Eqalunniarnissamut akuersissutit – Qeqqata Kommuniani sumiiffinni takornariartitsinermi iluatsilluartut

Qeqqata kommuniani eqaloqarfinni pingasuusuni qissattarluni eqalunniartitsinissamut akuersissutit Naalakkersuisunit nalunaarutigineqaqqammerput. Ukiup ataatsip missaa qaangiuppoq eqalunniarfinnut tallimanut akuersissutit nalunaarutigineqarmata, taamaalilluni Qeqqata Kommuniani eqalunniartarfissatut immikkoortitani 16-iusuni eqalunniarfissat arfineq-pingasuusunut akuersissutit tunniunneqalereerput.
8. maj 2017

 

Aassiliaq: Mads Pihl   

Eqalunniartarfinnut akuersissutit ukununnga tunniunneqarput

Inatsit naapertorlugu sumiiffinni inunnut suliffeqarfinnullu akuersissutit tunniunneqarput.
Ukiuni pineqartuni januaarip aallaqqaataanit eqalunniartarfiit arfineq-pingasuusut tullinnguuttunut nalunaarutigineqarput:
• Sisimiut avannaatungaani Isortoq-mi Eqalusussuit: Sirius Greenland ApS: 2017
• Itilleq-p kujataatungaani Erfalik: Sirius Greenland ApS: 2017
• Itilleq-p kujataatungaani Sassannguit: Leif Fontain: 2018
• Itilleq-p kujataatungaani Napiarissat: Sirius Greenland ApS: 2017
• Kangerlussuaq-p kangerluani Angujartorfik: World of Greenland - Arctic Circle A/S: 2017
• Napasoq-p eqqaani Kangia: Karl Davidsen: 2018
• Napasoq-p eqqaani Kangia-ta kangerluani Qoorqut: Niels Tobias Gredal: 2017
• Napasoq-p eqqaani Amitsuarssuk: Karl Davidsen: 2018

Malittarisassat atuuttut
Qeqqata Kommuniani erseqqissaassutigineqassaaq, nunatani qissattartitsilluni eqalunniartitsinermut akuersissuteqarfiusuni, innuttaasut najugaqavissut nunatamik atuinissaannut killilersuinngimmat. Innuttaasut najugaqavissut pisarnermisut eqalunniarfinni aalisarsinnaatitaapput.
Eqalunniarfinnik akuersissutinik tunniussisarnermi suliniutaasup siunertaa tassaavoq, nunarsuarmi immikkoortuni allani qissattartitsilluni aalisartitsinermik ingerlataqarfiit ilisimaneqartut assingisut pilersitsinissaq. Immikkuullarissumik misigisaqartitsinissamik kiisalu takornarissanut pitsaasumik attaveqalernissamut, ineriartornermik suliffissanillu kinguneqartumik killiliussatut atugassarititaasunik pilersitsinissamut ikiuunnissaq siunertaavoq.

Tammajuitsussarsititsiniarluni piniartitsinermut kiisalu sisorartitsinissanut akuersissutit piareersarneqartut
Kangerlussuarmi tammajuitsussarsititsiniarluni piniartitsisarnissamut akuersissutinut qinnuteqarnissamut atortut siunissami qaninnerusumi nassiussorneqarnissaat naatsorsuutigineqarpoq, taamaalillutik sumiiffinni tammajuitsussarsititsiniarlutik piniartitsisartut akuersissutinik qinnuteqarsinnaalissallutik. Tammajuitsussarsititsiniarlutik piniartitsinissamut akuersissutit 12-it nutaat ilaasa 2019-imi januaarip aallaqqaataani atuutilertussanngorlugit nalunaarutigineqarnissaat Qeqqata Kommunianit naatsorsuutigineqarpoq.
Maniitsup avannaatungaani sisorartitsilluni nunatanut assigiinngitsunut aqqaneq-marluusunut akuersissutit pillugit, kommunip pilersaarusiorfigineqarnera nutaaq maannakkut tusarniaassutigineqarpoq. Kommunip pilersaarusiorfigineqarnera taanna allannguuteqaratarsinnaanera ilanngullugu Qeqqata Kommyunalbestyrelsimit akuersissutigineqassappat, taava nunatanut akuersissutinik qinnuteqarnissamut atortut Namminersorlutik Oqartussanit suliarineqartussaassapput. Tamatumalu kingorna sisorartitsisartunut nassiunneqassallutik.
Qeqqata Kommuniani takornariaqarnermut anguniagaqartumik suliaqarneranut, takornariaqarnermut akuersissutinik suliaqarneq ilagaat. Allat oqaluinnartut, Qeqqata Kommunia iliuuseqartarpoq.


Paasissutissat sukumiinerusut

Hans Holt Poulsen
Planchef
Qeqqata Kommunia
Tlf. (+299) 70 21 00
Dir. (+299) 86 73 22
hhpo@qeqqata.gl