Qeqqata Kommuniani Sisimiuni atuartut siulliullutik angajoqqaanut, suliffeqarfinnut soqutiginnittunullu talimanngornermi oktobarip sisamaani matunik ammatitsipput. Atuartut saqqummersitaat annertuumik siammasillutillu nassaassarsiullaqqipput, tamattalu nunarsuup paarilluarnissaanik qanoq pingaaruteqartigineranik paasinnilluinnarnerulersimasut ersarippoq.
Nalunnguarfiup Atuarfiani 10. klassimi atuartut ilaasa, atuarfimminni ukiumut orsussamut atuinerup qanoq ilillutik 30 procentimik appartissinnaallugu, illuatungaatigullu avatangiisinut mingutsitsinngitsunik atuilluarnerusumik nukinnik atuinerusinnaanermik siunnersuuteqarput. Aningaasat sipaarutigineqartut atuarfimmik pitsanngorsaanermi atorneqarsinnaapput, taamaalillunilu atuarfik avatangiisinut mingutsitsinnginnerulerluni.
Atuarfimmi pisortaq Riikki Grønvold isumaqarpoq, tigussaalluartumik aaqqiissummik saqqummertoqarnera nuannersoq, atuartullu namminneq atuarfitsik pineqartillugu qanoq pimoorussinerunersut maluginiarsimallugu. ”Atuartut qanitarisaat isumassaqartitaallu pineqartillugit, suliniutaat pitsaanerulerlutillu tigussaaninngortarnerinut suliniut una assersuutissaqqissuuvoq” Riikki Grønvold nangippoq.
Angajulliit nunarsuarmi anguniagaq nr. 7 ukkatarivaat, taannalu ima taaguuteqarpoq: Nukiit piujuartitsinerusut, nukissiuutinik piujuartitsisunik paasissutissanik piffissaq annertooq atorlugu katersipput kiisalu uuliamik atuinerup annikillinissaanut pilersitsisumik aaqqiissutissanik suliaqarlutik. Atuartut ilaat Kimmernaq 9. D-mit oqarpoq: ”Nunarsuup najuinnarnissaanut iluaqutaasinnaasunik aaqqiissutinik suliaqarneq nuannerpoq”.
Atuarfinni atuartut mikroplast, immap mingutsinneqarnera pillugit annertuumik paasisaqarsimasut malunnarpoq, plastikkinillu atuinerup annikillisinnissaanut, immap plastikkikunik piiaaffiginissaanut, eqqakkat immikkoortinnissaanut aammalu plastikkinik qanoq atoqqiisoqarsinnaaneranik isumassarsiarpassuaqarput.
Minngortuunnguup Atuarfiani angajulliit nunarsuarmi anguniakkat 4 ukkataraat, taannalu ima taaguuteqarpoq: Pitsaassusilimmik ilinniartitaaneq. Atuarfiit qalipaateqarnerusumik, naasortaqarnerusumik, atuartitsiveqarnerutillugit, init pisatsersorlugit, pinnguartarfilerlugit, eqqissisimaartarfilerlugit, kantiinamik ilaatigut ullaakkorsiutinik sassaalliisartulerlugu, 3., 6., aamma 9. klassimi aallaarsimaartitsisarnikkut ilusilersorneqarneratigut, qanoq ilillutik ilikkarniarnerusinnaanermut ingerlalluarnerusinnaanermullu sinaakkusiisinnaaneq pillugu, atuartut misissuipput.
Tassani piujuartitsineq eqqakkanut avatangiisinullu kisimi tunngassuteqanngitsoq, aammali meeqqanut inuusuttunullu pitsaasumik ilinniartinneqarnissaanut tunngassuteqartuusoq paasivaat.
Sapaatip akunnerani tassani Maniitsumit, Itillimit, Sarfannguanit Atammimmiillu atuartut soqutiginnittunut matunik ammatitsipput.
Sapaatit akunnerini suliaqarneq Nunarsuaq tamakkerlugu angunuakkanut iliuuseqarnermik taaneqartoq, suliffeqarfimmit '&LEARNING'-imit pilersitaavoq, kommunillu ataatsiomoorlutik meeqqat atuarfiinik kivitsinissamut Kivitsisa-mut ilaasuulluni. Kommunit ataatsimoorussamik meeqqat atuarfiinik kivitsiniarnerat pillugu annertunerusumik uani atuaruk https://kivitsisa gl/
Nunarsuaq tamakkerlugu angunuakkanut iliuuseqarneq pilersitsisumik atuartitsinermik ingerlatsinermik tunngassuteqartoq, FN-ip Nunarsuarmut anguniagaanik ukkataqartuusoq, atuarfinni aqutsisut atuarfinnilu ilinniartitsisut qanimut suleqatigalugit ineriartortinneqarpoq. Annertunerusumik uani takuuk: https://aktionverdensmaal.net/nunarsuaq-tamakkerlugu-anguniakkanut-iliuuseqarneq/
Maajimi/juunimi ilinniartitsisut siulliit, ikorfartortitut aamma taagorneqartut, pikorissartinneqarput. Tamatuma kingorna ikorfartortit klassini ataasiakkaani misileraalluni ingerlatsinernik siullernik suliaqarput. Septembarimi Qeqqata Kommuniani atuartunit tamanit peqataaffigineqartumik workshoppertitsisoqarpoq, tassani periutsinik ilisimasaqalersinneqarput, taamatullu sapaatit akunnerini suliaqarnissamut, ikorfartortinit suliarineqarsimasunik atuartitsinissamut pilersaarutinik tunineqarlutik. Ukiuni tulliuttuni sammisaqartitsisarneq uteqqiattuunissaa pilersaarutaavoq, taannalu Qeqqata Kommuniani atuartunik pilersitsisinnaasunik, suliamik ilisimasaqarluartunik nunarsuarmioqataalluartunik pilersitsisussaassalluni.
