iPadi atuartunut kajumissaataavoq

Qeqqata Kommuniani atuartut iPad-i atuartitsinermi atorluartarpaat.
Tamanna aasaq atuisunik apersuilluni paasiniaanerup takutippaa.
Tassami ilinniartitsisut apersorneqartut 75 procentii akipput, sapaatip akunneranut arlaleriarlutik iPad-i atuartitsinerminni atortarlugu.
13. september 2017

Tamanna Sisimiuni Nalunnguarfiup Atuarfiani 9. klassimit naqissuserneqarpoq.

Tassami pappilissat aqerluusallu skærmimik digitaliusumik taarserneqarput. Atuartut matematikkernerminni iPad atorlugu suliassatik suliarisarpaat.

Atuartut suliassaminnik ingerlatsinissamut ajornartorsiuteqartut, ikiornissaanut ilinniartitsisoq Seth Skifte ikiuulluartarpoq Taanna Nalunnguarfiup Atuarfiani iPad-imut ilitsersuisuuvoq ilutigitillugulu ilinniartitsisuulluni. Ullut tamaasa iPad atortarpaa, aamma fagini allani ilinniartitsiffigisamini atorsinnaasarpaa.
- iPad sakkussatut pigalugu pitsaasuuvoq. Atuartut aallussilluartillutik, taava suliassanik naammassinninnissaq pitsaanerusarpoq, aammalu sakkussat amerlasuut pigitillugit, assersuutigalugu seqersittakkat atorsinnaavavut saqqummiussillutalu. Taakku atuartut aallussinissaanut pitsaasuupput, taamak naliliivoq.

Gerda-Dorthe Berthelsen 9. klassimi atuartoq aamma aallussilluartuuvoq. Klassimi atuartut allat assigalugit, suliassat suliarineqarnissaannut iPad atortarpaa, uani matematikkimut, aamma titartagartaliussassat kisitassallu tamarmik ilaasussanut, aammalu taakku atornissaannut sungiussereersimalluni.
- iPad atornissaa nuannarivara. Paasissutissanik pissarsiniarluni ajornanngitsumik google atorneqarsinnaavoq, aamma taanna seqersittaammi atussallugu pitsaavoq, taamak oqaatigaluni suliassaminik allamik aallartitsivoq.

Sungiussiniarneq annertunerusoq
Meeqqat atuarfiini atuartitsinermut kivitseqataavoq, atuartullu iPad-imik atuinerat atuartitsinermi peqataanerulersitsisutut nalilerneqarluni. Atuartitsinermi video, nipit, assit assigisaallu atorneqarajuttarput, atuartunillu iPad-i paasissutissanik ujartuinermut, saqqummiinernut, sammisassanut eqqarsarnartunut allaaserinninnernullu atorneqarajuttarpoq. Taamaalilluni atuartitsinermi sungiussititsiniarneq annerusartoq, ilinniartitsisunit apersorneqartunit nalilerneqarpoq.

Taamatuttaaq iPad-ip atorneqarnerani atuartut ilikkagassatigut pissarsiaat pitsanngoriangaatsiartutut nalilerneqarluni. Atuartut kajumissuseqarluarput aammalu namminneerlutik nutaanik misileraanissartik nuannaralugu. Taamaaliornikkut atuartitsinermi malinnaanerulernerat ilinniartitsisunit maluginiarneqarpoq.

MIsissuinermi apersorneqartut aamma 85 procentiisa oqaatigaat, iPad atuartut nammineernerulernissaannut ikiuutaasoq. Oqallinnerulerput, misissueqqissaarnerulerput ilinniartitsisullu 97 procentii isumaqarput, atuartut ukiut ingerlanerini digitalimik pisinnaasaat pitsanngoriarsimasoq.

Ilinniartitsisut akornanni iPad-imik atuinermik pikkorissaanerit amerlanerusut kissaatigineqartut, taamatullu angerlarsimaffiup atuarfiullu akornanni suleqatigiinnerup pitsaanerusinnaanera misissuinermi tikkuarneqarpoq. Angajoqqaat akuutinneqassapput aammalu atuartitsinermi iPad-ip ilaasutut pingaaruteqarnera ersarissarneqarluni.
iPad-i pillugu suliniut Villumfonden aamma Qeqqata Kommuniata akornanni suleqatigiiffiuvoq. Atuarfinni atuartitsinermi periarfissanik nutaanik ammaassinissaq siunertaralugu 2014-imi Qeqqata Kommuniani atuartut tamarmik iPad-imik tunineqarput.