airplanebooksbriefcase business cogs cross election entertainment fish house law lockmedicalpeopleselfservices socialtax

Avaleraasartuunik ammassassuarnillu aalisarsinnaanermut akuersissutinik qinnuteqarneq

Maana qinnuteqarit

Paasissutissat nalinginnaasut 

Avaleraasartoorniarneq ammassassuarniarnerlu Kalaallit Nunaanni pilerlaajupput sulilu ineriartortinneqarlutik, taamaammallu Naalakkersuisut taakkuninnga aalisarnermut piumasaqaatinik ingerlaavartumik allannguisassapput. Ukiumut piumasaqaatit tusagassiutitigut nalunaarutigineqartarput.

Avaleraasartoorniarusukkuit ammassassuarniarusullutilluunniit Aalisarnermut, Piniarnermut Nunalerinermullu Naalakkersuisoqarfimmit aalisarnermut akuersissummik pigisaqassaatit.

Kalaallit nunaanni aalisarneq, pisassiissutit, ingerlatsinermut pilersaarutit il.il. apnn.gl-imi atuarsinnaavatit.

 

Piumasaqaatit 

Avaleraasartoorniarnermik ammassassuarniarnermillu peqataanissamut piumasaqaatinik tunngavissanillu Naalakkersuisut ukiut tamaasa aalajangersaasarput. Tunngavissat taakku Naalakkersuisut.gl tugassiutitigut saqqummiunneqartarput. Tamanna upernaakkut pinerusarpoq.

Qinnuteqartup avaleraasartuunik ammassassuarnillu aalisarnermi tunngavissanik atuuttunik ilisimasaqarnissaq allanngortoqartillugulu malinnaanissaq nammineerluni akisussaaffigaa.

Maluginiassavat akuersissutit ukiumut pisassiiffiusumut ataatsimut atuuttarmat, taamaattumillu ukiut tamaasa akuersissummik nutaamik qinnuteqartassaatit.

Ukioq pisassiiffiusoq ataaseq tassaavoq januarip aallaqqaataaniit decembarip 31-ianut.

 

Qinnuteqarneq 

Avaleraasartoorniarnermut ammassassuarniarnermullu akuersissummik qinnuteqarniaruit avataasiorluni aalisarnermut qinnuteqaat pillugu immersugassaq immersussavat.

Una tooruk, kiisalu avaleraasartoorniarnermut ammassassuarniarnermullu akuersissummik qinnuteqaatit nassiullugu

Malugiuk Naalakkersuisut pisassiissutinik agguaareeraangamik tamanna ukiut tamaasa tamanut Naalakkersuisut.gl-mi saqqummiunneqartarmat.

 

Qinnuteqaammut nassiussamut suleriaaseq 

Avaleraasartoorniarnermut ammassassuarniarnermullu akuersissut pillugu qinnuteqaatit Aalisarnermut, Piniarnermut Nunalerinermullu Naalakkersuisoqarfimmut nassiutereerukku taanna nalunaarsorneqassaaq, tiguneqarneranillu uppernarsaammik pissarsissaatit maili atorlugu allakkatigulluunniit. Qinnuteqaativit suliarisinnaanissaanut Naalakkersuisoqarfik paasissutissanik amerlanerusunik ilinnit pisariaqartitsiguni attavigineqarumaarputit.

  • Qinnuteqaatit aatsaat suliarineqassapput qinnuteqarnissamut piffissarititaasup qaangiutereernerani tamannalu ukiut tamaasa tugassiutitigut nalunaarutigineqartarpoq.
  • Qinnuteqaatit tamarmik qinnuteqarnermut piffissarititaasup qaangiutinnginnerani tiguneqartut Naalakkersuisoqarfimmit suliarineqartarput.
  • Qinnuteqaatit suliarineqartarput Naalakkersuisunit tunngaviit ukiut tamaasa aalajangersarneqartut tusagassiutitigullu ukiut tamaasa nalunaarutigineqartartut aallaavigalugit.
  • Avaleraasartuunik ammassassuarnillu pisassiissutit Naalakkersuisunit agguaanneqartarput.
  • Sulianik ingerlatsineq naammassereerpat, Naalakkersuisullu qinnuteqartunut pisassinneqartunut akuersissutinik tunniussereerlutik pisassiissutinik agguaassereernerisigut, qinnuteqartunut pisassinneqarsimanngitsunut itigartitsissummik tunngavilersukkamik nassiussisoqassaaq.
  • Ileqquusutut qinnuteqarnissamut piffissarititaasup sapaatit akunneri pingasuk qaangiutereerneratigut qinnuteqaatinnut akissummik tigusaqassaatit.
  • Naalakkersuisut pisassanik agguaareeraangata pisassiissutinik agguaaneq ukiut tamaasa tamanut saqqummiunneqartarpoq tusagassiutitigut Naalakkersuisut.gl atorlugu.

Allanik apeqqutissaqaruit Aalisarnermut, Piniarnermut Nunalerinermullu Naalakkersuisoqarfimmut attaveqarnissamut tikilluaqqusaavutit.

 

Ullut piffissaliussat 

Avaleraasartoorniarnermut ammassassuarniarnermullu qinnuteqarnissamut piffissarititaasumik Naalakkersuisut aalajangeereeraangata tamanna tamanut tusagassiutitigut saqqummiunneqartarpoq Naalakkersuisut.gl atorlugu.

Tamannalu amerlanertigut upernaakkut pisarpoq.

 

Maalaaruteqarneq 

Oqartussat aalajangeeriaasiat pillugu aallaaviatigut maalaaruteqarsinnaanngilatit. Qinnuteqaatilli akuerineqassanngikkaluarpat tunngavilersuummik tunineqarumaarputit. Aalajangiineq kukkusumik tunngavilerneqarsimasorigukku imaluunniit paatsoortoqarsimasoq Aalisarnermut, Piniarnermut Nunalerinermullu Naalakkersuisoqarfimmut maalaaruteqarsinnaavutit, taassanilu ilinnut suliaq nalileqqitassatut ingerlassinnaavaa. Qinnuteqaativit akuerineqannginneranut allakkiaq tigugukku piaarnerpaamik maalaarutit nassiutissavat.

Maalaarutit allakkatiguussaaq aamma sooq sunalu pillugu maalaaruteqarerlutit allassavat. Eqqaamallugu maalaarutigerusutat pillugu aalajangiinerup assilinera ilanngutissagakku, taannami suliap ingerlanneqarneranut iluaqutaassammat.

Aalisarnermut Piniarnermut Nunalerinermullut Naalakkersuisoqarfiup maalaarutit nalilersussavaa suliarlu ilinnut tunngasoq ingerlanneqareerpat attavigineqarumaarputit.

 

Aalisarnermut, Piniarnermut Nunalerinermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apnn@nanoq.gl
Nittartagaq: www.apnn.gl