Qeqqata Kommuniata Hudson Greenland-imik suleqateqarluarnini nuannaarutigeqaa, kommunimmi annermik nuannaarutigaa aatsitassarsiorfissaq suliffissarsiortunut suliffissaqartitsissammat aammalu suliffeqarfinnut Qeqqata Kommunianiittunut aatsitassarsiorfimmut sullisserusuttunut periarfissiissammat.
Tassunga atatillugu Hudson Greenland aamma Qeqqata Kommunia innuttaasunik Sisimiuni Maniitsumilu suliffissarsiuussisarfinni ataatsimiisitsiniarput ullumikkut aqaguagulu:
Sisimiut marlunngorneq 30. januar 2018 nal. 17.00 - 19.00 Majoriami
Maniitsoq sisamanngorneq 1. februar 2018 nal. 17.00 - 19.00 Majoriami
Hudson Greenland-ip ataatsimiinnermi innuttaasut, suliffissarsiortut kiisalu suliffeqarfiit namminersortut aatsitassarsiorfik pillugu killiffimminnik nassuiaateqarfigissavaat.
Piumasut tamarmik ataatsimiisitsinissanut tikilluaqquneqarput tassani aatsitassarsiorfimmi sammineqassammata suliffiusinnaasut aammalu aatsitassarsiorfimmik sullisserusuttunut.
Paasissutissat.
Hudson Resources Inc. Canadamiunit pigineqartoq aatsitassanik misissueqqaartuuvoq 2003-imiilli Kangerlussuarmi aallartissimalluni. Aallarteqqaarami diamantisiorneq ingerlassimavaa kingornalu Sarfartumi aatsitassat qaqutigoortut misissulersimallugit, kisianni ukiuni kingullerni anorthosit Kangerlussuup saqqaaniittoq ukkatarilersimallugu. Tassani Naajaanik atilimmi anorthosit annertoorujussuaq nassaarisimavaat tuluttut taasaminnik "White Mountain" (qaqqaq qaqortoq). Anorthosit aluminamik, siliciumimik kiisalu calciummimik sananeqaateqarpoq minguitsorujussuaq. Hudson Greenland pillugu annertunerusumik paasisaqarusukkuit tulliuttoq tooruk: http://www.hudsonresources.ca/
Annertunerusumik paasisaqarusukkuit attavigiuk
Peter Søren Olsen
Aatsitassat pillugit Ataqatigiissaaarisoq
Qeqqata Kommunia
Mobil: (+299) 53 08 56