airplanebooksbriefcase business cogs cross election entertainment fish house law lockmedicalpeopleselfservices socialtax

Sunngiffimmi eqalunniarneq

Sunngiffimmi eqalunniarneq 

Nalinginnaasumik paasissutissiineq 

Eqalunniarnermi (Salvelinus alpinus) ileqqutoqqat atorneqarput aalisagarlu inuuniarnermut pisariaqartunut tapiissutitut atorneqarnerusarluni.  Eqalunniarneq ileqqut malillugit aasivinnerup ilagiinnarpaa, taamaattumillu kuut ilaat ilaqutariinni ataasiakkaani kinguaariinnit arlalinnit orninneqartuartarlutik.  Ukiuni kingullerni sukisaarsaatigalugu eqalunniarneq soqutigineqarneruleriartorpoq.

Eqaluk iluanaarniutaanngilaq, taamaammallu Kalaallit Nunaanni najugaqavissut taakkuninnga aalisarsinnaatitaapput.  Inuussutissarsiutigalugu piniarsinnaanermut uppernarsaateqaruit assersuutigalugu kalaalimineerniarfimmi eqalunnik tunisisinnaavutit.

Kommunerisat eqalunnut atatillugu immikkut maleruagassaqartitsisinnaavoq. Assersuutigalugu kommunit ilaat kuunnut aalajangersimasunut eqqissisimatitsisinnaavoq, kiisalu aalisarnermi atortut sorliit soorlu ningittakkat pullatillu atorneqarsinnaaneranik aalajangersagaqarsinnaalluni. Eqalunniarnissat sioqqullugu aalajangersakkanut paasisaqarnissamut pisussaaffeqarputit.

Eqaluit nikittarneri

Julimi augustimilu eqalunniartoqarnerpaasarpoq.  Upernaakkut siku apullu aareeraangata eqaluit tasernit ukiiffimminnit avalakaalersarput.  Avalakaasarnerat majimi junimilu pisarpoq, taamaammallu aatsaat taamaalinerani aalisarneq imaani kuut naaffiini aallartittarluni.  Augustimi aalisakkat kuummiittarput septemberimilu suffigisartagaanniittarlutik.

Takornariat

Sukisaarsaatigalugu aalisartut Kalaallit Nunaata avataani najugaqartut Kalaallit Nunaanni aalisarsinnaassappata aalisarsinnaanissamut allagartaqassapput.  Aalisarsinnaanermut allagartaq qissattaasersorluni, aalisaataannarsorluni imaluunniit assingusumik tigummiartakkamik atortoqarluni aalisarsinnaanermut pisinnaatitsivoq.  Takornarissat qassusersoqqusaanngillat. 

Aalisarsinnaanermut allagartaq pillugu uani atuagaqarsinnaavutit www.greenland.com

 

Piumasaqaatit 

Taamaallaat makkuninnga eqalunniartoqarsinnaavoq:

  • Sukisaarsaatigalugu aalisarnermut oqummersat
  • Qalut naatsunnguamik ipullit qassutillu nigartunerat tasillugit minnerpaamik 100 mm-usut

Qassusersornermi makku attuupputtaaq: 

  • Qassutit 30 meterinit takinerussaanngillat
  • Qassutit piginnittup aqqanik, angallatip aqqanik angallatilluunniit normuanik nalunaaqutsersimassapput
  • Qassutit ningisimatillugit nakkutigineqartuassapput.  Aalisarfik qimanneqarpat piffissaq qassutillu takissusaat apeqqutaatinnagit piginnittup qassutini qaqissavai.

Qassusersornermi malittarisassat Qassutit atorlugit eqalunniartoqarsinnaavoq taamaallaat junip ulluisa 15-ianniit septemberip ulluisa 25-at ilanngullugu.

Taassuma saniatigut qassusersornermi maleruagassat tullinnguuttut malinneqassapput: 

  • Kuunni taakkualu tasinngortaanni qassusersorluni eqalunniarneq tamarmi inerteqqutaavoq.
  • Tatsini eqalunniarnermi kuuit tatsimut akuaniit kuuillu aariaanniit 100 m-init qaninnerusumut qassuserneq inerteqqutaavoq.
  • Tatsini qassusersornermi qassutit tatsip sinaaniit akimut ikertussusiata aggornerisa pingajorarterutaat sinnerlugu takissuseqassanngillat.
  • Kuup naaffianit sammiviit arlaanni 150 meterimit qaninnerusumi qassusersorneq inerteqqutaavoq
  • Qassutit timaatungaat ulinnerani immap angusagaanut attuumasunngorlugit nivinngarneqartassapput.
  • Qassutit imartap ikertussusiata pingajorarterutaa sinnerlugu takissuseqassanngillat.
  • Qassutit narlusuumik nunamiit avammoorlugit nivinngarneqassapput.  Pisaqarujussuarnissaq siunertaralugu qassutit allatut ilusilerlugit nivinngarnissaat inerteqqutaavoq.
  • Qassutit eqalunniutit qassutinut tullernut minnerpaamik 30 meterinik akunnilerlugit nivinngarneqartassapput.
  • Ujaqqanik sapusiat atorlugit eqalunniarsimagaanni eqalunniarfik qimatsinnagu saputit ingerlaarfeqalerlugit ammarneqassapput.

Najukkami nakkutilliisut, politiit imaluunniit inuit Naalakkersuisunit pisinnaatinneqartut nakkutilliissapput.

 

$name 

$name 

Aamma atuarsinnaasatit

Aalisarnermut, Piniarnermut Nunalerinermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apnn@nanoq.gl
Nittartagaq: www.apnn.gl