Inatsisit naapertorlugit ingerlatsiviit 1. marts 2021-miit e-Boksimi allakkat digitaliusut misissortalernissaannut pisussaaffeqalissapput. Allakkat digitaliusut www.e-Boks.dk-mut iseriarluni alakkarterneqarsinnaapput.
Inatsisit naapertorlugit ingerlatsiviup e-Boksi aqqutigalugu pisortatigut oqartussanit allakkat digitaliusut pingaarutillit pissarsiarisassavai. Allakkat digitaliusut isumannaatsumik piffimmi ataatsimi e-Boksimiitinneqassapput, aamma qarasaasiaq, mobili imaluunniit tableti atorlugu iserfiginissaanut ajornaatsuararsuulluni.
Inatsisit naapertorlugit ingerlatsiviit tamarmik CVR-imi normoqassapput. Tassa imaappoq, suliffeqarfiit, oqartussat kiisalu namminersortut inuussutissarsiuteqartut CVR-illit.
Pisortani Digitalimik Allakkerineq pillugu inatsit 2017-imi Inatsisartunit akuerineqarpoq, kingunerisaanillu innuttaasut suliffeqarfiillu pisortani oqartussanit allakkanik digitaliusunik nassinneqartarnissaminnut pisussaaffeqalerput.
e-Boksimik peqalerniaruit:
- sulisutut NemID-mik peqassaatit (sulisut digitalimik atsiornerat)
- Qitiusumik Suliffeqarfinnik Nalunaarsuiffimmi (CVR-mi nalunaarsuiffik) nalunaarsorsimassaatit
Sulisut digitalimik atsiortarnerat pillugu paasissutissat atuarsinnaavatit uani medarbejdersignatur.dk
Pisuni immikkut ittuni suliffeqarfiit/inatsisit naapertorlugit ingerlatsiviit Allakkanik Digitaliusunut pisussaajunnaarsinneqarnissamut qinnuteqarsinnaavutit.
Inatsisit naapertorlugit ingerlatsivik pisussaajunnaarsinneqarsinnaavoq:
- Kalaallit Nunaanni niuerniarfimmik peqarunnaarnermi imaluunniit Kalaallit Nunaannut attuumassuteqarunnaarsimagaanni
- Qinnuteqaat tunngavilersugaq nassiussimagaanni
Inatsisit naapertorlugit ingerlatsivik pisussaajunnaarsitsinissamut kissaateqaruni, sullissivik.gl-imi qinnuteqaat immersorneqassaaq imaluunniit allakkamik Digitalimik Sullissinermut Aqutsisoqarfimmut nassiussisoqassaaq. Qinnuteqartup atugai sukumiisumik naliliiffigineri tunngavigalugit qinnuteqaat naliliiffigineqassaaq, matumani qinnuteqartoq internetimut attaveqarnissaminut periarfissaqannginnera ilanngullugu.