airplanebooksbriefcase business cogs cross election entertainment fish house law lockmedicalpeopleselfservices socialtax

Qaleralinniarneq

Malugiuk: Sinerissap qanittuani inuussutissarsiutigalugu aalisartuuguit umiatsiaaqqamik/angallamilluunniit qaleralinniarniaruit aalisarnissamut akuersissummik pissarseqqaartariaqaravit.

Paasissutissat nalinginnaasut 

Inuussutissarsiutigalugu qaleralinnik aalisarniaruit aalisarsinnaanermut akuersissummik atorsinnaasumik peqartariaqarputit.

Qaleralinniarnissamut immikkut piumasaqaatit malittarisassallu quppernermi uani atuarsinnaavatit. Inuussutissarsiutigalugu aalisartutut aalisarnermut malittarisassat piumasaqaatillu aalajangersarneqarsimasut malinnissaannut pisussaaffeqarputit. Tamatumalu saniatigut ileqqorerqqusat kommunerisannut immikkut atuutsinneqartut sorlu sumiiffiit eqqissisimatitat illersorneqarnissaannut tunngasut malinneqartussaapput.  Kommunini ileqqoreqqusat inatsisit.gl-imi paasisaqarnerusinnaavutit.

Inuussutissarsiutigalugu aalisartutut nalunaaruteqartarnissamik pisussaaffeqarputit. Pisarisatit sanitigullu pisarisuukkatit nalunaarutigisartussaavatit. Saniatigut pisarisuukkat tunineqarsinnaanngitsut tassaapput aalisakkat, timmissat, miluumasut imarmiut, pupiit koral-illu.

Pinngortitap eriagineqarnissaanut nammineerlutit akisussaaffeqarputittaaq. Imaq ataatsimoorluta isumalluutigaarput ataatsimoorlutalu aamma akisussaaffigalutigu.

Qaleralinniarneq aqutsiveqarfinnut agguataarneqarnikuuvoq. Aqutsiveqarfiit immikkut tamarmik pisassiiffigineqarput. Aalisarneq paggatassiinertut ingerlanneqartarpoq, tassanilu aalisartut tamarmik pisassiissutinut taakkununnga aalisartarput. Pisassiissutit tamakkerlugit aalisarneqarneqareeraangata aalisarneq unitsinneqartarpoq.
Aqutsiveqarfik 47-mi angallatinut meterinik 6-nit anginerusunut pisassiissuteqartoqarpoq, umiatsiaaqqanullu (meterit 6-init mikinerusunut) pisassiissuteqartoqarluni.  Aqutsiveqarfinni allani angallatit umiatsiaaqqallu pisassiissutit ataatsimut aalisartarpaat.

Aqutsiveqarfiit 

Qaleralinniarneq sinerissap qanittuani avataanilu ingerlanneqartarpoq.

Sinerissap qanittuaniittumi qaleralinniarneq aqutsiveqarfinnut arfineq pingasunut agguagaavoq:

  • Aqutsiveqarfik 42 - Qaanaaq
  • Aqutsiveqarfik 47 - Upernavik
  • Aqutsiveqarfik 47 – Uummannaq  
  • Aqutsiveqarfik 47 - Qeqertarsuup Tunua
  • Aqutsiveqarfik 48 - Sisimiut-Maniitsoq
  • Aqutsiveqarfik 49 - Nuuk
  • Aqutsiveqarfik 50 - Paamiut-Qaqortoq:
  • Aqutsiveqarfik 3 – Kalaallit Nunaata kangia

Aqutsiveqarfik 47-mi pisassiissutit nammineq pigisat niuerutigineqarsinnaasut (IOK) 

Sinerissap qanittuani aqutsiveqarfinni Qeqertarsuup Tunuani, Upernavimmi Uummannamilu (aqutsiveqarfik 47-mi) angallat atorlugu inuussutissarsiutigalugu qaleralinniarniaruit taava pisassiissutinik nammineq pigisanik pigisaqassaatit.  
Taamaaliortariaqarputit aqutsiveqarfimmi tassani pisassiissutit nammineq pigisat niuerutigineqarsinnaasut atorneqarmata (IOK).  

IOK isumaqarpoq angallat atorlugu qaleralinniarnissamut pisassiissutinik nammineq pigisanik pigisaqartussaasutit.  
Aqutsiveqarfinni ataasiakkaani tamani Qeqertarsuup Tunuani, Upernavimmi Uummannamilu qalerallit pisassat tamarmiusut (TAC) Naalakkersuisunit ukiut tamaasa aalajangersarneqartarput. Tamatuma kingorna TAC sumiiffinni assigiinngitsuni umiatsiaaqqamik aalisarluni pisassiissutitut aamma angallammik aalisarluni pisassiissutitut agguataarneqartarput. Angallatinut pisassiissutit nammineq pigisat malillugit pisassiissutinik pigisaqartunut assigiinngitsunut agguaasoqartarpoq.

IOK-aalisarneq pillugu paasisaqarneruniaruit una tooruk

Aalisarnermut atortuutinut piumasaqaatit 

Qaleralinniarnermi aalisaatit makku atorneqarnissaat piumasaqaataavoq:

  • Sinerissap qanittuani qassutinik, ungusiniutinik qalorsuarnilluunniit qaleralinnik aalisarneq akuerineqanngilaq.
  • Piffinni aalajangersimasuni immikkut ittumik akuersisoqarneqaratigut qassutit atorlugit aalisartoqarsinnaavoq. Tamannalu Kommunemi angerlasimaffigisarni kommunep malittarisassaani takuneqarsinnaapput. Taakkualu inatsisit.gl-mi nassaarisinnaavatit.
  • Qaleralinniarluni aalisarnermi atortut aalisarnermi atortunut allanut minnerpaamik 50 meter-inik ungasissusilerlugit inissinneqassapput.
  • Aalisarnermut atortuutit piginnittup aqqanik aamma/imaluunniit angallatip taaguutaanik ersarissumik ilisarnaaserneqarsimassapput. Nalunaaqutsiussat imermit arrortinneqarsinnaassanngillat.
  • Aalisarnermut atortuutit tamarmik atorneqareeraangata peertarnissaat nammineerlutit akisussaaffigaat. Aalisarnermut atortuutit nalunaaquttap akunneri 24-t iluanni qaqissinnaassanngikkukkit tamanna KANUAANA-mut nalunaarutigissavat. 3 sømilit iluanni tunngaviusumik killeqarfiup iluani atortuutitit annaasimagukkit tamanna aamma kommunimut nalunaarutigissavat.

Akuersissut 

Inuussutissarsiutigalugu aalisartutut qaleralinnik aalisarniaruit aalisarsinnaanermut akuersissummik peqartussaavutit.  

Umiatsiaararsorlutit inuussutissarsiutigalugu aalisartuuguit aalisarsinnaanermut akuersissummik pissarsiniarlutit kommunimutsaaffiginnissaatit.
Angallammik inuussutissarsiutigalugu aalisartuuguit qarasaasiaq atorlugu internettikkut aalisarsinnaanermut akuersissummik qinnuteqarsinnaavutit.

Malugiuk: Aqutsiveqarfik 47-mi inuussutissarsiutigalugu qaleralinniarnernut qinnuteqartunut nutaanut akuersissutit unitsinneqarnikuupput.  

Aamma atuarsinnaasatit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aalisarnermut Piniarnermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: aalisa@nanoq.gl
Nittartagaq: www.apn.gl