Qeqqata Kommunia borgmesteri peqatigalugu suliffeqanngitsunik pisutsitsineq

Kalaallit Nunaani pinngortitami kusanaqisumi unnuinertalimmik, Sisimiuni inuusuttut pisunnissamut unammillernartumut tigusilluarput, taamaalillutillu inuunermi sinnerini eqqaamasassaminnik misigisaqarlutik.
24. juli 2017

 

Qeqqata Kommuniani suliniutitut nutaatut, inuusuttunut arfineq-marluusunut borgmesteri Malik Berthelsen pisutsitseqataalu Nick Andreassen Majoriaq peqatigalugu suliniummut allaanerulluinnartumut piareersaallutillu ingerlataqarput, inuusuttut meeqqat atuarfianit naammasseqqammisuusinnaapput imaluunniit ilinniakkaminnik qanoq qaqugulu ingerlatitseqqinnissaminik suli nalornisuusinnaapput. Itinnerup eqqaani Eqalugaarniarfimmit Sisimiunut ilungersunartumik misigisaqarfiulluartumillu pisupput.

Misilittakkat takutippaat, suliffissaaleqisunut unammillernartumik ingerlatsisoqarsimatillugu, imminut tatiginninnermik piumassuseqalernermillu kinguneqartitsisartoq, taamaalillutillu ilinniaqqinnissamut imaluunniit nalinginnaasumik sulerusussuseqalernermik aallarnisaataasartoq.

Pisunnginnermi inuusuttut suliniummi aqutsisoq Naasunnguaq Heilmann peqatigalugu pisunnissamut annikitsorsiorlugu pilersaarusioqataapput. Arlaleriarlutik naatsunik pisuttarput, nalullutik nukittorsarlutillu, pinngortitami ikiueqqaarnissamik sungiusarneqarput kiisalu Kalaallit Nunaata naasuinik uumasuinillu ilinniartinneqarlutik.

Kiisami juulip 20-ani Itinnermut angalaneq aallartinneqarpoq. Inuusuttut qiimasut qilanaartullu ingerlatsisussaminnik borgmesteri Malik Berthelsenimik naapigiaapput. Pilersaarusiornermi peqataalluartuummat ilisimasarillualereersimavaat.

Pisunneq sivisullunilu ilungersunarsimavoq. Akunnerit 40-t missaat 72km. pisoreerlutik, juulip 22-ani nal. 01.45 Sisimiunut apuupput. Aasaanerani silap nalinginnaanngitsumik nillersimanera patsisaalluni, unnuilernermi allaanerusumik eqqarsarluni ataatsimoornissaq pisariaqarsimavoq. Taamaattumik arfininngornerup ullaaralaani tikittut qasusupilussuusimapput. Qaattoornerit, ippeqinerit, anniarnerit masarlukkoornerit misigisimanerinik inuusuttut oqaluttuarput, taamaattorli ingerlatamik naammassinnissimanerminik assut tulluusimaarsimallutik.

Borgmesteri Malik Berthelsen oqarpoq; isumaqarpunga peqqinnarnerusumik inuuneqalernissamut aammalu timikkut eqqarsartaatsikkullu nukittunerulernissamut pinngortitaq atorluarneqarnerusariaqartoq soorlu suliniutini imaattuni. Illoqarfik qimallugu taamatut timersortinneqarnerup pitsaaqutigivaa, maaniinnarmi tunniutiinnartoqarsinnaanngimmat. Tassami qasugaluaraanniluunniit angerlassagaanni pinngitsoorani apuuttariaqarmat. Inuusuttut peqataasut pikkoreqaat, isumaqarpungalu pisoqataaneertik tulluusimaarutigissagaat.

Inuusuttut misigisimasatik aallaavigalugit, ingerlassinnaanngisatut isigisimasaraluaminnik ingerlatsilernissaminnut merserinnikkunnaarsimanissaat neriuutaasoq. Neriuutaavoq, inuusuttut amerlanerusut misigisaqarusullutik, piginnaasaminnik "qaangiillutik" nuannersumik misigisaqarumaartut, allanut maleruutiinnanngikkaluarluni namminerisamik angorusutaqaraanni anguneqarsinnaasoq.

Kalaallit Nunaanni inuusuttut amerlasuut siunissartik pillugu suli nalornisut, borgmesterili peqatigalugu sivisuumik pisoreerlutik, inuusuttut sisimiormiut qasusut nuannaartulli siunissamut ingerlariaqqinnissaminnut alloriaqqipput - imaluunniit arlalinnik alloriaateqaqqipput.