Ullup affaa utoqqaat illuani, ullullu affaa meeqqerivimmi Naja-mi.
Ulrik Lyberth-ip sulisarnera ima ingerlasarpoq. Sumiiffiup aappaani suliassaqarnerutillugu sivisunerusumik tassani sulisarpoq.
Suliassaaleqinngisaannarporli. Suliassaqartuaannaramilu ingerlarsorujoortuaannarpoq.
Ukiorpassuarni Ulrik pedelitut sulivoq, tassami ukiut 15-ninngulersuni. Tamassuma siuliani namminersortumi allami ingerlatseqataasimavoq.
Ulrik aggersarneqartuartuuvoq, tassa assassornikkut pillorissuugami aammalumi sorpassuarnut ilisimasaqarluartuulluni; sanasutut ilinniarsimasuuvoq, kiassaateqarfimmi ittutut kissarsuutinullu montøritut aallagartaqarluni.
Taamaammallu tamakkununnga tunngasunik paasisimasaqarluartuummat aggersarneqartuartuulluni. Suliffigisaali tamatigoortorujussuuvoq. Utoqqarnut meeqqanullu pisiniussisoqassatillugu peqataasarpoq.
Utoqqaat illuani utoqqarnik isumaginnittoqartillugu aamma sulisunit peqataatilluarneqartarpoq, tamanna misilittagaqarfiginikuusimannginnamiuk, utoqqarnik isumaginninneq takornartaralugu.
- Tamakkuninnga aamma suliaqartitaasinnaanera nuannarivara. Assersuutigalugu utoqqarmik peqateqarluni suliaqarneq assut nuannerpoq, Ulrik oqarpoq.
Suliffimmulli allamut nuunneq imaaliallaannaq sungiutassaasimanngilaq.
- Assut eqqumiissimavoq suliffimmi angutaannaanerusuni sanaartornermik suliaqarfimmiit suliffimmut arnarpalunnerulaartumut, isumaginninnermillumi imaqartorujussuarmut nuulluni, tassanilumi arnat aamma amerlanerullutik, Ulrik illariarpoq.
Ulloq suliffik
Utoqqaat illuani utoqqaat ullaat tamaasa qulinut tussiartinneqartarmata Ulrik-up nuannarilluinnarpaa. Ullup sinnera nalinginnaasumik eqqagassalerinermik, pisiniarnermik, aputaajaanermik, sanasutut suliassanik aammalu innaallagissamut tunngasunik suliassaqartillugu sulineq ingerlasarpoq.
- Suliassat apeqqutaallutik ullormut suliassat nikerarsinnaasarput. Aammami suliffiit assigiinngitsut marluk isumagisarigakkit. Ullup affaa utoqqarni suleriarlunga ullup affaa meeqqani. Utoqqarni eqqissisimanartuupput, meeqqanulli pigaanni oqaluttuassartaa allarluinnaavoq. Tassami taamaattusaavoq. Siutimami nillianerit nipiliornerillu sungiulluinnalersimavaat, Ulrik illariarpoq.
Ulrik suliffeqarfinni marluusuni sulisunut sinniisuuvoq. Suliaqarnissanni nuannarivaa, oqarneratullu, atorfissaarunneqarnisami tungaanut aamma suliinnarusuppoq.
Suliffikkuminartuunera aammalu aqutsisut sulisullu akornanni ataqatigiillluartoqarnera qujamasuutigivaa.
Minnerunngitsumillu 2008-mi imigassamik atornerluisuunini pillugu aqutsisunut saaffiginnikkami paasineqarluni tapersersorneqarsimanini qujamasuutigeqaa. Atornerluineq 2005-ip kingorna, qaammatit qulingiluat akunneqartumik ernini marluk annaanerisa kingorna annertusiartulersimavoq.
Tamatuma kingorna aliasunnini imigassamut saatippaa, kingornalu atornerluinerminik aqutsisinnaajunnaarnini nassuerutigisimallugu.
Suliffimminit tapersersorneqarsimavoq, aammalu Nuummi katsorsaavimmut Qaqiffimmut katsorsartinnissamik periarfissinneqarsimalluni. Taamanikkulli putumaqqisimanngilaq.
Atuiunnaarninniit maannamut ukiut qulinngulerput. Ullut ingerlanerini ullut tamaasa ilukkut peqqissiartuinnavippunga. Taamanikkut aqutsisunit ikiorneqarnera assut qujamasuutigivara, Ulrik oqarpoq, nangillunilu, suliffiup suliffikkuminartuunera ataqatigiilluarnerlu suliartorusussuseqarnermut sulianullu pimoorussinissamut aalajangiisuuvoq.