiisalu 2017-imi marsimi workshop-inik marlunnik, virksomheden &Learning-imit suleriaatsimik videoliornissamik sammisunik ingerlatsisoqarpoq. Nicolai Seest &Learning-imiit siusinnerusukkut Kalaallit Nunaanni aallarniinermut suliniutinut assigiinngitsunut ingerlatsinikuuvoq, aallarniiniallu tunniusimanerat piumassuseqarluarnerallu workshop-ertitsinerni malugilluarneqarsinnaasimalluni.

Ilinniartitsisut perorsaasullu marlukkaarlutik ikioqatigiillutik, iPads-it atorlugit imminnut filmiliarisarsimapput. Teknikkitaa pingaarnerusimanngilaq, suleriaatsinimmi videoliorsinnaaneq sumiluunniit ingerlanneqartussaasinnaassammat. Ilinniartitseriaatsit ingerlateqqinneqarnissaa pingaarnerpaavoq.

Qeqqata Kommuniani Sisimiuni Ilinniartitaanermut pisortaq Annga Lynge-p ilinniartitsisut perorsaasullu ammarlutik ilinniartitsissutigisartakkaminnik arlaqartunik videoliorsimanerinik pikkuginnippoq. Atuartut klassiini ilinniartitsisoq inersimasortaakkajuttuuvoq, taamaalillunilu ilinniartitsisut akunnerminni mislittakkaminnik pitsaasunik avitseqatiginninniarneq ajornakusoortarsimalluni. Uanili ilinniartitsisut takutitsipput, sassarlutik misilittakkaminnik avitseqatigiikkusullutik. Kakkaqaat siunissamullu isumalluarnaqaluni, Annga Lynge oqaluttuarpoq.

Kalaallit Nunaanni meeqqat atuarfii pillugit EVA-p naliliisarnermut nalunaarusiaa tunngavigalugu, Ilinniartitaanermut Aqutsisoqarfiup Qeqqata Kommuniatalu suliniut aallartippaat. 2015-imi Naliliisarnermut nalunaarummi atuartitsinernik filmiliat tunngavigalugit, atuartitsinermik pitsaasumik ingerlatitseqqiinissamik pisariaqartitsisoqartoq taakkartorneqarpoq.

Ilinniartitsisut perorsaasullu peqataasut, &Learning, Ilinniartitaanermut Aqutsisoqarfik kiisalu Qeqqata Kommunia neriupput, atuarfiit meeqqeriviillu suleriaatsimik videoliat ilinniartitsisut inaanni kiisalu perorsaasut akornanni ilinniartitsisut pitsaasup suuneranik oqallinnerminni aallaavittut atulerumaaraat.