Meeqqat meeqqat atuarfiini siorna ukioq mannalu qanormita angusaqarpat? Ukiut tamaasa oktobarip aallaqqaataa nallertinnagu meeqqat atuarfii pitsaassuseq pillugu nalunaarummik kommunalbestyrelsimut tunniussisussaapput. Ukioq mannalu aamma pisarneq malillugu taamaaliorput. Nalunaarusiamilu takuneqarsinnaavoq piginnaasanik misilitsinnerni, qallunaatut taallugu trintestini ukiup siulianut sanilliullugu malunnaatilimmik qaffariartoqarsimavoq.
- Siullermik soorunami nuannaarutigivarput piginnaasanik misilitsinnerni ukiup siulianut sanilliullugit malunnaatilimmik qaffariaateqartoqarsimanera. Immikkullu nuannersumik maluginiarparput atuarfinni tamani tuluttoornermi angusat pitsaasumik angusaqarfiusimanerat, Ilinniartitaanermut ataatsimiititaliami siulitaasoq Evelyn Mølgaard oqarpoq.
Meeqqat atuarfiani atuartut angusaat ilaatigut nuna tamakkerlugu agguaqatigiisillugu angusanut nalunaarusiami sanilliunneqarput. Sanilliussisarneq allanngortinnissaa kommunalbestyrelsimiit innersuussutigineqarpoq.
- Kommunalbestyrelsemiit innersuussutigaarput angusanik nalilersuinermi nuna tamakkerlugu agguaqatigiisitsinermut taamaallaat nallersuussisarneq atornagu, kommunitsinni atuarfiit imminnut nallersuunnerat nalilersuinermi isiginiarneqarnerulissasoq. Pissutigalugu tassuunakkut takuneqarsinnaammat atuarfinni sorlerni suut angusarissaarfiusimallutillu pitsaannginnerusunik angusaqarsimanersut, borgmester Malik Berthelsen oqarpoq.
Nalunaarusiami aamma takuneqarsinnaavoq piginnaasanik misilitsinnermi suliakkiutigineqartut fagini ilaanni affaat sinnerlugit kukkuneqartumik suliarineqarsimasunik angusaqarsimasut.
- Kommunalbestyrelsemiit piumasaraarput atuarfiit piginnaasanik misilitsinnerni suliakkiutigineqartut affaat sinnerlugit kukkuneqartumik suliarineqarsimasunik angusaqarsimasut angusat sooq taamaannerannik nassuiaateqassasut, aammalu angusat pitsanngorsarneqarnissaannik suliaqassasut. Taamatuttaaq ilanngullugu matematikkimi allattariarsornermi angusat qanoq pitsanngorsarneqarsinnaanerannik atuarfiit pilersaarusiornissaat piumasaraarput, ataatsimiititaliap siulittaasua Evelyn Mølgaard oqarpoq.
Meeqqat atuarfiini piumasaqataasut ilagaat piffissaq eqqorlugu takkuttarnissaq, atuanngitsoortarnerilli suli qaffasittut, nalunaarusiami takuneqarsinnaapput.
- Akuerineqaranilu atuanngitsoortarnerit allaat aamma klasseni mikinerni qaffasissumik inissisimanerat isumaqarpunga assorujussuaq ernumanartoq, tamatumalu suli ukkatarineqarnissaa ilanngullugu piumasaraarput, borgmesteri naggasiivoq.
Meqqat atuarfiinut Ataatsimoorussamik Pitsaassuseq pillugu nalunaarusiaq tamakkiisoq uani atuarneqarsinnaavoq: Ukiumi atuarfiusumik 2022-2023-mi Qeqqata Kommuniani meeqqat atuarfiinut Ataatsimoorussamik Pitsaassuseq pillugu nalunaarusiaq.
Attavissaq:
Ilinniartitaanermut Ataatsimiititaliami Siulittaasoq, Evelyn Mølgaard
Oqarasuaatip normua +299 525 955