Tamannalu anartarfiit imaannik aamma imermik errortuivikumik eqqaaneq pillugu Namminersorlutik Oqartussat nalunaarutaat nr.10, 12.juni 2015-imeersoq, §20 malillugu, ingerlatsinermut aningaasartuutinut matussutissanik kiisalu siunissami imermik errortuivikumut kuuffeqarfinnik iluarsaassinermut taarsiinermulluunniit atugassanik kommunalbestyrelsi akiliuteqartitsisinnaavoq.
Tamannalu periarfissap malinneqarnissaa kommunalbestyrelsimiit toqqarparput. Pissutigalugu sullissinnerit suulluunniit tamarmik akeqarnerat tamatta ilisimavarput innuttaasutullu tamatta piumasaralutigu sullissinermi atugassarititaasut naammaginartuunissaat. Matumanilu kuuffissuit ingerlanneqarnerinut iluarsaanneqartarnerinullu, soorlu milittoorsimatillugit ammarsarneqartarnerinut, qerisoorsimatillugit aattorsarneqartarnerinut il.il ukiumut 1.6 mio.kr. missaanik kommunimi aningaasartuuteqartarpugut. Taakkualu aningaasartuutit allat assigalugit taamaallaat akileraartartut atuisulluunniit akiliutaasigut matussuserneqarsinnaapput.
Isumaqarpungalu kommunimi teknikkimut tunngassuteqartuni aningaasaqarnikkut unammillernartoqartitsinerput paasitissallugu pingaaruteqartoq. Tassami eqqaavissuarni ikuallaaviit ingerlanneqarnerinut, eqqaaviit anartarfiillu imaarneqartarnerinut, bus-it kalaalimineerniarfiillu ingerlanneqarnerinut aningaasartuutigut atuisut akiliutaannik annertunerupput. Tamannalu isumaqarpoq aningaasartuutit isertitallu oqimaaqatigiissappata atuisut akiliutaat ullumikkorniit annertunerusussaagaluartut.
Taamaakkaluartoq innuttaasut inuuniarnikkut artukkinnginnissaat pingaartillutigu ingerlatsinermi aningaasartuutiviit ilaannut matussusiiniarlututa ukiunut arlalinnut siaarlutigit qaffaanerit ingerlattarpagut, soorlu anartarfiit eqqaaviillu imaarneqartarnerinut. Uanilu kuuffissuit iluarsaanneqartarnerannut akiliuteqartitsisalernissaq angerlarsimaffimmut ataatsimut ukiumut 357kr., agguaqatigiissillugu ullormut 1kr., naatsorsuutiginngilarput inuuniarnermi ajornerusumik kinguneqartitsissasoq.
Eqqaasitsissutigerusupparalu atuisut akiliutaat appartinneqassappata tamanna ileqqutsinnik allanngortitsisariaqarnitsinnik ilaatigut piumasaqaateqarmat, soorlu vådservietsinik igaallu sinnerinik anartarfinnut igitisarnerit unitsinneqartariaqarnerannik. Tamakkuuppummi pisariaqanngikkaluartumik aningaasartuuteqarfiusartut.
- Borgmesteri Malik Berthelsen