airplanebooksbriefcase business cogs cross election entertainment fish house law lockmedicalpeopleselfservices socialtax

Saattuarniarnissamut akuersissummik qinnuteqarit

Paasissutissat nalinginnaasut 

Inuussutissarsiutigalugu aalisartuuit imaluunniit inuussutissarsiutigalugu aalisartunngorusuppit, taava saattuarniarsinnaanermut akuersissutaateqassaatit. Malugiuk ukiut tamaasa aqutsiveqarfinnut taamaallaat 3-inut akuersissummik pisinnaagavitt. 

Saattuarniarneq aqutsinermut pilersaarut malillugu ingerlanneqarpoq.

Una toorlugu “Kitaani saattussanut aqutsinissamik pilersaarut” aajuk

 

Piumasaqaatit 

Inuussutissarsiutigalugu aalisartuuguit imaluunniit inuussutissarsiutigalugu aalisartunngoorusukkuit sinerissap qanittuani saattuarniarsinnaanermut aalisarnermut akuersissutaateqassaatit. 

Aalisarnermi akuersissut tassaavoq aalisakkanik  pisassiissutigineqartunut malittarisassaqartinneqartunillu inuussutissarsiutigalugu aalisarsinnaanermut akuersissut.

  • Aalisarnermi piniutit piginnittup aqqanik, angallatip aqqanik angallatilluunniit normuanik nalunaaqutsersimassapput.
  • Aalisarnermi atortuutinnik annaasaqaruit taakku qaqinnissaannut pisussaatitaavutit, qaqinnissaallu iluatsinngitsoorukkit aalisarnermi atortuutitit annaasatit katatatilluunniit uunga nalunaarutiginissaat pisussaatitaavutit: kommunerisannut imaluunniit gflk@nanoq.gl

Aalisakkanik malittarisassaqartinneqartunik pisassiiffiusunillu aalisarniaraanni akuersissummik qinnuteqassaatit.
Tamanna atuuppoq:

  • Inuussutissarsiutigalugu umiatsiaararsorluni aalisartuugaanni imaluunniit aalisartuuniaraanni
  • Angallammik aalisartuugaanni imaluunniit aalisartuuniaraanni

Tamatuma sanitigut qinnuteqarnermi naatsorsuutigineqarsinnaanermut piumasaqaatit tunngavissallu arlallit naammassisimassavatit.
Akuersissummik qinnuteqarsinnaavutit:
• Nammineq inuttut
• Umiarsuaatileqatigiittut
• Ingerlatseqatigiiffittut

Aalisarsinnaanermut akuersissut aalisarnernut ukununnga atuuppoq:
• Aalisakkamut aalajangersimasumut
• Sumiiffimmut aalajangersimasumut ataatsimut
Ukiumi ataatsimi januarip aallaqqaataaniit decembarip 31-anut

Umiatsiaararsorluni inuussutissarsiutigalugu aalisarnissamut qinnuteqaruit ilanngussat attuumassutillit ataani allaqqasut kakkiutissavatit:

  • Imarsiorsinnaanermik ilinniarsimanermik allagartat ilanngunneqassapput
  • Aalisarnermut piniarnermullu peqatigiiffimmit oqaaseqaat 
  • Aalisarnermit sulisitsisumit oqaaseqaat
  • Inuussutissarsiutigalugu siunnersortimit oqaaseqaat

Sinerissap qanittuani aalisariutinut piumasaqaatit

  • Angallatit 6 meterit sinnerlugit takissuseqarpat angallat inuussutissarsiutitut akuerisaasimassaaq aamma Søfartsstyrelsenimi nalunaarsorsimassaaq. 
    Angallatit nalunaarsortinnissaa nammineq akisussaaffigaat. 
    Aalisarnissamut akuersissuteqalernissamut qinnuteqaatinnut angallatit nalunaarsorsimaneranut uppernarsaat ilanngullugu kakkiutissavat.
  • Aalisariutaatit 6 meterit sinnerlugit takissuseqarpat naalagaaffimmut atassuteqarneranut allagartaa, angallat Kalaallit Nunaanneernerannut ilinnilu pigineqarneranut uppernarsaataasoq, aammalu angallatip uuttuutaanut allagartaq aalisarnissamut akuersissummik qinnuteqaammut ilanngullugit kakkiutissavatit.

 

Aqutsiveqarfiit 

Sinerissap qanittuani saattuarniarnissamut aqutsiveqarfiit arfineq-pingasuupput, taakkununngalu pisassiissutinik ukiut tamaasa aalajangersaasoqartarpoq:

  • Upernavik
  • Qeqertarsuup Tunua – Uummannaq
  • Sisimiut, sinerissap qanittuani
  • Sisimiut, avataani
  • Maniitsoq – Kangaamiut
  • Nuuk – Paamiut, sinerissap qanittuani
  • Nuuk – Paamiut, avataani
  • Narsaq – Qaqortoq

 Saattuarniarniaruit ukiumut annerpaamik aqutsiveqarfinni pingasuni saattuarniarsinnaavutit.

 

Piffissaq aalisarfiusoq 

Saattuarniarnermi aqutsiveqarfinni aalisarnermut piffissarititaasoq assigiinngisitaarpoq:

  • Aqutsiveqarfinnut Narsamiit Qaqortumut aamma Nuummiit Paamiunut ukioq pisassiiffiusoq 1. januarimiit 31. decemberimut sivisussuseqarpoq.
  • Aqutsiveqarfinnut Maniitsumiit Kangaamiunut, Sisimiuni, Qeqertarsuup Tunuaniit Uummannamut aamma Upernavimmi ukioq pisassiiffiusoq 1. aprilimiit 31. decemberimut sivisussuseqarpoq.

 

Qinnuteqarneq 

Sinerissap qanittuani saattuarniarnissamut akuersissummik qinnuteqarniaruit kommunerisanni inuussutissarsiornermut siunnersortimut saaffiginnissaatit.

Aalisarnissamut akuersissutit sinerissamut qanittumi avataasiorlunilu aalisarnernut atortussanngortinneqartarput. Akuersissut ukiumut pisassiiffiusumut ataatsimut atuuppoq, taamaattumillu ukiut tamaasa akuersissummik nutaamik qinnuteqassaatit.

Akuersissutaatit ullormit akuersissummi allassimasumiit ukiup pisassiiffiusup naanissaanut taamaallaat atuutissammat eqqaamassavat.

 

Qinnuteqaatit nassiunneqartut suliarineqarneri 

Aalisarsinnaanermut akuersissummik qinnuteqaatit kommunerisanni suliarineqartarput.

Inuussutissarsiutigalugu aalisartunut piumasaqaatit naammassigukkit akuersissummik tunineqarsinnaavutit.

Eqqumaffigissavat, siornatigut saattuarniarnermut akuersissuteqarsimanngikkuit (ingerlataqartuuguit nutaaq) ukiuni marlunni, 1. Januar 2021-miit 31. December 2022-mut, saattuarniarnermut akuersissummik tunineqarsinnaanngilatit.

Umiatsiaararsorluni aalisarneq

  • Umiatsiaararsorluni aalisarnermut akuersissutaatit nutartissagukku kommunip akuersissusiussinnaavaatit.

Angallatinik aalisarneq

  • Angallammik aalisarnermut akuersissutaatit nutartissagukku, taava qinnuteqaatit kommunip Aalisarnermut Piniarnermullu Naalakkersuisoqarfimmut ingerlateqqissavaa, taassumalu qinnuteqaatit suliarissavaa.

Qinnuteqaatinnut ileqquusutut ullut 14-t ingerlaneranni akissutisissaatit Qinnuteqaativit suliarineqarnissaanut paasissutissat amigarpata, attavigineqarumaarputit.
Qinnuteqariaatsimut apeqqutissaqaruit Aalisarnermut Piniarnermullu Naalakkersuisoqarfimmut attaveqarsinnaavutit.

 

Aalisarnermut atortunut piumasaqaatit 

Qassutit annaasat aalisartualernissaannik pinaveersaartitseqataasumik pullatit qimaaffissaqarnissaat anguniarlugu, saattussanut pullativit qassutaanni allunaasamik, uumassusilinnit nungutinneqarsinnaasumik qimaaffissatut aniffissaliornissat piumasaqaataavoq.

Saattussanut pullatit minnerpaamik ataatsimik qimaaffissaqassapput, taakkulu allunaasamik bomuldiusumik matoqqatinneqassapput. Allunaasaq bomuldiusoq nigartat affaannut 12-inut ikkunneqassaaq.

Allunaasaq bomuldiusoq atorneqartoq annerpaamik 96-inik allunaasartaatigut ujalussiaqassaaq.

Uani nigartat affaanni allunaasaq bomuldiusoq qanoq ikkutissanerit takutinneqarpoq:

Assiliaq: KANUAANA

Aalisarnermut atortuutivit naleqqussarnissaannut piffissaqarluarnissat qulakkeerniarlugupiffissaliisoqarpoq. Taamaammat qimaaffissaliornissamut piumasaqaat aatsaat 1. januar 2022-mi atuutilissaaq.  Taamaasillutit aalisarnermut atortuutivit naleqqussarnissaannut ukioq 2021 tamaat periarfissaqarputit.

 

Piffissaliussat 

Ukioq kaajallallugu saattuarniarsinnaanermut qinnuteqarsinnaavutit.

 

Maalaaruteqarneq 

Oqartussat naliliinerat aallaaviatigut maalaarutigisinnaanngilat.

Qinnuteqaatit itigartinneqassappat tunngavilersuummik tigusaqarumaarputit.

Isumaqaruit aalajangiineq kukkusumik tunngaveqartoq imaluunniit paatsoortoqarsimasoq, taava maalaaruteqarnerit Aalisarnermut Piniarnermullu Naalakkersuisoqarfimmut nassiutissavat, tassanilu suliaq ilinnut tunngasoq nalilersoqqinneqarsinnaavoq.

Itigartitsissummik tigusaqaruit sukkanerpaamik Aalisarnermut Piniarnermullu Naalakkersuisoqarfimmut maalaarutit nassiutissavat.
Maalaarutit allakkatigut ingerlanneqassaaq, aamma sooq sunalu pillugu maalaaruteqarnerlutit allassavat. Eqqaamajuk maalaarutigerusutat pillugu aalajangiinerup assilinera ilanngutissagakku, taannami suliap ingerlanneqarneranut iluaqutaassammat.

Aalisarnermut Piniarnermullu Naalakkersuisoqarfiup maalaaruteqarnerit isummersorfigissavaa, suliarlu misissoreerunikku attavigalutit.

 

Aamma atuarsinnaasatit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aalisarnermut, Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apn@nanoq.gl
Nittartagaq: www.apn.gl