airplanebooksbriefcase business cogs cross election entertainment fish house law lockmedicalpeopleselfservices socialtax

Sinerissap qanittuani nipisanniarsinnaanermut qinnuteqaat

Paasissutissat nalinginnaasut 

Inuussutissarsiutigalugu aalisartuuguit aalisartoorusukkuilluunniit nipisanniarlutit aalisarsinnaanermut aalisarnissamut akuersissuteqarnissaq pisariaqarpoq. Aalisarnermi akuersissut tassaavoq aalisakkanik pisassiissutigineqartunut malittarisassaqartinneqartunullu inuussutissarsiutigalugu aalisarnermut imaluunniit sunngiffimmi aalisarsinnaanermut akuersissut.

Imatut inissisimaguit akuersissummik qinnuteqarsinnaavutit:

  • Inuttut ataasiakkaatut
  • Piginneqataalluni aalisariutaatilittut
  • Ingerlatseqatigiiffittut

Aalisarsinnaanermut akuersissut aalisarnernut ukununnga atuuppoq:

  • Aalisakkamik aalajangersimasumik aalisarnermut
  • Sumiiffimmi aalajangersimasumi aalisarnermut
  • Ukioq ataaseq 1. Januarimiit 31. decemberimut

Nipisanniarnermut aqutsinissamut pilersaarut Marine Stewardship Councilip (MSC) akuerisaa aallaavigalugu nipisanniartoqartarpoq.

Kalaallit Nunaata kitaani nipisannik arnarlunnik aqutsinissamik pilersaarut atuaruk.

Attavigineqarnissamut paasissutissiinissamik pisussaatitaavutit soorlu; atit kinguliallu angallatip aqqa, angallatillu GR-normua aalisarnermut atortunni nalunaarsuissallutit.
Aalisarnermi atortut annaasatit qaqissallugit pisussaatitaavutit, qaqeriarnissaannillu iluatsitsinngikkuit aalisarnermi atortut annaasatit kommuninnut nalunaarutigissallugit pisussaatitaavutit aamma uunga gflk@nanoq.gl

Piumasaqaatit 

Inuussutissarsiutigalugu aalisarsinnaanissamut akuersissummik qinnuteqarnermi paasissutissat pisariaqartut makkuusut ilanngullugit nassiutissavatit:

  • Imarsiornermut ilinniarsimanermik allagartat ilanngunneqassapput
  • Aalisarnermut piniarnermullu peqatigiiffimmit oqaaseqaat
  • Aalisarnermik sulisitsisumit oqaaseqaat
  • Inuussutissarsiornermut siunnersortimit oqaaseqaat

Sinerissap qanittuani aalisariutinut piumasaqaatit:

  • Angallat aalisariutaatit 6 meterit sinnerlugit takissuseqarpat angallat inuussutissarsiutitut akuerisaasimassaaq aammalu Imarsiornermut Aqutsisoqarfimmi nalunaarsorsimassalluni. Angallativit nalunaarsortinnissaa nammineq akisussaaffigaat. Aalisarsinnaanermik akuersissummik qinnuteqaatinnut angallativit nalunaarsorsimaneranut uppernarsaat ilanngullugu nassiutissavat.
  • Angallat aalisariutaatit 6 meterit sinnerlugit takissuseqarpat naalagaaffimmut atassuteqarneranut allagartaa, angallatip Kalaallit Nunaanneernerannut ilinnillu pigineqarneranut uppernarsaataasoq, aammalu angallatip uuttuutaanut allagartaq aalisarsinnaanermut akuersissummik qinnuteqaammut ilanngullugit kakkiutissavatit.

Aqutsiveqarfiit 

Nipisanniarneq aqutsiveqarfinnut arfineq marlunnut agguagaavoq:

  • NAFO 1A(Qasigiannguit, Ilulissat, Qeqertarsuaq, Uummannaq aamma Upernavik)
  • NAFO 1Ba (Aasiaat)
  • NAFO 1Bb (Sisimiut)
  • NAFO 1C (Maniitsoq)
  • NAFO 1D (Nuuk)
  • NAFO 1E (Paamiut)
  • NAFO 1F (Kujataa)

Ukiumi pisassiiffiusumi ataatsimi aqutsiveqarfinni marlunnut taamaallaat akuersissutinik pissarsisinnaavutit.

Aqutsiveqarfik siullermoortoq angerlarsimaffinniissaaq, aqutsiveqarfiullu aappaa tassaassaaq aqutsiveqarfiup angerlarsimaffigisavit saniliani aqutsiveqarfik.

Piffissaq aalisarsiusoq 

Nipisannik arnarlunniarneq siusinnerpaamik 1. april aallartittarpoq kingusinnerpaamillu 15. juli naammassisarluni. Aqutsiveqarfinni ataasiakkaanni piffissat aalisarfigineqarsinnaatitaasut assigiinngillat, sivisunerpaamillu ulluni 60-ini aalisartoqartarsinnaalluni. Ullut aalisarfiusut amerlassusissaat TAC-lu ataatsikkut ukiut tamaasa aalajangersarneqartarput.

Ukiup ilaagut pisartut nalaanni tamatigut nutaamik piffissaq aallartiffissaq aalajangersaaffigineqassaaq, aamma NAFO-p ataani immikkoortoq ataatsimoortut ataasiakkaarlugit, taamaattorli NAFO 1B immikkoortunut marlunnut agguarneqaqqissimasoq pinnagu.

Najukkami suliffissuarmi aqutsisut aalisartullu sinniisuat aalisarnerup qaqugu aallartinnissaanut oqartussaasunut innersuussisarput. Aalisarnermut Piniarnermullu Naalakkersuisoqarfiup aallartiffissaq aalajangissavaa.

Aalisarnermut, Piniarnermullu Naalakkersuisoqarfiup immikkoortup ataaniittut tamaasa immikkut ittumik nassuiarlugit aalisarnerup aallartinnera matuneralu nalunaarutigissavai.

Piffissami 16. juli - 1. april arnarlunniaqqusaanngilatit.
Piffissami 16. juli – 31. januar angusallunniaqqusaanngilatit.

Qinnuteqarneq 

Sinerissap qanittuani nipisanniarnissamut akuersissummik qinnuteqarniaruit illit kommuninni inuussutissarsiornermut siunnersortimut saaffiginnissaatit.

Akuersissut ukiumut pisassiiffiusumut ataatsimut atuuppoq ukiullu tamaasa akuersissummik nutaamik qinnuteqartassaatit. Ukioq pisassiiffiusoq 1. januaarimiit 31. decembarip tungaanut atuuttarpoq.

Taamaattorli akuersissutaatit aatsaat akuersissummi allassimasutut ullormiit ukiullu pisassiissuteqarfiusup naanissaata tungaanut atuutissammat eqqaamassavat.

Qinnuteqaatinut nassiussanut suleriaatsit 

Sinerissap qanittuani aalisarsinnaanermut akuersissummik qinnuteqaatit kommunimi najugarisami suliarineqartarput. Inuussutissarsiutigalugu aalisartunut piumasaqaatit eqquutsikkukkit, akuersissummik tunineqarsinnaavutit.

Maluginiassavat nipisanniarnissamut siusinnerusukkut akuersissummik pigisaqarnikuusimanngikkuit nipisanniarnissamut akuersissummik pissarsisinnaannginnavit (nutaamik aalisalersut). Tamanna ukiuni marlunni atuuttussanngortinneqarpoq 31.marts 2021-mit – 28. februar 2023-mut.

Umiatsiaararsorluni aalisarneq

  • Umiatsiaararsorluni aalisarnermut akuersissutaatit nutartissagukku kommunip akuersissusiussinnaavaatit.

Angallatinik aalisarneq

  • Angallammik aalisarsinnaanermut akuersissutaatit nutartissagukku, taava qinnuteqaatit kommunip Aalisarnermut Piniarnermullu Naalakkersuisoqarfimmut ingerlateqqissavaa, taassumalu qinnuteqaatit suliarissavaa.

Qinnuteqaatinnut ileqquusutut ullut qulit ingerlaneranni akissutisissaatit. Qinnuteqaativit suliarineqarnissaanut paasissutissat amigarpata attavigineqarumaarputit.

Qinnuteqariaatsimut apeqqutissaqaruit Aalisarnermut Piniarnermullu Naalakkersuisoqarfimmut attaveqarnissannut tikilluaqqusaavutit.

Piffissaliussat 

Nipisanniarsinnaanissamut akuersissummik ukioq kaajallallugu qinnuteqartoqarsinnaavoq.

Maalaaruteqarneq 

Oqartussat naliliinerat aallaaviatigut naammagittaalliutigisinnaanngilat. Qinnuteqaatit akuerineqarsimanngippat, tunngavilersuummik tunineqassaatit. Isumaqaruit aalajangiineq kukkusumik tunngaveqartoq imaluunniit paatsuuisoqarsimaneranik tunngaveqartoq taava naammagittaalliutit Aalisarnermut, Piniarnermullu Naalakkersuisoqarfimmut nassiutissavat, tassanilu suliaq ilinnut tunngasoq nalilersoqqinneqarsinnaavoq. Itigartitsissummik tigusaqaruit piaarnerpaamik Aalisarnermut Piniarnermullu Naalakkersuisoqarfimmut naammagittaalliutit nassiutissavat.

Allakkatigut maalaaruteqassaatit, allallugulu sooq sunalu pillugu maalaaruteqarnerlutit. Eqqaamajuk naammagittaalliuutigerusutat pillugu aalajangiinerup assilinera ilanngutissagakku, taannami suliap ingerlanneqarneranut iluaqutaassammat.

Aalisarnermut, Piniarnermullu Naalakkersuisoqarfiup naammagittaalliutit isummersorfigissavaa suliarlu misissorneqareerpat attavigineqarumaarputit.

Aamma atuarsinnaasatit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aalisarnermut Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: aalisa@nanoq.gl
Nittartagaq: www.apn.gl