Meeqqat atuartut peqqissusaat, atugarissaarnerat aammalu piffissap ingerlanerani peqqissusertik pillugu pissusilersuutigisartagaat pillugit nunarsuarmioqatigiit ilisimatuussutsikkut, Health Behaviour in School-aged Children (HBSC) taasamik misissuisarneranni aammalu Qeqqata Kommuniani politikkikkut suleqatigiinnissamik Siumup, Inuit Ataqatigiit Atassutillu isumaqatigiissutaanni anguniagaasut malillugit Qeqqata Kommuniani kommunalbestyrelsimi ilaasortat amerlanerussuteqartut 25. november aalajangerput kommunip suliffeqarfiini, ingerlatsiviini suliffeqarfinnilu tamani kommunip ataaniittuni pujortartarneq inerteqqutinngortinneqassasoq.
- Meeqqat atuartut misissuiffigineqarneranni HBSC 2020-mi ingerlanneqartumi paasinarsivoq meeqqat 7. aamma 8. klassimi atuartut quliugaangata ataaseq pujortartalereersimasoq aammalu 9. aamma 10. klassit akornanni meeqqat pingasuugaatata ataaseq pujortartalereersimasoq paasinarsimmalli kommunalbestyrelsimi aammalumi partiit akornanni oqallisigisarparput uagut inersimasutut meerartagut ikiorsinnaanerigut ileqqoq peqqinnanngitsoq aamma ulorianaqisoq siammaateqqunagu.
- Uanga qularinngilluinnarpara meerartatsinnut ikiuussinnaanerput annerpaaq tassaammat inersimasut meeqqanut maligassiuinerat. Taamaammat iluarisimaarpara politikkikkut suleqatigiit Siumut, Inuit Ataqatigiit Atassullu isumaqatigiissumminni siunniunnikuummassuk Qeqqata Kommuniata 1. maj 2022 aallarnerfigalugu pujortarfiujunnaartinneqarnissaa.
Aalajangerneq maanna pereerpoq. Borgmesteri Malik Berthelsen (S) erseqqissaavoq kommunip tungaaniit Qeqqata Kommuniata suliffeqarfittut pujortarfiujunnaarnissaanut atatillugu sulisut ikiuussinnaasut aammalu pujortarunnaarnissamut atortut ikiuutaasinnaasut pigilernissaat sulissutigineqartoq, aammalu erseqqissaavoq inuit ilaannut aalajangerneq killissamik qaangiinertut naalakkiiniarnertullu nalilerneqarsinnaasoq.
- Atuartut innuttaasullu peqqissusaasa misissuivigineqarnerini takusinnaavarput inersimasutut ileqqugut pitsaasut pitsaanngitsullu ilaatigut meerartatsinnut ingerlateqqittarigut. Tassami misissuinerni takuneqarsinnaavoq ukioqqortusiartornermi aammalu inersimasunngornerup nalaani pujortartut annertuumik amerleriartartut.
Aalajangernerput immaqa ilaannit naalagaaniarnertut isigineqarsinnaagaluartoq, matumani peqqissutsitta illersorneqarnissaa pineqarmat, neriuppunga assortuussutiginatigu tamatta ikioqatigiissutigissagipput.
- Takorluulaariartigumi kommunitsinni innuttaasut nunatsinni tupamik atuinnginnerpaanissaat angusinnaagutsigu qanoq tulluusimaarnartigissanersoq, borgmester Malik Berthelsen oqarpoq.