Atuarfik Kilaaseeqqap nutarsarlugu suliarineqarnissaanut atatillugu Masanti Qeqqata Kommunialu soqutiginnittunut
Workshop 1-miit Masanti malitseqartitsissaaq aamma atuarfiup illutaata misissorneqarnerani inerniliussat nutarsaanissamullu siunnersuutigigallakkatik saqqummiutissavaat.
Workshop aallartinnerani ingerlaneranilu eqimattani eqqartuisitsisoqarumaarpoq. Kingorna eqimattani peqataasut suliniut pillugu qanoq naatsorsuuteqarnerlutik siunissamilu qanoq
suleqatigiinnissaq takorloornerlugu sammineqassaaq.
Atuartunut, angajoqqaanut, ilinniartitsisunut, sulisunut allanullu atuarfimmik atuisunut tamanut kiisalu atuareernerup kingorna paaqqinnittarfimmut workshoppi ammassaaq.
Meeqqanut periarfissaqarluassaaq
GAME Maniitsoq Kalaallit Nunaanni Timersoqatigiiffiit Kattuffianit aaqqissuunneqartumit playmakereqarumaarpoq, taakku atuarfiup silataani meeqqanut 6-niit 14-inut ukiulinnut pinnguartitsinernik aaqqissuussissallutik. Sila ajussagaluarpat atuarfiup iluani aaqqissuussissapput. Meeqqat arfinillit ataallugit ukiullit namminneq paarsisoqassapput.
Peqataasunut ulloqeqqarnermi nerisassaqassaaq, ualikkullu te, kaffi kaageqassaaq.
Workshop arfininngorpat maajip 13-anni nal. 10.00 - 15.00 Atuarfik Kilaaseeqqami aulami pissaaq.