Sisimiuni sullissineq pilertornerusoq

Innuttaasunut sullissineq pitsaanerulersinniarlugu, Sisimiuni Ilaqutariinnermut immikkoortortaq marsip aallaqqaataaniit Tigooraavimmik pilersitsinikuuvoq. Tigooraaviup qulakkiissavaa, kommunimi innuttaasut saaffiginnereernermikkut pilertortumik suliaqarfigineqarnertik aallartinneqartarnissaat.
15. marts 2018

Ukiuni arlalinni innuttaasut piffissamik inniminniisarnerat saaffiginnittarfikkut pisarnikuuvoq, tamatuma kingorna inniminniinerit immikkoortortanut tamanut ingerlateqqinneqartarlutik. Innuttaasunut pilertornerusumik sullissisalernissaq neqeroorutiginiarlugu, suleriaaseq taanna allanngortikkusunneqarpoq.

Suleriaatsip qanoq pitsaanerpaamik allanngortinneqarsinnaanersoq paasiniarlugu, saaffiginnittarfimmi nalunaarsuinernik qaammatini arlalinni ingerlatsisoqarnikuuvoq, tamatumani innuttaasut immikkoortunut sorlernut saaffiginnittarnersut aammalu innuttaasut qassit kommunimut saaffiginninnersut paasiniarneqarluni. Ilaatigut oqarasuaatikkut, inuit ornigullutik saaffiginninneri aammalu mail atorlugu saaffiginnittut kisitsisinngorlugit nalunaarsorneqarnikuullutik. Nalunaarsuinerit taakku malillugit takuneqarsinnaavoq, innuttaasunit saaffiginninnerit 80 procentii, pisortanit ikiorsiissutinik pisartagaqalerusuttut imaluunniit suliamik nutartererusuttuusut.

Taamaattumik saaffiginnittarfik nutaanngitsoq Tigooraavimmik taarserneqarpoq, tassani innuttaasut Ikiorsiisarnermut immikkoortortamut saaffiginnikkusuttut, piffissamik inniminneeqqaanngikkaluarlutik nammineq ornigussinnaallutik aammalu sullinneqalerlutik. Tigooraavik sisamanik sulisoqarpoq, taakku tamarmik sullissinermik ingerlatsisinnaallutik.

Ilaqutariinnermut Isumaginninnermullu ataatsimiititaliap siulittaasua oqarpoq: ”Innuttaasut pilertornerusumik sullinneqalertarnissaat qulakkeerusukkatsigu, allannguineq pingaaruteqarpoq. Pingaartumik angajoqqaat meerartallit isertitaqanngitsut sullinneqarnissaat qulakkeerneqassaaq, taamaalillutik meeqqaminnut pilersuisinnaallutik".

Allannguineq assingusoq 2014-imi Maniitsumi ingerlanneqarnikuuvoq, tassani Ikiorsiisarnermut immikkoortortaq saaffiginnittunik tigooraasarluni.

Suli Utoqqarnut immikkoortortamut, Innarluutilinnut immikkoortortamut, Meeqqanut Ilaqutariinnullu immikkoortortamut piffissamik inniminniisoqarsinnaavoq.