Angajoqqaat meeqqaminnik isumaginnissinnaanngikkaangamik meeqqat ilaqutariinnut allanut inissinneqartariaqartarput. Meeqqat angerlarsimaffiup avataanut inissinneqartariaqartut amerlammata Qeqqata Kommunia angajoqqaarsiaasinnaasunik pissarsiorpoq.
- Ilaqutariinnik paarsisartunik pisariaqartitsinerput annertoorujussuuvoq. Meeqqanik inissitassanik utaqqisoqarpoq, isumaginninnermi siunnersorti Mia Siegstad Olsen oqarpoq.
Qeqqata Kommuniani angajoqqaarsiat maanna 16-iupput. Ilaqutariit minnerpaamik 25-it angajoqqaarsiaanissaat Qeqqata Kommuniata angorusuppaa. Meeraqartarmammi angerlarsimaffiup avataanut piaartumik inissinneqartariaqartartunik.
- Meeqqanik inissitassaqariasaartoqartarnera pillugu angajoqqaarsianik piareersimasuuteqarusuppugut. Angajoqqaarsiaasinnaasunik piareersimasuuteqarluta meeqqanik piaarnerpaamik tiguseriaannarnik.
Angajoqqaarsiat orniginarnerusut
Misissuinerit arlallit takutippaat meeraq ulloq unnuarlu angerlarsimaffimmut inissinneqarnani ilaqutariinnut inissinneqaraangami peqqinnarnerusartoq.
- Meeqqap pisariaqartitaa annerpaaq angajoqqaarsianit tunniunneqartarpoq, soorlu qanilaarnerit ilaqutariittullu misigisassat. Meeqqat aamma ilaqutariinniikkaangamik toqqissisimanerusarmata.
Qinnuteqartut utaqqisariaqartarput
Angajoqqaarsianngorusullutik qinnuteqartut tusagaqarnissaminnut qaammatit marluk missaanni utaqqisariaqartarput. Angajoqqaarsiat timikkut tarnikkullu peqqissuunersut, meeqqanut pinerlussimanikuunnginnersut misissorneqartarput, piffissarlu sivisulaarsinnaasarpoq.
- Meeqqanut pinerliisimannginnermut uppernarsaatit piniarneqartarput. Qinnuteqartoq timikkut tarnikkullu peqqissuunersoq paasiniarlugu napparsimmavimmut oqaaseqaammik piniartarpugut, taannalu sivisusinnaasarpoq. Tamakku pereeraangatsigit qinnuteqartut angerlarsimaffii alakkartarpagut, meeqqanut tulluartuunersut paasiniarlugit. Taamaalilluta qinnuteqaat akuerisassanngorlugu suliarilertarparput. Ilaanni qaammatit marluk utaqqisoqartarpoq, apeqqutaalluni qinnuteqaatip suliarineqarnera qanoq ingerlanersoq.
Angajoqqaarsiaaneq akisussaaffiuvoq annertooq, angajoqqaarsianullu atugassarititaasut sapinngisamik pitsaasuutinnissaat anguniarniarlugu assigiinngitsunik
Qeqqata Kommunia neqerooruteqartarpoq.
- Ilaqutariinnut paarsisartunut piumasaqaataavoq tunngaviusumik pikkorissartarnissaat. Tassani meeqqap angajoqqaaminik paaqqutarilluarneqarsimanngitsup silarsuaa saqqummiunneqartarpoq. Saniatigut ilinniaqqinneq eqqumaffigineqaleraluttuinnarpoq, tassani immikkut angajoqqaarsiatut sullissisoqarnera tunngavigalugu. Pisariaqartitsineq aallaavigalugu angajoqqaat aamma imaajarneqarnissaminnut ikiorneqarsinnaapput.
Angajoqqaarsiaq tassaavoq meeqqanik angajoqqaaminniit paaqqutarilluarneqarsinnaanngitsunik angerlarsimaffimmi
paarsisartoq.
Angajoqqaarsiat meerarsiallu oqaluttuaat uani atuarneqarsinnaapput: https://en.calameo.com/read/0062857611a96e90add75