2017-imi atuilluartuunissamik suliniutitsialak Qeqqata Kommuniata toqqaqqammerpaa. Atuilluartuuneq pillugu meeqqat atuarfiani ilinniartitsinermik siuarsaataallunilu innuttaasunut, takornarissanullu kommunip paasissutissiisarneranik siuarsaataasussaq toqqarneqarpoq.
Suliniut sinnerlugu atuilluartuunissamik siunnersortip Else Finne-p nersornaasiineq tiguaa. Nersornaasiinermi diplom-imik, kommunillu atuilluartuunissamik suliniutinut immikkoortitaanit 100.000 koruuninik tunniussisoqarpoq.
- 6. klassimi atuartut atuilluartuuneq, pinngortitarlu pillugit ilinniartinneqartarniassammata, aallaarsimaartarfimmi Assaquttami atugassarititaasut ineriartortinneqarnissaanut aningaasat atorneqassapput. Atuartut pinngortitami namminneerlutik uuttuisarlutillu misissuisinnaasarniassammata, assersuutigalugu namminneq seqinisaatiliorsinnaaniassammata, arsarluunniit qanoq sukkatigisumik kuukkoortinneqarsinnaanersoq namminneq misissorsinnaaniassammassuk, aallaarsimaartarfimmi atortussanik piniassaagut, Else Finne oqaluttuarpoq.
Aningaasat sinneruttut Sisimiuni innuttaasunut, atuartunut takornarissanullu nuannaarutissanngorlugit, atuilluartuunissamik suliniutit pillugit paasissutissiivinnik ikkussuinissamut atorneqassapput.
Suliniut atuarfik takornarialerinerlu ataqatigiissinneqarlutik suliniutinut ilaanera, Qeqqata Kommuniani pisortap sulisuinut pisortap HC Sværd-ip toqqarneqarneranut tunngavilersuutigaa.
- Suliniut ineriartorpoq, arlalippassuillu akuutinneqarlutik. Suliniut avataanit Nordisk Ministerråd-imit aningaasaliiffigineqarluni tapersersorneqarnera aamma nuannaarutigaarput, Sværd oqarpoq.
Qeqqata Kommuniata 2020-mi Issittumi inuiaqatigiit atuilluartuunissaanik takorluugaqarneranut, ukiumi atuilluartuunissami suliniutitsialak kommunip atuilluartuunissamik periusissiaani ilaavoq. Atuilluartuunissamik periusissiaqarnermigut Qeqqata Kommuniata inuiaqatigiit, namminneq ingerlateqqitassatut tigusaminit ajunnginnerusumik kinguaariit tulliinut ingerlatitseqqinnissaminik kissaateqarpoq.
Assitaata oqaasertaa: Suliniutip "Atuilluartuunermik ilinniartitsineq"-up Qeqqata Kommuniata atuilluartuunissamik suliniuteqarnerani ukiup suliniutitsialaattut toqqarneqarnerani, Pisortap sulisuinut pisortap Hans Christian Sværd-ip Else Finne pilluaqquaa.