Suliat akimorlugit suleqatigiinneq pillugu Pingasunngornermi apriilip 18-iani eqqartueqatigiinnissamut Sisimiuni Ilaqutariinnermut Immikkoortortaq aamma Ilinniartitaanermut Immikkoortortaq aggersaapput.
Suliat akimorlugit suleqatigiinnermi meeqqeriviit, atuarfiit, Ilaqutariinnermut kiffartuussiviit allallu meeqqanik immikkut pisariaqartitsisunik sullissut suleqatigiittarput. Meeqqat pitsaasumik ineriartornerat nukittorsarumallugu, ataatsimiinnerni sullissisut angajoqqaanik suleqateqartarput.
Suliat akimorlugit suleqatigiinnerit qanoq aallartilluarneqarsinnaasut, pingasunngornermi ualikkut eqqartueqatigiinnermi Sisimiuni ulluunerani meeqqerivinni, atuarfinni, sunngiffimmi ornittakkani, ilaqutariinnut kiffartuussivimmi, peqqinnissaqarfimmi, PPR-imi politiinilu sulisut eqqartussavaat.
Eqqartueqatigiinnissaq Amerlumi ingerlanneqassaaq.
Suliat akimorlugit suleqatigiinnerit Sisimiuni ukiaq kingullerli aallartinneqarput, upernaallu ingerlanerani Maniitsumi Ilaquariinnermut Immikkoortortap aamma Ilinniartitaanermut Immikkoortortap suliat akimorlugit suleqatigiinneq aamma atuutsilersissallugu. Matumani aallartisarnissami Sisimiuni misilittakkat qularnanngitsumik atorluarneqarsinnaassapput.
Kommunimi Ilaqutariinnut ataatsimiititaliap siulittaasuata Bitten Heilmann-ip taamatut eqqartueqatigiinnissamik suliniuteqarsimaneq iluarinartilluarpaa.
- Meeqqanik immikkut pisariaqartitsisunik sullissinermi pingaaruteqarluni suliat akimorlugit suleqatigiinnissap pingaartinneqarnissaa pingaaruteqarpoq. Ilaqutariit eqqugaasimasut
Ikiorserneqarsinnaanissaannut ataatsimoortumik sullissinissami, Suliat akimorlugit suleqatigiinneq sakkussatsialaavoq. Tamatuma saniatigut suliat akimorlugit pitsaasumik oqaloqatigiinnerit tassuunakkut ingerlanneqartarput, taamaalillutalu ilisimasatsinnik avitseqatigiillutalu innuttaasunut pitsaanerumik atugassaqartitsisinnaalissalluta. Suliat akimorlugit suleqatigiinnerup Maniitsumi atugaalernissaanut qilanaaqaanga, taama oqarpoq.
Annertunerusumik paasissutissat
Suliat akiorlugit suleqatigiinneq pillugu Qeqqata Kommuniata paasissutissaataani atuaasinnaavutit imaluunniit Sisimiuni perorsaanermi siunnersorti oqarasuaat 86 74 02-mut saaffiginnissuteqarsinnaallutit.