Kangerlussuarmi eqqaavissuarmut tunngatillugu, eqqaavissuarmut inatsisilerinikkut ingerlatsinermullu akisussaaffiup siullertut taakkartornissaa pingaaruteqarpoq, taamaattumillu akisussaaffik Namminersorlutik Oqartussaniinnera nalornissutigineqassanngilaq. Nunaqarfinni illoqarfinnilu sinnerini tamani kommunit eqqaavissuarnik ingerlatsisuupput. Qularineqassanngilaq politikkikkut pingaarnersiuinerit patsisaallutik, Kangerlussuaq pineqartillugu ukiuni arlaqartuni Qeqqata Kommuniata kiisalu Namminersorlutik Oqartussat akornanni pissutsit ilungersunarsimammata. Taamaattumillu Kangerlussuaq oqaluuserineqartillugu aaqqiagiinngittoqartarpoq.
Ilumoorpoq maannakkut eqqagassalerineq pitsaanngilluinnartuusoq, Kangerlussuarmiinnaanngitsoq, aammali avatangiisit eqqarsaatigalugit Sisimiuni Kalaallit Nunaatalu sinnerani, tamatumalu takutippaa ukiuni qulikkuutaani arlaqartuni avatangiisit pingaarnersiorneqarneq ajorsimasut. Sisimiuni sinerissallu sinnerani sumiiffinni eqqagassalerinermut ajornartorsiutinik takornarissat kisimik sivikitsukullammik takunnittuusanngillat, eqqaavissuilli qanittuani najugaqartut putsumit peqqinnissakkut ulorianartorsiortinneqartarput, immikkoortunilu sanaartorfiusuni annerpaani tipimik ajornartorsiortinneqartarput kiisalu uumasupilunnit qanittunilu mingutsitsinernit ajornartorsiortinneqartarlutik.
Qeqqata Kommuniani eqqaavissuarnik ingerlatsinissamut akisussaasuusugut, akisussaaffitsinnik qimarratiginninnianngilagut. Qularutigineqassanngilarlu Kangerlussuarmi eqqaavissuaq Namminersorlutik Oqartussanit torersarneqartuuppat, Qeqqata Kommunianit, politikkikkut, ingerlatsinermut akisussaaffimmik tigusinissaq piffissami sivisuumi sulissutigineqarnikuuvoq. Eqqaavissuummi ingerlanneqarneranut Namminersorlutik Oqartussanit akiligassaq pilersinneqarsimasoq, kommunimi innuttaasunit ikittuinnarnit akileraartartunit akilerneqassappat tamanna naleqqunnavianngilaq. Kalaallit Nunaat sinerlugu sakkutooqarfikuni Namminersorlutik Oqartussat avatangiisitigut torersaassisoqarnissamik piumasaqaateqarput, taamaattorli ajoraluartumik Kangerlussuarmi nammineq torersaanermik ingerlatsiniarani. Avatangiisit innarlitsaaliorneqarnissaanik inatsit 2011-meersumi oqartussaaneq nakkutilliinerlu pillugit Namminersorlutik Oqartussat Qeqqata Kommunialu isumaqatigiissimanngillat, pingaartumik ”suliffeqarfiit mingutsitsinerusut”, eqqaavissuit ilaatigut tassani inissisimasut pillugit Namminersorlutik Oqartussanut tunngatillugu. Avatangiisit innarlitsaaliorneqarnissaanik inatsimmi §19-imi ersarissumik ima oqariartuuteqarpoq, suliffeqarfiit mingutsitsinerusunut tunngatillugu Naalakkersuisut oqartussaasut. Avatangiisit innarlitsaaliorneqarnissaanik inatsimmi § 49 inn. 2 aamma tassunga oqaaseqaatini Namminersorlutik Oqartussat nakkutilliisussaasutut taakkartorneqarpoq. Paasissutissiissutigineqassaaq, Kangerlussuarmi eqqaavissuarmik ingerlatsinissamut Qeqqata Kommunia sulisoqanngimmat. Namminersorlutik Oqartussanit pigineqartumit Mittarfeqarfiinit sulisoqarpoq.
Nunatsinni kommunit tamarmik, kommunit ataatsimoorussamik eqqakkanut tunngatillugu ingerlatseqatigiiffimmik ESANI A/S-imik qanittumi pilersitsipput, taannalu siunissami qaninnerusumi sinerissamit eqqakkanik ikuallariaannarnik assartuinissamut ikuallaanissamullu isumaginnittuussalluni. ESANI A/S kommunit ataatsimoorussamik eqqakkanut tunngatillugu ikuallaavinnik marluusunik ingerlatsisuussaaq, ikuallaavik siulleq Sisimiuni sanaartorneqassaaq, kinguninngualu Nuummi assingusumik sanaartortoqassalluni. ESANI A/S piffissami sivikitsuinnarmi pioreersimagaluarluni, ikuallaavissanik nutaanik kiisalu ikuallaaviit nutaat sanaartorneqarnerisa naammassineqarnissaasa tungaanut eqqakkanik sinerissamiittunit immerneqartussanik inissiivinnut pilersaarusiorluni aallartereerpoq. Maanna allannerup nalaani ESANI A/S Kalaallit Nunaata ilaanit eqqakkanik assartuinermik misileraalluni aallartereerpoq. Siunissami illoqarfinnit nunaqarfinniillu eqqakkanik umiarsuakkut assartuineq qanoq ingerlanneqassanersoq, ingerlatseqatigiiffimmit naliliiffigineqassaaq. Qanorluunniit pisoqaraluarpat, Kangerlussuarmut tunngatillugu ullumikkumut sanilliullugu umiarsualiveqarnerup pitsaanerunissaa pingaaruteqarluinnartuuvoq, soorluttaaq tamatumunnga Namminersorlutik Oqartussat akileeqataanissaat siunertaralugu Qeqqata Kommunia suliniuteqarsimasoq, suliniummimi nunamut tamarmut annertuumik periarfissaqalersitsilluni, siunissami inuussutissarsiornermut periarfissat pineqarmata.
ESANI A/S-ip aallartinnerani aningaasaliiffigineqarnissaanut pisariaqartitat pillugit innersuussutit maannakkut politikkikkut suliarineqarpoq, taamaalillunilu ingerlatseqatigiiffiup sanaartornermut pilersaarutiminik piaartumik aallartisaasinnaalluni. Suliniummut tassunga kommunit, Namminersorlutik Oqartussat, Nukissiorfiit allallu soqutigisaqartut akornanni pitsaasumik suleqatigiinnermik ingerlatsisoqarpoq. Pisortat suliffeqarfiutaat akimorlugit annertuumik suliniuteqarneq, nunatsinni allanik annertuunik suliniutinut aqqutissiuiumaartoq neriuutigaarput.
ESANI A/S pillugu suleqatigiinnermut Qeqqata Kommunia peqataanermi saniatigut, Sisimiut eqqaani kangerlunni eqqagassanik katersinermut Namminersorlutik Oqartussanut aamma suleqataavoq, tamannalu piffissami qaninnerusumi Verdensnaturfonden WWF-imit kiisalu nunat assigiinngitsut akornanni ilisimatuunit misissorneqartussaallutik. Taamatuttaaq kommunalbestyrelsi siusinnerusukkut Sisimiuniit eqqakkanik Kalaallit Nunaata sinnerani ikuallaavinnut nassiussinermik aaqqiissuteqarallarnissamik aningaasaliinikuuvoq, ikuallaaviilli inissaqartitsinnginneq patsisaalluni eqqagassanik tigusisinnaasimanngillat. Eqqakkanut inissiiviit kiisalu ikuallaaviit ESANI-mit sanaartorneqareerpata aatsaat eqqagassalerinermut tunngasunik iliuuseqartoqarsinnaavoq, aamma Kangerlussuarmiit nassiussisoqassappat - kommuni imaluunniit Namminersorlutik Oqartussat nassiussisutut.