Sulisut marluk ukiuni 40-ni nalliuttorsiorput 

Tallimanngornermi septembarip aallaqqaataani nalliuttorsiornerit marluk ingerlanneqarput
5. september 2017

Uteriitsoq, isummaminillu anitsisartoq. Karl Kristian Olsen-ip, ulluinnarni Ujuuki, ilinniartitsisutut ukiuni 40-ni nalliuttorsiorneranut atatillugu atuarfimmi pisortap, borgmesterillu ilaatigut tamak oqaatigaat, nalliuttorsiutigineqarnerani ilaquttanit, ikinngutinit suleqatinillu najorneqarpoq kiisalu tamulugassaqartitsisoqarluni.

Ujuuki ukiuni 33-ni Nalunnguarfiup Atuarfiani ilinniartitsisutut sulivoq, 1977-imilu 23-t missaanik ukioqarluni ilinniartitsisutut ilinniakkaminik naammassinnilluni.
Ujuuki siullersaalluni suliffimmut isertarpoq, tunuarsimaartuunanilu. Assersuutigalugu akissarsiat assigiinnginneri pillugit, akuerisaanngitsumik akerliussutsimik takutitseqataavoq, tamannalu pillugu akissarsiamigut ullormik ataatsimik ilanngaavigineqarluni, taama atuarfimmi pisortaq Riikki Grønvold peqataasut nuannarilluagaannik oqaluttuarpoq.

Borgmesterip Malik Berthelsen-ip Ujuuki aamma ilinniartitsisorisimavaa, oqalugiaamminilu Ujuukip timersortartut klubbiani SAK-mi kiisalu inuiaqatigiinnut sullissinissaminut piumassuseqarnera erseqqissaatigivai. Eqqaanngitsoorusunngilaalu, Ujuuki tassa ilinniartitsisuusoq atuartitsilernerani kingusinaarfigineqarusunneq ajortoq.

Sisimiut-ni kommunalbestyrelsip ataatsimiittarfiani aamma, innuttaasunut sullissivimmi immikkoortortaqarfimmi pisortaq Sara Poulsen nalliuttorsiutigineqarpoq. Sara aamma ukiuni 40-nik nalliuttorsiorpoq, ilaqutaasunit suleqatiniillu nalliuttorsiutigineqarluni.

1980-imili Sara allaffimmi assistentinut ilinniarnerminik naammassigami, pisortat suliffeqarfiini assigiinngitsuni sulisarsimavoq. Siullermik Minngortuunnguup Atuarfiani allaffimmi assistentitut sulisimavoq. 1985-imi Kulturimut Ilinniartitaanermullu ingerlatsiviani assistentitut, ukiullu marluk qaangiummata overassistentitut sulisimalluni. 1995-imi ingerlatsivimmi tassanerpiaq immikkoortortaqarfimmi pisortanngorpoq.

Sulinngiffeqarallareerluni Nanortalik-mmeereerlunilu, 2005-imi Innuttaasunik Sullissivimmi immikkoortortaqarfiimi pisortanngorpoq, ulloq mannalu tikillugu suli pisortalluni. Suliffimmi saniatigut Aalborg Kommunimi ukiup affaa atorfilittatut paarlaaqatigiikkiartorsimavoq innuttaasut sullinneqartarnerat pikkorissarfigalugu, ilikkakkanilu Sisimiut Kommuniani, maanna Qeqqata Kommunerisaani, atorluarlugit. Sarap innuttaasunik sullissinermi misilittakkani atorluarlugit ilinniartut arlallit ilinniartittarsimavai, innuttaasunillu sullissivimmi pitsanngorsaatit ineriartornerillu assigiinngitsut aqqusaarsimallugit, skrivemaskiinaniik qarasaasianut, innuttaasut angerlarsimaffimminniit namminneq imminnut kiffartuussinnaalernerat tikillugu.
Qeqqata Kommuniata Ujuuki Saralu sulilluarsimanerannik pilluaqquaat siunissamillu ajunnginerpaamik kissaallugit.

Assit amerlanerusut takuniarukkit facebookkerput alakkarsinnaavat


Paasissutissat allat piniarukkit, una attavigiuk:


Inga Olsen Mathiasen
Sulisoqarnermut siunnersorti
HR konsulent
Tlf: (+299) 70 21 00 dir: (+299) 86 73 28

inol@qeqqata.gl