airplanebooksbriefcase business cogs cross election entertainment fish house law lockmedicalpeopleselfservices socialtax

Aalisariutinik qaleralinniarnissamut pisassiissutit

Nalinginnaasumik paasissutissiineq 

Aalisariutinut aqutsisoqarfinni Qeqertarsuup Tunuani, Upernavimmi Uummannamilu sinerissamut qanittumi qaleralinnik aalisartunut malittarisassat, umiatsiaaqqanut aqutsiveqarfimmi aalisartunut malittarisassanit allaanerussuteqarput.

Angallatit pisassiissutinik nammineq pigisanik niuerutigineqarsinnaasunillu pigisaqarput, tassalu imaappoq angallammik qaleralinniarniaraanni pisassiissutit ilaannik pigisaqartoqartariaqartutit.

Naalakkersuisut ukiut tamaasa qaleralittassiissutissat aalajangersartarpaat. Angallatinut pisassiissutit ilaannik pigisaqarneq malillugu pisassiissutinik pigisaqartunut assigiinngitsunut agguaanneqartarput.

 

Piumasaqaatit 

Aalisariutinik qaleralinniarnissamut pisassiissuteqaruit, imaluunniit aalisariutinik qaleralinniarnissamut pisassiissutinik pisiniaruit aqutsiveqarfinnut Qeqertarsuup Tunuanut,Upernavimmut Uummannamulluunniit piumasaqaatinut pisussaafinnillu naammassinnissinnaasariaqarputit;

    • Kalaallinut inuiaqatigiinnut aalajangersimasumik attuumassuteqassaaq,
    • Kalaallit Nunaanni inuit nalunaarsorsimaffianni nalunaarsorsimassaaq ukiullu siuliini marlunni Kalaallit Nunaanni inuit nalunaarsorsimaffianni nalunaarsorsimassalluni,
    • Kalaallit Nunaanni tamakkiisumik akileraartartuusaaq ukiullu siuliini marlunni Kalaallit Nunaanni akileraartartuusimassalluni aammalu,
      * Ingerlatseqatigiiffik aktiaateqarluni ingerlatseqatigiiffiussaaq, piginneqatigiilluni ingerlatseqatigiiffiussaaq,
  • Aalisarnermi atortuni attavigineqarnissamut paasissutissiinissamik pisussaatitaavutit, soorlu ateq, kinguliaq, angallatip aqqa, angallatillu GR normua.
  • Aalisaatit annaasatit qaqissallugit pisussaatitaavutit, qaqeriarnissaannillu iluatsitsinngikkuit aalisaatit annaasatit kommuninnut nalunaarutigissallugit pisussaatitaavutit aamma uunga gflk@nanoq.gl

Sinerissap qanittuani aalisariutinut piumasaqaatit

  • Aalisariutaatit 6 meterit sinnerlugit takissuseqarpat angallat inuussutissarsiutissatut akuerisaassaaq aamma Søfartsstyrelsenimi nalunaarsugaassimassalluni. Angallativit nalunaarsorneqarnissaa nammineq akisussaaffigivat. Angallatip nalunaarsugaanera qinnuteqaammi immersukkami ilanngunneqassaaq, aalisarnissamut akuersissummik qinnuteqaammut ilaliussatut.
  • Aqutsiveqarfimmi 46-mi angallat qaleralinniarnermut atorneqarsinnaasoq annertunerpaamik 75 BRT/120 BT-nik usitussuseqarsinnaavoq.
  • Aqutsiveqarfimmi 47-mi angallat qaleralinniarnermut atorneqarsinnaasoq annertunerpaamik 19,99 BRT/31,99 BT-nik usitussuseqarsinnaavoq.
  • Aalisariutaatit 6 meterit sinnerlugit takissuseqarpat naalagaaffimmut atassuteqarneranut uppernarsaat illillu angallatit kalaallit nunaannut attuumassuteqartoq illillu angallammut piginnittuusutit aammalu angallatip uuttuutaanut allagartaq angallatip annertussusaanik takussutissiaq aalisarnissamut akuersissummik qinnuteqaammut ilanngunneqassapput.

 

Pisassiissutinik nuussineq 

Pisassiissutit eqaatsumik atornissaannut periarfissamik inatsisitigut ammaassisoqarpoq, ukiumi pisassiissutit aalisarneqanngitsut ukiumi tulliuttumi aalisarneqarsinnaanngorlugit. Taamatuttaaq ukiumut tulliuttumut pisassiissutit siumut aalisarneqarsinnaapput. 'Pisassiissutinik nuussineq' oqariartaasiuvoq ulluinnani atugaasartoq. Periarfissat marluk atorlugit nuussisoqarsinnaavoq – siumoortumik kingumoortumillu.

  • Ukiumut pisassat ukiumi aalajangersimasumi aalisarneqanngitsut ukiup tulliani 01. juli tungaanut aalisarneqarsinnaapput. Tamanna pisarpoq, Aalisarnermut, Piniarnermut Nunalerinermullu Naalakkersuisoqarfimmit (ataani Naalakkersuisoqarfimmi taaneqalersumik) ukiup siuliani sinneruttut ukiumut tulliuttumut pisassiissuteqarfiusumut nuunnerisigut. Ukiumut pisassiissutit aalisarneqanngitsut Naalakkersuisoqarfimmit siumut nammineq nuunneqassapput akuersissullu iluarsisaq tunniutissavaa. Ukiumut pisassiissutit pisarineqanngitsoortut ukiup tullianut nuutat niuerutigineqarsinnaanngillat, kingusinnerpaamillu 01. juli aalisarneqarsimassallutik.
  • Umiarsuaatileqatigiiffik ukioq naatsinnagu pisassiissutiminik tamakkerlugit aalisartoq, Naalakkersuisoqarfimmut qinnuteqareernikkut 15. novembarimiit ukiumi tulliuttumi pisassiissutinik aalisarluni aallartissinnaavoq. Tamanna pisarpoq, pisassiissutit aalajangersimasumik annertussusillit ukiumut pisassiiffiusumut ilanngunneqarnissaannik qinnuteqarnikkut. Ukiumut tulliuttumut pisassiissutinik umiarsuaatileqatigiiffimmit atoneqarsinnaasut annertussutsit taakku pisassiissutinit ilanngaatigineqassapput. Taamatut iliuuseqarneq akuersissutinik Naalakkersuisoqarfimmi suliarineqartarpoq, ilinnullu akuersissut iluarsisaq nassiunneqartarpoq.

 

Suliamik ingerlatseriaaseq 

  • Qalerallit pillugit pisassiissutitigut aaqqissuussineq pisassiissutinik nammineq pigisanik niuerutigineqarsinnaasunillu tunngaveqarpoq. Tamanna ima paasineqassaaq; angallataatillit TAC-imit (Total Allowable Catch/Pisassat akuerineqarsinnaasut tamarmiusut) tamarmiusumit pisassiissutit ilaannik pigisaqartuussasut. Tassa imaappoq angallammik qaleralinniarnermi peqataasinnaanermut angallammik piginnittut pisassat ilaannik pisassiissutinillu pisissasut.
  • Pisassiissutit ilaannik pigisaqaruit Naalakkersuisoqarfiup ukiut tamaasa aalisarnermut akuersissut nassiutissavaa, tassanilu pisassiissutit ilaannik pigisatit aallaavigalugit pisassinneqarnerit aalajangersarneqarsimassaaq. TAC Naalakkersuisunit aalajangerneqareeriarpat taanna nassiunneqassaaq.
  • Pisassiissutit ilaannik pigisaqaruit piginnittunit tuniniaarusuttunit ukiumut pisassanik amerlanerusunik pisisinnaavutit. Pisassiissutinik niueqatigiinnerit tamaasa Naalakkersuisoqarfimmit atorsinnaanissaat siunertaralugu akuerineqassapput. Taamaattumik pisinermik isumaqatigiissutit tamarmik akuerisassanngorlugit nassiunneqassapput, uunga aalisa@nanoq.gl. Pisassanik pisinissamut aqutsiveqarfinni Qeqertarsuup Tunuani, Uummannami Upernavimmilu pisassiissutit ilaannik peqarnissaq piumasaqaataavoq.
  • Niuerneq Naalakkersuisoqarfimmit akuerineqareerpat aalisarnermut akuersissutit nutaat ilinnut nassiunneqassapput.

 

Pisassiissutit ilaannik pisineq tuniniaanerlu 

Qaleralinniarsinnamut aqutseriaaseq Qeqertarsuup Tunuanut, Upernavimmut Uummannamullu pisassiissutinut immikkoortunik niuerneqarsinnaasunillu tunngaveqarpoq (individuelt omsættelige kvoter, IOK). Tamanna isumaqarpoq illit imaluunniit piginneqatigiiffiit pisassiissutinit tamarmiusunit, TAC-mit (Total Allowable Catch, pisarineqarsinnaasut tamarmiusut)pigisaqarsinnaasutit. Taamaattumillu angallammik qaleralinniaqataaniaruit aqutsiveqarfimmi pisassiissunik ukiumullu pisassamik pisisariaqassaatit.

Pisassiissutit ilaannik piserusukkuit qaleralinnut pisassiissutinik niuerfimmi pisassiissutaatilinnit assigiinngitsunit taamaaliorsinnaavutit. Pisassiissutinik niuerfimmi pisassiissutinit annertussutsit aalisarneqarsimanngitsut pillugit takussutissiaqarpoq, taannalu Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) saaffiginninnikkut nassiunneqarsinnaavoq. Naalakkersuisoqarfiup qaleralittassiissutinik niuernerit tamaasa akuerissavai. Taamaatumillu niueqatigiinnermut isumaqatigiissutit tamarmiusut Naalakkersuisoqarfimmut nassiunneqassapput. aalisa@nanoq.gl

Qaleralinnik ukiumut pisassiissutinik imaluunniit sinerissamut qanittumi qaleralinniarnermi pisassiissutit ilaannik pisinermi/tunisinermi immersugassaq aajuk.

 

Aamma atuarsinnaasatit

Qeqqata Kommunia
Postboks 1014
3911 Sisimiut
Oqarasuaat: (+299) 70 21 00
Fax: (+299) 70 21 77
E-mail: qeqqata@qeqqata.gl
Nittartagaq: www.qeqqata.gl
Aalisarnermut, Piniarnermut Nunalerinermullu Naalakkersuisoqarfik
Imaneq 1A, 701
Postboks 269
3900 Nuuk

Oqarasuaat: (+299) 34 50 00
Fax: (+299) 34 63 55
E-mail: apnn@nanoq.gl
Nittartagaq: www.apnn.gl