airplanebooksbriefcase business cogs cross election entertainment fish house law lockmedicalpeopleselfservices socialtax

Qeqqata-modeli

Qeqqata-modellimik siunertaasoq tassaavoq, Islandimi pitsaaliuilluni sulinermit misilittakkat Qe-qqata Kommuniani sumiiffimmi pissutsinut tulluarsarlugit atuutilersinneqarnissaat. Island an-gajoqqaanik inuiaqatigiinnillu tamanik aanngajaarniutinik atuinissamut pinaveersaartitsinermi aammalu atugarissaarnerup qaffassarneqarneranut suleqateqarnermigut inernernik pitsaasunik takutitsinikuuvoq. Den Islandske Model nunani allani arlalinni aamma atugaavoq. 2018-imi okto-barimi kommunalbestyrelsi Islandimut isumassarsiorlutik angalapput. Islandimit isumassarsiat pissarsiarineqarnikuusut kommunip qanoq sulissutigeqqissinnaanerai, Kommunalbestyrelsip 2018-imi oktobarip 25-ani ataatsimiinnermini eqqartorpaa.

2020-mi septembarimi kommuni, Kalaallit Nunaani Innuttaasut Peqqissusaannik Ilisimatusarfik (SIF) aamma Peqqissutsimut Naalakkersuisoqarfiup ataaniittoq Paarisa suleqatigiinnissamik isumaqatigiissuteqarlutik atsiorput. Suleqatigiinni Qeqqata-model aqqutigalugu islandimit isumassarsiat aammalu Kalaallit Nunaanni pioreersumik peqqinneq pitsaaliuinerlu pillugit ilisimatusarnermik HBSC-mik misissinermit nukissanillu paasisutissanik pioreersunik pitsaanerusumik atuinikkut Inuuneritta III-mik sulineq qanoq atulersissinnaanerigut ukkatarineqarpoq. Kalaallit Nunaanni Innuttaasut Peqqissusaannik Ilisimatusarfiup suliniut ataavartumik ilisimatusarfigivaa aammalu uppernarsarlugu nalilersorlugulu. 

Health Behavior in School-aged Children (HBSC) tassaavoq, atuartut peqqinnerat peqqinnissakkullu ileqqoqarnerat pillugu nuna tamakkerlugu apersuilluni immersugassakkut misissuineq, ukiut sisamakkaarlugit ingerlanneqartartoq. Misissuineq Naalagaaffiit Peqatigiit peqqinnissaq pillugu suleqatigiissitanit WHO-mit tapersersorneqarpoq. Kalaallit Nunaanni misissuineq 1994-imili ingerlanneqartalernikuuvoq. Qeqqata Kommuniata kissaatigivaa, kommunimi misissuineq akulikinnerussasoq, taamaalilluni meeqqat peqqissusaasa atugarissaarnerisalu ineriartornerat qanimut malinnaaffigineqarniassammat. 2020-mi Qeqqata Kommuniani 5.-10. klassimi atuartut 96%-siisa misissuineq akissuteqarfigivaat.

Misissuinermi nalunaarutit kingulliit uani atuarneqarsinnaapput.

HBSC-mi misissuineq, meeqqat amerlanerpaartaasa atugarissaarnerannik annikitsumillu aangajaarniutinik atuinerinik takutitsivoq. Meeraqarporli amerlasuunik ingerlalluanngitsunik aamma/imaluunniit siusissukkut aangajaarniutinik atuilersimasusunik, peqqissusaannik aammalu atugarissaarnerannik innarliisinnaasunik.

Misissuinermi inernerit aallaavigalugit suleqatigiit, kommunimi immikkoortortat aamma suliffeqarfiit akimortumik peqatigiiffinnik, innuttaasunik, angajoqqaanik meeqqanillu suleqateqarput, tassani meeqqanut inuusuttunullu ataatsimoorfiusut peqqinnartut tikikkuminartullu nukittorsarniarlugit, taamaaliornikkullu atuartut akornanni atugarliorneq aangajaarniutinillu atuineq pinaveersaartinniarlugit.

Pitsaaliuillluni suliaqarnitsinni kalaallit kulturiat aammalu pinngortitaq inuiaqatigiittullu nukittussuseq atorneqassasut pingaaruteqarpoq. Taamaammat Qeqqata-modellimi suleqatigiit 2020-ip ukiaani ilisimatusarnikkut Qeqqata Kommuniani nukittuffinnik naleqartitanillu, illoqarfinni nunaqarfinnilu innuttaasut peqataatillugit nalunaarsuipput.


Qeqqata-model pillugu annertunerusumik atuagaqarit uani 

Qeqqata-modellimi suliat naammassineqartut 

Februar 2020: Paarisa aamma Kalaallit Nunaanni Innuttaasut Peqqissusaannik Ilisimatusarfik (SIF) suleqatigilissallugit Kommunalbestyrelsi aalajangerpoq.

Aggusti 2020: Atuartunik misissuineq HBSC Qeqqata Kommuniani atuartuni tamani 5.-10. klassiusuni ingerlanneqarpoq.

Septembari 2020: Paarisa aamma Kalaallit Nunaanni Innuttaasut Peqqissusaannik Ilisimatusarfik suleqatiginissai atsiorneqarpoq.

Oktober-november 2020: Illoqarfinni nunaqarfinnilu innuttaasunut, peqatigiiffinnut meeqqanullu aallartisaalluni isumasioqatigiisitsinerit. Qeqqata Kommuniani illoqarfinni nunaqarfinnilu nukittuffiit naleqartitallu misissorneqarput nalunaarsorneqarlutillu.

Januar 2021: Sisimiuni Maniitsumilu angajoqqaanik ataatsimeeqateqarneq angajoqqaanillu isumaqatigiissusiorneq

Januar 2021: Kommunimi aammalu qitiusumi suleqatigiinni inunnik qitiusunik aallartisaaneq.

Januar 2021: Sisimiuni Maniitsumilu peqatigiiffinnik ataatsimeeqateqarneq.

Februar 2021: Kommunalbestyrelsi aalajangerpoq aallarnisaataasunik suliniutinik tallimaasunik ingerlatitseqqinniarluni.

Marts 2021: HBSC-nalunaarut inaarutaasoq, 2020-mi misissuisimaneq saqqummersinneqarpoq.


Pisussat 

Aallarnisaanermi suliat nunaqarfinnut siammartinneqassapput, meeqqanillu pitsaassutsimik misissuinerit malitseqartinneqassallutik.

Kommunimi meeqqat Nakuusaaqqat-nik aamma atuartut sinniisaannik kiisalu peqatigiiffiit, kajumissutsimik sulisut innuttaasullu sinniisaat suliniutinut aallartisarneqartunut peqataatinneqassapput.

Siunissami modellimi atuartunik misissuineq ukiut tamaasa ukiorluunniit allortarlugu ingerlanneqartassaaq, kingornalu nalilersorneqaqqilluni, nalilersorneqarluni suliniutinullu ingerlasunut tulluarsarneqarluni. Angajoqqaanut isumaqatigiissutit atuarfinni ukiumoortumik angajoqqaanik ataatsimiisitsinerni nutarterneqartassapput.


Kalaallit Nunaanni meeqqat atuartut pillugit misissuinermi HBSC 

Uani nalunaarusiarineqarsimasut aakkit.