Qeqqata Kommuniata takornariaqarnermi ineriartortitsinissaq sulissutigaa

Nunap immikkoortuani Destination Arctic Cirkle-mi "Misigisanik tuniniaanermi aningaasaqarneq" pillugu Qeqqata Kommunia aamma Arctic Circle Business sapaatip akunnera 6-imi Kangerlussuarmi isumasioqatigiisitseqqammerpoq.
14. februar 2018

Qeqqata Kommuniata takornariaqarnermi ineriartortitsinissaq sulissutigaa 

Borgmester Malik Berthelsen & ACB-mut siulittaasoq, Jens Christian Eldevig

Nunap immikkoortuani Destination Arctic Cirkle-mi "Misigisanik tuniniaanermi aningaasaqarneq" pillugu Qeqqata Kommunia aamma Arctic Circle Business sapaatip akunnera 6-imi Kangerlussuarmi isumasioqatigiisitseqqammerpoq.

Kommunimut takornarissat amerlanerusut qammarumallugit, takornarialerisunik, ilisimatusartunik inuussutissalerisunillu suleqateqarluni, tikitassami misigisassanik pissanganartunik amerlanerusunik pilersitsinissaq pingaaruteqarpoq.

Borgmesteri Malik Berthelsen oqaaseqarpoq:
"Qeqqata Kommuniani innuttaasut assigiinngitsunik piginnaanillit peqatigalugit, kommunitta avammut pitsaasumik nittarsaannissaanut piumassuseqarnerat isumalluarfigalugulu iluarisimaarpara.

Kommunerput ataatsimut tamaat isigalugu takornariaqarnikkut annertusaanissamut periarfissanik ulikkaarpoq. Soorlu Maniitsumi sisoriartitsinerit, Kangerlussuarmi Sermersuarmik arsarnernillu takornariartitsinerit, Sisimiuni qimussernerit qissattariartitsinerillu. Takornarialerisut imminnut "unammisuugaluartut", suleqatigiilluta kommunitta avammut nittarsaalluarnerartigut amerlanerusunik tikisitsisalernissatsinnut periarfissagissaartugut isumaqarpunga".

Aasivissuit - Nipisat kulturikkut eriagisassanut UNESCO-p nunarsuarmioqatigiinnut kingornussassarititaannut ilanngunneqarnissaa ilimanaateqarpoq, taanna nunap immikkoortuanut takornarissat amerlanerulernissaannut peqataassaaq aammalu sumiiffimmi najugaqartunut iluaqutaasumik periarfissap taassuma atorluarnissaanut takornarialerisunut sinaakkutissanik pilersitsissaagut.
Takornariaqarnerup piniartullu kulturiata ataatsimoortinneqarnerat UNESCO-mik suliniummi tunuliaqutaavoq, misigisanillu tuniniaanermi aningaasaqarnerup annertuseqqinnissaanut takornariaqarnerup inuussutissalerisullu akornanni ataatsimoortitsinerusinissamik ukkataqarnerulluni.

Aalisakkerivinnik, kuunni qissattartitsilluni aalisarnermik, tammajuitsussarsititsiniarluni piniarnermik, umimmannik takusassarsiortitsinermik, uumasulerinermik-pisulluni angalanermik neriniartarfinnilu nerisassanik soqutigisalinni inuussutissarsiortugut ingerlalluartut misigisanik tuniniaanermi aningaasaqarnermut tunngatillugu peqataanerulissapput.

Isumasioqatigiinnermi nerisassanik tunisassiornerup iluani eqimattanngorluni suleqatigiinnerup iluaqutai eqqartorneqarput, kalaallillu nerinermut kulturiata takornarissanut misigisassatut siuarsarneqarnissaa aammalu nerianiartarfinni kalaaliminernik atuinerup qaffanneqarnissaa ataatsimoorluni anguniarneqassasoq isumaqatigiissutaavoq.

Arctic Circle Business siulittaasua Jens Christian Eldevig oqaaseqarpoq:
”Qeqqata Kommuniata, takornarialerisut kiisalu namminersorlutik oqartussat akornanni pitsaasumik suleqatigiinnissap qulakkeernissaanut Arctic Circle Business peqataarusuppoq. Tassami nunap immikkoortuani pingaarutillit suliniutit annertuut iluatsissappata suleqatigiinneq pingaaruteqarpoq. 2021 tungaanut Qeqqata Kommunianut sullissinermut isumaqatigiissuterput sivitsoqqammerparput. Isumaqatigiissummi tassani illoqarfinni marluusuni nunaqarfinnilu tamani inuussutissarsiornerup takornariaqarnerullu ineriartortinneqarnissaanut peqataanissarput neriorsuutigaarput. Aallarnisaasunik isumassarsiullaqqissunik kommunimik nukittuumik aningaasaqarnikkut siuariartorfiusumik inuussutissarsiuuteqartoqarnissaa anguniagaavoq. Takornarissanut misigisassat amerlanerusut takornarialerisullu nukittunerusut. Naggataagullu minnerunngitsumillu nunap immikkoortortatsinnik nittarsaassineq nukittunerusoq - tamatta kivitseqataaffissarput. ”



Isumasioqatigiinnerup kingorna illoqarfinni tamani malitseqartitsilluni sulisoqarpoq, tamatumani Qeqqata Kommunianut tamanut ataatsimoorussami inuussutissarsiornermut takornariaqarnermullu pilersaarummik Qeqqata Kommunia aamma Arctic Circle Business suliaqartussaalluni.

Isumasioqatigiinnermut takornarialerinerup, inuussutissalerinerup kiisalu ilisimatusartut akornanni suliaqartut nunap immikkoortuaneersut 45-t peqataapput.