Qeqqata Kommuniata nutaamik suliniuteqarnermini Peqqinnartumik sammisassaqarfiusumillu ukioqqortusiartorneq utoqqaat isumassarsiaat, namminnerlu kissaatiminnut pisariaqartitaminnullu ilisimasaat tunngavissiipput. Ilisimatusarnermik, ineriartortitsinermillu suliniut Issittumi Utoqqalineq kiisalu ilisimatusarnermi attaveqaqatigiiffik APEN suleqatigalugit, suliniut ingerlanneqarpoq. Sisimiuni Niviarsiat-ni utoqqarnut pisinnaanerusunut inissiaqarfiup eqqaatungaa utoqqarnit atorluarneqarsinnaanngorlugu naleqqussarneqarnissaa suliniutitigut siunertaavoq. Niviarsiat eqqaani qaqqajunnaq utoqqarnit pitsorlunngitsunit pisuttuarfittut, ikumaartitsinernut nuniannermullu massakkut atorneqartarpoq. Taamaattumik pitsorluttut kaassuartaatinillu atuisut qaqqajunnamukarsinnaanngortinneqarnissaat siunertaavoq.Isumalluarnarpoq, qanorlu inerneqarumaarnerata takunissaa qilanaaraara. Siunissamut isumalluartippaatigut. Kommunip utoqqaat eqqarsaatigigaat, puigorneqanngitsugullu misinnarpoq, taama 69-inik ukiulik Pavia Olsen, utoqqarnut pisinnaanerusunut inissiat 2013-imi juulip qaammataani naammassineqarmatali najugaqartoq oqarpoq.
Utoqqaat najugaqartut sisamariarlutik naapinnerisigut, suliniummik suliaqartut ilusilersuipput. Isumassarsiap pinngoqqaarneranit ilusilersuinermi utoqqaat peqataatinneqarnissaat siunertaavoq, utoqqaallu ilisimasaqarluartutut isigineqarlutillu aaqqiissutissatut toqqarneqartunut sunniuteqartorujussuupput.
Utoqqaat eqqaminni pilersitassatut kissaatitik takussutissaaqqatigut, assitigut, titartaanikkut, ujaqqatigut, nunap assingatigut post-it-illu atorlugit isumassarsialatsiarpassuit pilersippaat.
Utoqqaat isumassarsiaat pimoorunneqarlutik workshop-ernerini pulaarsinnaagama nuannerpoq. Suliagut innuttaasut pisariaqartitaannut naleqqussarsinnaaqqullugit, innuttaasunik taamatut oqaloqateqartarneq pingaarsoraara. Neriuppunga aamma suliniutitigut utoqqaat ulluinnarni pisuttuartarnissaminnut, silaannarissartarnissaminnullu periarfissaqarnerulissasut, taamak Borgmesteri Malik Berthelsen oqarpoq.
Ilusilersuinermi angusat suliniutip inaarutaasumik ilusilersorneqarnissaannut tunngavissiissapput, isumassarsiallu piviusunngortinneqarnissaannut siunissami qaninnerusumik aningaasassarsiortoqassalluni.
Innuttaasut akuutinneqartarnissaanni suliniutip aallaavigineqarnissaanut periarfissagissaarpoq, soorluttaaq Qeqqata Kommuniani siunissami assingusumik suliniuteqarnissami ilisimasanik pissarsiffiussasoq. Atuisunut naleqassuseq annertooq pilersinneqassaaq, innuttaasullu inuiaqatigiinni eqeersimaartumik peqataanerat annertusarneqassalluni.
Paasissutissat sukumiinerusut
Mathias Dahl 867476 Ineriartortitsinermi ingeniøri
Marianne Olsen 864284 Angerlarsimaffimmi ikiorteqarfik