Sisimiuni decembarip qaammataani sakkortuumik persuttaasoqareernerata tassungalu atatillugu innuttaasumik ujaarisoqareernerata kingunerisaanik, innuttaasut toqqissisimanngitsutut misiginerat malunnarpoq. Tassunga atatillugu Atugarissaarnermut Ataatsimiititaliaq Ilinniartitaanermullu Ataatsimiititaliaq suleqatigiillutik, Sisimiuni susassaqartut tamaasa suleqatigalugit qanoq toqqissisimanerulernissaq anguniarlugu suleriuseqarnissamik ujartueqatigiinniarput.
“Qinikkatut innuttaasut toqqissisimasumik inuuneqarnissaat soqutigisaraarput pisussaaffigalugulu, taamaammat pisariaqarsoraarput ataatsimoorussamik suleriuseqarnissamut ujartuinissaq. Susassaqarfiit akimorlugit suleqatigiinnikkut qulakkiissavarput illoqarfimmi susassaqartuusugut tamatta, ataatsimoorussamik siunnerfimmik ataatsimik kommunitsinni tunaartaqalernissarput.” Taamatut oqaaseqarpoq Atugarissaarnermut Ataatsimiititaliami Siulittaasoq, Juliane Enoksen. Imatullu nangilluni:
“Ilisimavarput meeraq inuusuttorluunniit toqqissisimasumik angerlarsimaffeqartinneqartoq, toqqissisimasumik avammut saaffiginnittuullunilu inooqataasartoq. Taamaattumik pingaartipparput angajoqqaatut perorsaanermi ikorfartortariaqaraanni saaffissaqartuaannarneq, kiisalu meerarput tulluanngitsumik inooriaaseqartoq pasitsaakkutsigu siusissukkut qanoq pitsaaliusinnaaneq ilisimaarinissaa”.
Evelyn Mølgaard, Ilinniartitaanermi Ataatsimiititaliami Siulittaasoq imatut oqaaseqarpoq: “Ilinniartitaanermi Ataatsimiititaliami qisuariarnissaq pisariaqarluinnartutut isigaarput, aammalu pinaveersaartitsinermi periusissiaq nutarterneqartoq utaqqinngikkaluarlugu pinaveersaatitsinermi suliat ingerlasut annertusarnissaat aammalu pisut kingulliit sakkortuut tunngavigalugit, suliniutit allatigut ilanissaat pisariaqarpoq.
Qinikkatut pisussaaffigaarput aamma innutaaqatitta toqqissisimanartumik illoqaqarfitsinni aammalumi Qeqqata Kommuniani tamani inooqataanissaat.
Atuarfinni suliniutaareersut soorlu qinngasaaruttarnermi periusissat, pisut annertoorujusuanngunnginnerani aammalu ileqquliutinnginnerani unitsinneqartarnissaat tamatta akisuussaaffigisariaqarparput, taamaattumillu suliniutit suleriarnissallu tulliit tamatta peqataffigisariaqarpagut. Atuarfik angajoqqaat meeqqallu kiisalu meerartatta avatangiiserisaanni susassaqartut tamarmik soorlu ornittakkat, paaqinnittarfiit peqatigiiffilerisut ulloq unnuarlu angerlarsimaffiillu.
Assorsuaq pisut sakkortuut persuttaanerit, aammalu meeqqanit inuusuttunillu akilerlugit atoqateqartarsimanerit kiisalu ikiaroornartup imigassap aningaasanoorajunnerullu malitsigisaat pillugit, innuttaasunut sunniutaat pineqartunullu toqqissisimananngitsut annikillisinniarlugit suleriarnissat peqataaffigerusuppagut.”
Qeqqata Kommuniani pitsaaliuinermi suliniuteqarneq massakkut nutarterlugu aaqqissuuteqqinneqaleruttorpoq, innuttaasut akisussaaqatigiinnerullutik, ataqatigiinnerusumik nukiillu pitsaanerusumik agguataarlugit suleriuseqarnissaq tassani siunertaalluni. Suliniut qulequtaqarpoq “Qeqqata Kommuniani Peqqinneq Inuunerinnerlu pillugit Akisussaaqatigiitta” tassanilu kommunimi suliniutit ingerlareersut “Inuunerissaarneq”, “Qeqqata Modeli” kiisalu “Takorluukkatut isumaqatigiissut, Qeqqata Kommuniata Kalaallit Nunaanni Timersoqatigiit Kattuffiatalu suleqatigiinnissamut isumaqatigiissut” kattunneqarput qulequttanullu pingasunut aggulunneqarlutik. Suliniutip pingaarnertut anguniagaa tassaavoq Qeqqata Kommuniani peqqissuunerup atugarissaarnerullu siuarsarneqarnissaa.
Annerusumik paasisaqarusukkuit attavigiuk:
Juliane Enoksen, Atugarissaarnermut Ataatsimiititaliami Siulittaasoq jule@qeqqata.gl imaluunniit
Evelyn Mølgaard, Ilinniartitaanermut Ataatsimiititaliami Siulittaasoq evfr@qeqqata.gl