Atuarfik Kilaaseeqqameersut 9.b, taakku 2019-imi juunip 20-ani atuartunut angajoqqaavinullu Atuarfik Kilaaseeqqami. Kommunimi ukiumi klassitsialattut toqqagaanermi checki 25.000 koruuninik aningaasartalik ilaavoq, klassip paasisassarsiorlutik angalanissaminnut tapertatut atorsinnaallugu. Ukiup klassitsialaatut akissarsiassaq borgmesterip tullianit Gideon Lyberth-imit tunniunneqarpoq, aamma klassimut angajoqqaajusunullu oqalugialaarpoq.
Akissarsiassamik tunniussinerup nalaani borgmesterip tulliata Gideon Lyberht oqaluttaraa, ukiup klassitsiaalaatut 9.b toqqarneqarneranut tunngaviusoq angajoqqaanik akuutitsineq annerpaajusimasoq Qeqqata Kommuniani, meeqqat atuarfinnut ataqqinninnermik pilersitsinissaq aamma angajoqqaat akisussaanerisa nukittorsarneqarnissaa pillugu meeqqat atuarfianut kommunip anguniagaanik angajoqqaajusut suliaqarsimasut. 9.b klassiuvoq immikkuullarissoq, sutigut tamatigut Atuarfik Kilaaseeqqamut pitsaasumik aallartitaasoq. Tunngaviulluartuupput angajoqqaat eqeersimaartut tapersersuisullu.
Atuartut pimoorussisuupput sassarnissamullu qunugisaqaratik. Atuartut piffissaq eqqorlugu takkuttarput, nukissaqarlutik, piumassuseqarlutik, maniguullutik, ataqqinnillutik anguniakkaminnillu angusaqarusullutik atuarfimmi peqataasarput.
9. b-mi atuartut meeqqaminnik tapersersuisunik angajoqqaaqarnerat pissutaalluni, klassi ullumikkut pitsaanerpaamik angusaqartuuvoq, klassiulluni ikinnerpaamik atuanngitsoorfiunikuulluni, aammalu klassilluni ilinniagassaminnik suliaqartartuusoq.
Klassip akissarsiartik atorusuppaat, taamaalillutik ukiumi atuarfiusumi 2019/2020-mi Nuummut paasisassarsiorlutik angalarusullutik, 2020-mi juunimi 10. klassi naammassereerunikku ilinniaqqiffiusinnaasunut periarfissat takorusullugit.
Borgmester Malik Berthelsen oqarpoq: ” Atuartut atuarnerannut angajoqqaajusut tapersersuinerat pingaaruteqartoq nalunnginnatsigu, meeqqamik atuarneranni angajoqqaat akisussaanerisa nukittorsarneqarnissaat akuunerunissallu annertuumik kommunimi suliarivarput. Taamaattumik angajoqqaat meeqqamik atuarnerannut immikkut suliniuteqartut nassuerutigissallugu nuannerpoq"
Illoqarfinni nunaqarfinnilu meeqqat atuarfianni immikkut suliniuteqarsimasunut, kajumissaatitut akissarsiassat assigiinngitsut arlalliusut ukiup klassitsialaanut akissarsiassaq tunniunneqartartunut ilaaginnarpoq. Ilaagitigut meeqqat atuarfiannik naammassinnillutik qaffasinnerpaamik karakterilinnut, annikinnerpaamik atuanngitsoorfiunikunut imaluunniit arlaatigut maligassiuisuusunut kajumissaatitut akissarsiassanik tunniussisoqarnikuuvoq. Taakku saniatigut atuarfinni ataasiakkaani klassimut ikinnerpaamik atuanngitsoorfiunikumut, kiisalu atuartitsisutsialammut sakissarsiassanik tunniussisoqarnikuuvoq.