airplanebooksbriefcase business cogs cross election entertainment fish house law lockmedicalpeopleselfservices socialtax

Avataasiorluni aalisarnissamut akuersissummik qinnuteqarneq

Maana qinnuteqarit

Paasissutissat nalinginnaasut 

Avataasiorluni aalisarneq killeqarfimmit 3 sømilimit killeqarfimmut 200 sømilit tikillugit ingerlanneqartarpoq. Avataasiorluni aalisarneq kitaani aamma kangiani ingerlanneqartarpoq. Nunat illugiillutik aalisarnermut isumaqatigiissutaat naapertorlugit uumasoqatigiit ataatsimoorunneqartut imartani nunat allat oqartussaaffigisaanni, kiisalu nunat tamalaat imartaanni aamma aalisarneqartarput.

Avataasiorluni aalisarnermi pingaarnertut raajat, qalerallit, saarulliit, suluppaakkat kiisalu ikerinnarmiippoq soorlu ammassat, ammassassuit avaleraasartuullu aalisarneqartarput.

Kalaallit imartani allani aalisarnerat
Kalaallit angallataat avataasiutit Savalimmiut, Norgep Ruslandillu imartaanni aalisarsinnaatitaapput. Nunat allat imartaanni aalisarsinnaaneq ukiumoortumik isumaqatigiinniarnerit tunngavigalugit pisarpoq, nunallu pineqartut Kalaallit Nunaatalu illugiillutik isumaqatigiissutaat atorlugit pisassiissutinik paarlaasseqatigiittoqartarpoq.

Nunat allat imartaanni aalisarsinnaanerup saniatigut Kalaallit Nunaat nunat tamalaat imartaanni marluusuni Kalaallit Nunaata kujammut kitaaniittumi (NAFO-p imartaani) kiisalu Kalaallit Nunaata kangianiittumi (NEAFC-p imartaani) aalisartoqarsinnaavoq.

Avataasiorlutit aalisarusukkuit Aalisarnermut Piniarnermullu Naalakkersuisoqarfimmit aalisarnermut akuersissummik pigisaqassaatit.

Kalaallit Nunaanni aalisarneq, pisassiissutit, aqutsinermut pilersaarutit il.il. pillugit paasisaqarnerugit uani apnn.gl.

 

Piumasaqaatit 

Avataasiorluni aalisarnermut akuersissummik pissarserusukkuit periarfissaqarsinnaanissannut tunngaviusumik piumasaqaatit uku naammassisimassavatit:

  • Ingerlatseqatigiiffik aktianik piginneqatigiiffiusinnaavoq, piginneqataassuteqarluni ingerlatseqatigiiffiussinnaavoq, imaluunniit piginneqatigiilluni umiarsuaatileqatigiiffiusinnaalluni
  • Ingerlatseqatigiiffiup aningaasaataasa ikinnerpaamik 2/3-ii inunnit ataasiakkaanit toqqaannartumik toqqaannanngikkaluamilluunniit pigineqassapput, raajarniarnermilu ingerlatseqatigiiffiup aningaasaatai toqqaannartumik toqqaannanngitsumilluunniit inunnit ataasiakkaanit soorlu
    • Kalaallinut inuiaqatigiinnut aalajangersimasumik attuumassuteqassaaq,
    • Kalaallit Nunaanni inuit allattorsimaffianni nalunaarsorneqarsimassaaq, ukiullu siuliini marlunni Kalaallit Nunaanni inuit allattorsimaffianni nalunaarsorsimalluni aamma
    • Kalaallit Nunaanni tamakkiisumik akileraartartuusaaq ukiullu siuliini marlunni Kalaallit Nunaanni akileraartartuusimassalluni.
  • Angallat/angallatit Kalaallit Nunaanni erfalasoqarfeqassaaq, Søfartsstyrelsen-illu angallatinik nalunaarsuiffianni nalunaarsorneqarsimassalluni.

 

Qinnuteqarneq 

Avataasiorluni pisassiissutinut aalisarnermut akuersissummik qinnuteqarniaruit avataasiorluni aalisarnermut qinnuteqaammut immersugassaq immersorsimassavat. Nunat marluk akornanni illugiilluni Kalaallit Nunaata isumaqatigiissutaanut atatillugu nunat tamalaat, Norgep, Ruslandip Savalimmiullu imartaani aalisarsinnaanermut akuersissummut qinnuteqarniaraanni tamanna aamma atuuppoq.

Malugiuk akuersissut ukiumut pisassiiffiusumut ataatsimut atuuppoq, taamaattumillu ukiut tamaasa akuersissummik nutaamik qinnuteqartassaatit. Ukioq pisassiiffiusoq ataaseq tassaavoq januarip aallaqqaataaniit decembarip 31-ianut.

Qinnuteqarnerni immersugaq eqqortumik immersussavat, ilanngussallu uku ilanngullugit:

  • Ingerlatseqatigiiffimmut piginnittuunermut allagartaq atuuttoq
  • Angallatip uuttuutai pillugit allagartap assilinera
  • Angallatip naalagaaffimmut attuumassuteqarneranik uppernarsaatip assilinera

Aalisagaqatigiinnut ataasiakkaanut aalisarusutannut tamanut immikkut qinnuteqammik nassiussissaatit,tassa imaappoq suluppaakkanut qinnuteqaat ataaseq, qaleralinnut qinnuteqaat ataaseq.

Una tooruk, avataasiorlunilu aalisarnissamullu qinnuteqaatit nassiullugu

Malugiuk akuersissutaatillit akornanni pisassiissutinik agguaaneq ukiut tamaasa tamanut saqqummiunneqartarmata Naalakkersuisut.gl atorlugu.

 

Qinnuteqaatip nassiunneqartup suliarineqarnera 

Avataasiorluni aalisarnissamut pisassiissutinut qinnuteqaatit nassiukkukku, Aalisarnermut Piniarnermullu Naalakkersuisoqarfiup nalunaarsussavaa, tiguneqarneranullu uppernarsaammik tunineqassaatit. Aalisarnermut Piniarnermullu Naalakkersuisoqarfik qinnuteqaativit suliarisinnaanissaanut paasissutissanik amerlanerusunik ilinnit pisariaqartitsippat attavigineqarumaarputit.

  • Avataasiorluni aalisarnissamut pisassiissutinut qinnuteqarnissamut piffissaliussaq tassaavoq 30. november. Qinnuteqarnermut piffissarititaasup kingorna aatsaat qinnuteqaatit tamarmik suliarineqartarput.
  • Avataasiorluni aalisarnernut tamanut akuerineqarsinnaasumik pisarisinnaasat annertunerpaaffissaannik (TAC-mik) Naalakkersuisut ukiut tamaasa aalajangersaasarput. TAC-mik aalajangersaareernermi Aalisarnermut Piniarnermullu Naalakkersuisoqarfik illugiiluni peqatigalugit pisassiissutit pillugit isumaqatigiinniartarpoq.
  • Isumaqatigiinniarnerit naammassereerneranni avataasiorluni aalisarnissamut kalaallinut qinnuteqartunut pisassiissutinik agguaassisoqartarpoq.
  • Kalaallinut qinnuteqartunut Naalakkersuisut pisassiissutinik agguaassisartuupput.
  • Sulianik ingerlatsineq naammassereeraangat, Naalakkersuisullu pisassiissutinik agguaassereeraangata:
    • qinnuteqartunut pisassinneqartunut akuersissutinik tunniussisoqartarpoq,
    • qinnuteqartunullu pisassinneqarsimanngitsunut itigartitsissummik tunngavilersukkamik nassiussisoqarluni.
  • Decembarip naalernerani imaluunnit januarip aallartilaarnerani qinnuteqaatinnut akissummik tigusaqassaatit.
  • Ukiut tamaasa pisassiissutinut takussutissiaq Naalakkersuisut.gl-mi tamanut saqqummiunneqartarpoq.

Qinnuteqariaatsimut apeqqutissaqaruit Aalisarnermut Piniarnermullu Naalakkersuisoqarfimmut attaveqarnissamut tikilluaqqusaavutit.

 

Allannguutit 

Qinnuteqaatinni imaluunniit akuersissutinni arlaatigut allannguiniaruit, assersuutigalugu nutaamik angallatitaarsimaguit, Aalisarnermut Piniarnermullu Naalakkersuisoqarfimmut ingerlaannaq ilisimatitsissaatit.

 

Qinnuteqarnissamut piffissarititaasoq 

Ukiup tulliani avataasiorluni aalisarsinnaanermut qinnuteqarnissamut piffissatut killiliussaq tassaavoq ulloq 30. november.

Aatsaat qinnuteqarnissamut piffissaliussap ulloq 30. novembarip kingorna, Aalisarnermut Piniarnermullu Naalakkersuisoqarfiup suliamik ingerlatsineq aallartissaavaat.

 

Maalaaruteqarneq 

Oqartussat aalajangeeriaasiat pillugu aallaaviatigut maalaaruteqarsinnaanngilatit. Qinnuteqaatit akuerineqassanngikkaluarpat tunngavilersuummik tunineqarumaarputit. Aalajangiineq kukkusumik tunngavilerneqarsimasorigukku imaluunniit paatsoortoqarsimasorigukku, Aalisarnermut Piniarnermullu Naalakkersuisoqarfimmut maalaaruteqarsinnaavutit, taassumalu ilinnut suliaq nalileqqitassatut suliarissavaa. Qinnuteqaativit akuerineqannginneranut allakkiaq tigugukku piaarnerpaamik maalaarutit nassiutissavat.

Maalaaruteqarnerit allakkatiguussaaq aamma sooq sunalu pillugu naammagittaalliuuteqarnerlutit allassavat. Eqqaamajuk maalaarutigerusutat pillugu aalajangiinerup assilinera ilanngutissagakku, taannami suliap ingerlanneqarneranut iluaqutaassammat.

Aalisarnermut Piniarnermullu Naalakkersuisoqarfiup maalaaruteqarnerit nalilersussavaa, suliarlu ilinnut tunngasoq ingerlanneqareerpat attavigiumaarpaatsit.

 

Aalisarnermut, Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apn@nanoq.gl
Nittartagaq: www.apn.gl